গুৱাহাটী, 13 ডিচেম্বৰঃ নাগৰিকত্ব সংশোধনী বিধেয়কক লৈ সমগ্ৰ ৰাজ্যত সৃষ্টি হোৱা অগ্নিগৰ্ভা পৰিস্থিতিৰ বাবে অসমলৈ অহা বহুসংখ্যক বিদেশী পৰ্যটক বিভিন্ন ঠাইত আৱদ্ধ হৈ পৰিছে । পৰ্যটন বিভাগৰ সঞ্চালক দেৱপ্ৰসাদ মিশ্ৰই ই টিভি ভাৰতৰ আগত এই কথা প্ৰকাশ কৰিছে এই কথা ৷ তথ্য অনুসৰি , কাজিৰঙাত ১৬ গৰাকী বিদেশী পৰ্যটক আবদ্ধ হৈ আছে ৷ তেওঁলোকে কাজিৰঙাৰ পৰা ডাউকী হৈ বাংলাদেশলৈ যোৱাৰ কথা আছিল ৷ বৰ্তমান তেওঁলোকক কাজিৰঙাৰ পৰা অনা হৈছে বৰঝাৰলৈ ৷ বৰঝাৰৰ পৰা কলকাতা হৈ তেওঁলোক এতিয়া বাংলাদেশলৈ যাব ৷
আনহাতে, মাজুলীৰ পৰা ব্ৰহ্মপুত্ৰৰে কাজিৰঙালৈ আহি থকা ৮ গৰাকী পৰ্যটক বৰ্তমান পানীৰ মাজত আবদ্ধ হৈ আছে ৷ তেওঁলোককো সুকলমে কাজিৰঙালৈ অনাৰ ব্যৱস্থা কৰি আছে পৰ্যটন বিভাগে ৷ এই সকলো পৰ্যটক আমেৰিকা আৰু অষ্ট্ৰেলিয়াৰ বুলি প্ৰকাশ কৰিছে সঞ্চালক গৰাকীয়ে ৷ লগতে কয় যে, এই সময়চোৱা অসমৰ পৰ্যটন উদ্যোগৰ বাবে উপযুক্ত সময় ৷ এনে প্ৰেক্ষাপটত অসমৰ পৰ্যটন উদ্যোগ অধিক ক্ষতিগ্ৰস্ত হৈছে বুলিও মন্তব্য কৰে সঞ্চালক মিশ্ৰই ৷
