ৰঙিয়া,24 জুন: ৰাজ্যত মুখ্যমন্ত্ৰী হিচাপে ড৹ হিমন্ত বিশ্ব শৰ্মাই শপত গ্ৰহণ কৰা পাচৰে পৰা দুৰ্নীতি, অসামাজিক কাৰ্যকলাপ, নিচাজাতীয় সামগ্ৰীৰ বিৰুদ্ধে কঠোৰ হ’বলৈ আৰক্ষী, প্ৰশাসন আৰু বিভাগীয় মন্ত্ৰী সকলক নিৰ্দেশ প্ৰদান কৰিছে ৷ সেই সমূহৰ ভিতৰত ৰাজ্যৰ অন্যতম এটা গুৰুত্বপূৰ্ণ বিভাগ হ’ল শক্তি বিভাগ অৰ্থাৎ বিদ্যুৎ বিভাগ ৷ এই বিভাগটো দীৰ্ঘদিনৰ পৰা লোকচানৰ সন্মুখীন হৈ আহিছে বিভাগীয় গাফিলতিৰ ফলত ৷
সেয়েহে মুখ্যমন্ত্ৰী হিচাপে দায়িত্বভাৰ গ্ৰহণ কৰিয়েই শক্তি বিভাগৰ মন্ত্ৰী বিমল বৰাক কঠোৰ হৈ বিভাগটো পৰিচালনা কৰিবলৈ নিৰ্দেশ প্ৰদান কৰা দেখিবলৈ পোৱা গৈছিল ৷ মন্ত্ৰী বিমল বৰাইও দায়িত্বভাৰ লৈয়ে ৰাজ্যৰ বিভিন্ন প্ৰান্তৰ বিদ্যুৎ উৎপাদন কেন্দ্ৰৰ লগতে বিতৰণ কেন্দ্ৰ সমূহলৈ গৈ চৰজমিন তদন্ত কৰা পৰিলক্ষিত হৈছিল ৷
মুখ্যমন্ত্ৰী আৰু বিদ্যুৎ বিভাগৰ মন্ত্ৰীৰ কঠোৰ নিৰ্দেশৰ পাচতে বিভাগটোৰ বিষয়া কৰ্মচাৰী সকল তৎপৰ হৈ পৰা দেখিবলৈ পোৱা গৈছে ৷ ৰাজ্যৰ বিভিন্ন প্ৰান্তৰ দৰে কামৰূপ জিলাৰ ৰঙিয়াৰ বিদ্যুৎ বিভাগো কঠোৰ হৈ পৰা দেখিবলৈ পোৱা গৈছে ৷ বুধবাৰে ৰঙিয়াত বিদ্যুৎ চুৰি ৰোধ কৰিবলৈ বিশেষ ব্যৱস্থা গ্ৰহণ কৰা দেখা গৈছে বিভাগটোক ৷ বিভিন্ন সৰু বৰু উদ্যোগৰ লগতে ঘৰে ঘৰে গৈ অবৈধভাবে কৰা বিদ্যুৎ সংযোগ সমূহ কৰ্তন কৰে ৷
উল্লেখযোগ্য যে, ৰঙিয়া বিদ্যুৎ উপ-সংমণ্ডলৰ অৰ্ন্তগত ২ নং উপ-সংমণ্ডল বিষয়া ভাস্কৰজ্যোতি নাথ আৰু সহকাৰী কাৰ্যবাহী বিষয়া জ্যোতিষ দাসে অভিযান চলাই অবৈধ ভাৱে বিদ্যুৎ সংযোগ কৰি অহা ৭ গৰাকী লোকক জৰিমনা বিহে ৷ মন কৰিবলীয়া যে, বুধবাৰে ৰঙিয়াৰ তুলসীবাৰী, ডিমু, উদিয়ানা, বনগাঁও, গৰিয়াকোঠৰ লগতে আন কেইবাঠাইতো বিভাগটোৱে অভিযান চলোৱা পৰিলক্ষিত হয় ।
অভিযান চলোৱা সময়ত কেইবাটাও অবৈধ ভাৱে থকা বিদ্যুৎ সংযোগ কৰ্তন কৰাৰ লগতে বিল পৰিশোধ নকৰা গ্ৰাহক সমূহৰ বিদ্যুৎ সংযোগ কৰ্তন কৰে । অভিযানকাৰী দলটোৱে জানিবলৈ দিয়া অনুসৰি, অভিযান চলোৱাৰ সময়ত তেওঁলোকে বিদ্যুৎ মিটাৰৰ বাকছৰ লগত বহুলোকে খেলিমেলি কৰা দেখিবলৈ পায় । সেইসকল লোকৰ বিৰুদ্ধেও বিভাগটোৱে কঠোৰ ব্যৱস্থা গ্ৰহণ কৰিব বুলি জনাই ৰঙিয়া বিদ্যুৎ বিভাগৰ ২ নং উপ সংমণ্ডলৰ বিষয়া ভাস্কৰজ্যোতি নাথে ।
বিষয়া গৰাকীয়ে উল্লেখ কৰে যে, উক্ত অঞ্চলকেইটাত বিদ্যুৎ কৰ্তন কৰা লোক সকলৰ লগতে লঘু উদ্যোগ সমূহে সৰ্ব মুঠ 3,10,280 টকা বিদ্যুৎ বিভাগক আদায় দিবলৈ বাকী আছে । সম্প্ৰতি যি সকলে বিদ্যুৎ চুৰি কৰি বিভাগটোক লোকচানৰ সন্মুখীন কৰি আহিছিল তেওঁলোকৰ বিৰুদ্ধে গোচৰ তৰাৰ কথা সদৰি কিৰিছে ৰঙিয়া বিদ্যুৎ বিভাগৰ বিষয়া কৰ্মচাৰীয়ে ৷
