গুৱাহাটী, ২১ আগষ্ট: সদৌ অসম ছাত্ৰ সন্থাৰ উদ্যোগত গঠন হ'বলগীয়া নতুন ৰাজনৈতিক দলক কেন্দ্ৰ কৰি ৰাজ্যৰ ৰাজনীতিত সৃষ্টি হৈছে মিশ্ৰিত প্ৰতিক্ৰিয়া । আছুৰ প্ৰাক্তন সভাপতি তথা বৰ্তমানৰ অগপৰ সভাপতি অতুল বৰাই ইতিমধ্যে নতুন ৰাজনৈতিক দলৰ বাবে আছুক শুভেচ্ছা জনাইছে । একেদৰে ছাত্ৰ সংগঠনটোৰ আন এগৰাকী প্ৰাক্তন সভাপতি তথা বৰ্তমানৰ অগপৰ কাৰ্যকৰী সভাপতি কেশৱ মহন্তয়ো শুকুৰবাৰে নতুন ৰাজনৈতিক দলৰ বাবে অভিনন্দন জনাইছে আছুক । কিন্তু তাৎপৰ্যপূৰ্ণভাবে তেওঁ এই বুলিও মন্তব্য কৰে যে বাকী ৰাজনৈতিক কথা বতৰাবিলাক নিৰ্বাচনৰ সময়ত ভোটৰ ক্ষেত্ৰখনতহে দেখা পোৱা যাব ।
ইপিনে আছুৰ আন এগৰাকী প্ৰাক্তন সভাপতি তথা বৰ্তমানৰ কংগ্ৰেছ নেতা শংকৰ প্ৰসাদ ৰায়ে নতুন ৰাজনৈতিক দলৰ বাবে আছুক শুভেচ্ছা জনাই এই বুলিও মন্তব্য কৰে যে, আছুৱে দল গঠন কৰাৰ সময়ত এই কথাও মনত ৰখা ভাল যে যাৰ বিৰুদ্ধে এই দল গঠন কৰা হৈছে তেওঁলোককে যাতে এই দলে উপকৃত নকৰে ।
