গুৱাহাটী,13 মাৰ্চঃ প্ৰতিবছৰে ৰাজ্যত বানপানীয়ে কালৰূপ ধাৰণ কৰি ধন-জনৰ বিস্তৰ ক্ষতি সাধন কৰি আহিছে । বানপানীৰ কবলত পৰি বহু লোকে প্ৰাণ হেৰুৱাবলগীয়া হোৱাৰ বিপৰীতে ক্ষতিসাধন হয় কেইবালক্ষাধিক মূল্যৰ সা-সম্পত্তি । প্ৰতিবছৰে অসমে মুখামুখি হৈ অহা প্ৰকৃতিৰ এই বিপৰ্যয়ৰ পৰা ক্ষতিসাধনৰ পৰিমাণ ৰোধ কৰিবলৈ ৰাজ্যিক দুৰ্যোগ ব্যৱস্থাপনা বিভাগে ইউনিচেফ আৰু অক্সফ্লেম ইণ্ডিয়াৰ লগত এক আলোচনাত মিলিত হয় ।
আলোচনাখনত বানপানী,গৰাখহনীয়াৰ লগতে অন্যান্য দুৰ্যোগৰ সময়ত ক্ষতিৰ পৰিমাণ কিদৰে হ্ৰাস কৰিব পাৰি তাকে লৈ এক বিশেষ ৰোড মেপ তৈয়াৰ কৰা হয় । আগন্তক দহ বছৰ পৰ্যন্ত এই ৰোড মেপৰ ভিত্তিত কাম কৰি ৰাজ্যিক দুৰ্যোগ ব্যৱস্থাপনা বিভাগে বিভিন্ন দুৰ্যোগৰ সময়ত ক্ষতিৰ পৰিমাণ হ্ৰাস কৰাৰ গুৰুত্ব প্ৰদান কৰিব । এজাক বৰষুণতে জলমগ্ন হৈ পৰা গুৱাহাটী মহানগৰীৰ কৃত্ৰিম বানপানী ৰোধৰ ওপৰতো বিশেষ আলোচনা হয় কৰ্মশালাখনত ।
দুদিনীয়াকৈ অনুষ্ঠিত ৰাজ্যিক দুৰ্যোগ ব্যৱস্থাপনাৰ কৰ্মশালাখনত ৰাজ্য চৰকাৰৰ পাঁচটাকৈ বিভাগে অংশগ্ৰহণ কৰে । শুকুৰবাৰে কৰ্মশালাৰ অন্তিম দিনৰ অনুষ্ঠানত উপস্থিত থাকে চৰকাৰৰ কেইবাগৰাকী উচ্চপদস্থ বিষয়াৰ লগতে ৰাজহ আৰু ৰাজ্যিক দুৰ্যোগ ব্যৱস্থাপনা মন্ত্ৰী যোগেন মহন ।
লগতে চাওকঃকৰ’ণা ভাইৰাছ সম্পৰ্কত নলবাৰীত উপায়ুক্তৰ সতৰ্কীকৰণ সভা
