গুৱাহাটী, ১৭ জুলাই: "বাজেটত ধাৰ্য কৰা ধন সম্পূৰ্ণভাৱে ব্যয় কৰা নহয় ৷ ধাৰ্য কৰা ধনৰ 60 বা 70 শতাংশ হে খৰচ কৰিবলৈ সক্ষম হৈছে বৰ্তমানৰ বিজেপি চৰকাৰখনে ৷ অৰ্থাৎ বাজেটত প্ৰতি বছৰে ধাৰ্য কৰা ধনৰাশি খৰচ কৰাত ব্যৰ্থ বিজেপি চৰকাৰ ৷" অসম বিধানসভাত বাজেট দাখিল কৰাৰ এটা দিনৰ পাচতে এইদৰে প্ৰতিক্ৰিয়া প্ৰকাশ কৰিলে কংগ্ৰেছৰ জ্যেষ্ঠ নেতা ৰিপুন বৰাই ৷
২০১৫-১৬ বৰ্ষৰ পৰা আৰম্ভ কৰি ২০১৯-২০ বিত্তীয় বৰ্ষলৈকে ৰাজ্য চৰকাৰে বাজেটৰ ধন প্ৰতি বছৰে গড়ে ৬০ শতাংশহে খৰচ কৰিবলৈ সক্ষম হৈছে । এই অভিযোগ ৰাজ্যসভাৰ সাংসদ তথা প্ৰদেশ কংগ্ৰেছৰ সভাপতি ৰিপুণ বৰাৰ । সংবাদমেলত ৰিপুন বৰাই কয়, প্ৰথমবাৰৰ বাবে ৰাজ্যৰ শাসনভাৰ গ্ৰহণ কৰাৰে পৰা আৰম্ভ কৰি এতিয়ালৈকে বাজেটৰ প্ৰতিশ্ৰুতি পালনৰ লগতে বাজেটত ধাৰ্য কৰা ধন ব্যয় কৰাত বিজেপি চৰকাৰ ব্যৰ্থ হৈছে ৷
শনিবাৰে প্ৰদেশ কংগ্ৰেছৰ মুখ্য কাৰ্যালয় ৰাজীৱ ভৱনত অনুষ্ঠিত এখন সংবাদমেলত ভাগ লৈ বৰাই কয়, ২০১৫-১৬ বৰ্ষৰ পৰা ২০১৯-২০ বিত্তীয় বৰ্ষলৈকে বাজেটৰ ধন কোনোবাটো বছৰত ৪২ শতাংশ, কোনোবাটো বছৰত ৪৩ শতাংশ বা কোনোবাটো বছৰত ৪৫ শতাংশহে ব্যয় কৰিবলৈ সক্ষম হৈছে বিজেপি নেতৃত্বাধীন চৰকাৰখন ।
গড় হিচাপত বছৰি ৬০ শতাংশতকৈ অধিক বাজেটৰ ধন ব্যয় কৰিবলৈ সক্ষম হোৱা নাই এই চৰকাৰ । ২০১৫-১৬ বৰ্ষৰ বাজেটৰ পৰা এতিয়ালৈকে অলেখ প্ৰতিশ্ৰুতি দিলে চৰকাৰখনে । কিন্তু কাৰ্যকৰী নহ'ল । প্ৰতিশ্ৰুতিৰ নামত প্ৰত্যেক ক্ষেত্ৰতে কেৱল প্ৰৱঞ্চনাহে কৰি আহিলে চৰকাৰখনে । এইদৰে মন্তব্য প্ৰকাশ কৰে প্ৰদেশ কংগ্ৰেছৰ সভাপতি গৰাকীয়ে ।
লগতে পঢ়ক: Jeans, T-shirt পৰিধান কৰিব নোৱাৰিব সচিবালয়ৰ কৰ্মচাৰীয়ে
