ৰঙিয়া, 24 আগষ্ট: এটেনশ্যন বিধায়ক মহোদয় ! তিনিবাৰকৈ আধাৰশিলা স্থাপন কৰা আপোনাৰ সমষ্টিৰ এটা পথৰ কথা ক’ব বিচাৰিছো ৷ এবাৰ দুবাৰকৈ তিনিবাৰ পথটোৰ আধাৰশিলা স্থাপন কৰিছে ঠিকেই, কিন্তু আজিলৈকে পথটোহে নিৰ্মাণ হৈ নুঠিল ৷ কেৱল এয়াই নহয় ৷
চলিত বৰ্ষৰ নিৰ্বাচনৰ পূৰ্বে পথটো নিৰ্মাণৰ প্ৰতিশ্ৰুতিৰে স্থানীয় বিধায়ক ভৱেশ কলিতাই(Bhabesh Kalita) খোদ যিটো আধাৰশিলা স্থাপন কৰিছিল, সেই আধাৰশিলাৰ ফলক অন্তৰ্ধান হৈ পৰিল ৷ কিন্তু কেনেকৈ ? এই অভিযোগ উত্থাপন কৰিছে স্থানীয় ৰাইজে ৷
এতিয়া আহো মূল প্ৰসংগলৈ ৷ ৰঙিয়া সমষ্টিৰ অন্তৰ্গত তুলসীবাৰীৰ ৰাজপথত মঙলবাৰে বাঁহ বান্ধি উত্তাল প্ৰতিবাদ সাব্যস্ত কৰিছে স্থানীয় ৰাইজে ৷ কিয়নো বিধায়ক ভৱেশ কলিতাই তিনিবাৰকৈ আধাৰশিলা স্থাপন কৰা মূল পথটো আজিও আছে জৰাজীৰ্ণ অৱস্থাত ৷
সুচল যাতায়াত কৰাতো বাদেই, জৰুৰীকালিন সময়তো এই জৰাজীৰ্ণ পথটোৰে বৃহত্তৰ অঞ্চলটোলৈ এম্বুলেঞ্চ অথবা অগ্নি নিৰ্বাপক বাহিনীৰ বাহন যাব নোৱাৰাৰ বাবে আন এক সমস্যাই দেখা দিছে অঞ্চলবাসীৰ মাজত । তুলসীবাৰী বহুমুখী উচ্চতৰ মাধ্যমিক বিদ্যালয়ৰ সন্মুখেৰে আই টি আইলৈ যাতায়াত কৰিব পৰা পথটো আজি পৰ্যন্ত নিৰ্মাণ কৰা দেখা নগ’ল ৷
ইয়াৰ মাজতে অঞ্চলবাসীৰ মাজলৈ অকণমান সুখৰ ৰেঙণি নামি আহিছিল যদিও সেয়াও লাভ কৰাৰ পৰা বঞ্চিত হ’ল এইসকল দুৰ্ভগীয়া লোকে ৷ কিয়নো শেহতীয়াকৈ পথটো নিৰ্মাণৰ বাবে চৰকাৰৰ পৰা অনুমোদন লাভ কৰিছিল যদিও নিৰ্মাণৰ পূৰ্বেই আধাৰশিলাৰ ফলকখন অন্তৰ্ধান হৈ পৰিল ৷
লগতে পঢ়ক: তিনিটা দশকে হৈ নুঠা পথৰ নিৰ্মাণ আৰম্ভ হ’ল: লগে লগে আৰম্ভ অনিয়ম
অনুমোদিত পথটোৰ পৰিৱৰ্তে অন্য স্থানৰ পথত সেই ধন ব্যায় কৰাৰ আশংকা ঘণীভূত হৈছে স্থানীয় ৰাইজৰ মনত । এই ঘটনাই ক্ষোভিত কৰি তুলিছে তুলসীবাৰীবাসী ৰাইজক ৷ কোনে আৰু কিয় পথ নিৰ্মাণৰ পূৰ্বে আধাৰশিলাৰ ফলকখন আঁতৰাই দিলে, তাক লৈ এতিয়া প্ৰশ্ন উত্থাপন হৈছে ৰাইজৰ মাজত ৷ পথৰ এই দুৰাৱস্থাৰ বাবে স্থানীয় বিধায়কলৈ ক্ষোভ উজাৰে অঞ্চলবাসীয়ে ৷
শীঘ্ৰেই পথটো নিৰ্মাণৰ দাবীৰে পথটোৰ সোঁমাজতে বাঁহ বান্ধি উত্তাল প্ৰতিবাদ সাব্যস্ত কৰিছে স্থানীয় ৰাইজে ৷ অচিৰেই পথ নিৰ্মাণৰ কাম আৰম্ভ নকৰিলে অনিৰ্দিষ্ট কাললৈ পথটো বন্ধ কৰি ৰখাৰ হুংকাৰ দিয়ে প্ৰতিবাদী ৰাইজে ।
গতিকে প্ৰশ্ন হয়, তিনিবাৰকৈ আধাৰশিলা স্থাপন হোৱা এই মূল পথৰ নিৰ্মাণ দেখিবলৈ পাবনে তুলসীবাৰীয়ে ? অনুমোদন লাভ কৰাৰ পাচতেই অন্তৰ্ধান হোৱা আধাৰশিলাৰ ফলকৰ আঁৰত কোন আছে?
প্ৰতিগৰাকী স্থানীয় জনপ্ৰতিনিধিয়ে নিৰ্বাচনৰ পূৰ্বে আধাৰশিলা স্থাপন কৰে যদিও নিৰ্মাণৰ কাম সম্পূৰ্ণ হোৱা তালিকাখন খুবেই চুটি ৷ নিৰ্বাচন আহিছে, নিৰ্বাচন গৈছে ৷ ইয়াৰ লগে লগে প্ৰতিশ্ৰুতি ভৰা ভাষণেৰে আধাৰশিলাও স্থাপন হৈ আছে ৷ কিন্তু এই আধাৰশিলা যেন একো একোটা ‘Joke’তহে পৰিণত হৈছে ৷
লগতে পঢ়ক: চৰকাৰৰ অৱহেলা: যাতায়তৰ বাবে বাঁহৰ সাঁকো নিৰ্মাণ কৰিলে মাদৈকাটাৰ ৰাইজে
