গুৱাহাটী,28 ফেব্ৰুৱাৰীঃ অহা 1 মাৰ্চত গুৱাহাটীত অনুষ্ঠিত হ’ব 2020 বৰ্ষৰ দ্যা গ্ৰেট গুৱাহাটী মাৰাথান । আষ্মকাম ফাউণ্ডেচনৰ উদ্যোগত আৰু অসম এথলেটিক সন্থাৰ তত্বাৱধানত অনুষ্ঠিত হ’ব আন্তঃৰাষ্ট্ৰীয় পৰ্যায়ৰ এই মাৰাথন ৷ মাৰাথনৰ শুভৰাম্ভ কৰিব বলিউডৰ মোহময়ী অভিনেত্ৰী য়ামী গৌতমে ৷ কেইবাটাও শাখাত মুকলি হ’বলগীয়া এই মাৰাথনত আছে সৰ্বমুঠ 13 লাখ 10 হাজাৰ টকাৰ প্ৰাইজমনি ৷ বৃহস্পতিবাৰে সংবাদমেলযোগে মাৰাথনৰ পতাকা, টি-চাৰ্ট আৰু মডেল আনুষ্ঠানিক ভাৱে মুকলি কৰে আষ্মকাম ফাউণ্ডেচনৰ বিষয়ববীয়া সকলে ৷
উল্লেখ্য যে, খানাপাৰা খেল পথাৰৰ পৰা আৰম্ভ হ’ব এই মাৰাথন । মাৰাথনত ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ৰ বাবে থাকিব পৃথক বঁটা ৷ ৰাষ্ট্ৰীয় পৰ্যায়ৰ বাবে প্ৰথম পুৰস্কাৰ 1 লাখ টকা, দ্বিতীয় পুৰস্কাৰ 75 হাজাৰ টকা আৰু তৃতীয় পুৰষ্কাৰ 50 হাজাৰ টকা ৷ লগতে এই মাৰাথন খনিত ওতঃপ্ৰোত ভাৱে জড়িত থাকিব অৰ্জুন বঁটা বিজয়ী ভোগেশ্বৰ বৰুৱা আৰু বাইচুং ভুটিয়া ৷ 1 মাৰ্চৰ দিনটোতে অৰ্জুন বঁটা বিজয়ী ভোগেশ্বৰ বৰুৱাক আষ্মকাম ফাউণ্ডেচনে প্ৰদান কৰিব জীৱনযোৰা সাধনা বঁটা ৷ মাৰাথানৰ থীম চংটোৰ কথা আৰু সুৰ ইবছন লাল বৰুৱাৰ য’ত কন্ঠ নিগৰাইছে জয় বৰুৱা আৰু জুবলীয়ে ৷
