গুৱাহাটী,19 ডিচেম্বৰঃ সদৌ অসম উকীল সন্থাই বৃহস্পতিবাৰে নাগৰিকত্ব সংশোধনী আইন সম্পৰ্কে এক সংবাদমেলৰ আয়োজন কৰে । সন্থাৰ সাধাৰণ সম্পাদক দীপক কুমাৰ দাসে কয় যে, "আমি আৰম্ভণিৰ পৰাই নাগৰিকত্ব সংশোধনী আইনৰ বিৰোধিতা কৰি আহিছো । অসম আন্দোলন আৰু অসম চুক্তি অনুসৰি 1971 চনৰ পাছত অহা বিদেশীয়ে অসম ত্যাগ কৰিব লাগিব |" ইতিমধ্যে সদৌ অসম উকীল সন্থাৰ তৰফৰ পৰা নাগৰিকত্ব সংশোধনী আইন সম্পৰ্কে লেখ আবেদন দাখিল কৰিছে । আইনখনে অসমৰ ভাষা সংস্কৃতি বিনষ্ট কৰিব বুলি দাসে কয় ৷ শুক্ৰবাৰে দিনৰ 11:30 বজাত সদৌ অসম উকীল সন্থাৰ তৰফৰ পৰা ‘ৰাজভৱন চলো’ শীৰ্ষক এক সমদল উলিওৱা হ’ব । ইয়াৰ জৰিয়তে ৰাজ্যপালৰ যোগেদি ৰাষ্ট্ৰপতিলৈ এক স্মাৰক প্ৰেৰণ কৰাৰ সিদ্ধান্ত গ্ৰহণ কৰিছে সদৌ অসম উকীল সন্থাই ৷ সম্প্ৰতি বিশ্বৰ ভিন্ন স্থানত এই আইন সম্পৰ্কে প্ৰতিবাদ চলি আছে ৷ তেনে সময়ত বিজেপিয়ে আইনখন উত্তৰ-পূৱৰ হিতৰ বাবে অনা বুলি কোৱাটো এক দুৰ্ভাগ্যজনক বুলি দাসে কয় ৷
ইপিনে ৰাজ্যৰ শিল্পী সমাজক প্ৰলোভন দি চৰকাৰে এই আইন বিৰোধী প্ৰতিবাদ দুৰ্বল কৰিব বিচাৰিছে । উগ্ৰ দমন নীতিৰে ৰাজ্য চৰকাৰে প্ৰতিবাদী জনতাক ৰুদ্ধ কৰাৰ চেষ্টা চলাইছে ৷ সংবাদমেলখনত অংশগ্ৰহণ কৰি গুৱাহাটী উচ্চ ন্যায়ালয়ৰ জ্যেষ্ঠ অধিবক্তা নেকিবুৰ জামানে কয় যে,আন্দোলনৰ সময়ত চৰকাৰে আটক কৰা লোকৰ হৈ উকীল সন্থাই বিনামূলীয়াকৈ ওকালতি কৰিব । তদুপৰি অখিল গগৈক দহ বছৰৰ এটা পুৰণি গোচৰত পৰিকল্পিতভাৱে গ্ৰেপ্তাৰ কৰা হৈছে । নিয়াই আদালতত হাজিৰ কৰোৱা সময়ত যিদৰে কৃষক নেতাগৰাকীক ধৰি অনা হৈছিল,তাৰ দ্বাৰা মানৱ অধিকাৰ উলংঘন কৰা হৈছে । উগ্ৰ দমন নীতিৰে চৰকাৰে প্ৰতিবাদক দমন কৰিব বিচাৰিছে । বিত্তমন্ত্ৰী হিমন্ত বিশ্ব শৰ্মাই এক বিশেষ সম্প্ৰদায়ৰ লোকক লক্ষ্য কৰি লোৱাটো দুৰ্ভাগ্যপূৰ্ণ বুলি মন্তব্য কৰে অধিবক্তাগৰাকীয়ে । "কা’ বিৰোধী প্ৰতিবাদত বিভিন্ন জাতি-ধৰ্ম-বৰ্ণৰ লোকে স্ব ইচ্ছাৰে ওলাই আহিছে । সংবিধান বিৰোধী আইন আমি কেতিয়াও মানি নলওঁ" বুলিও দাবী কৰে সদৌ অসম উকীল সন্থাই ৷
লগতে চাওকঃবৃহস্পতিবাৰে ইন্টাৰনেট সেৱা পুনৰ বাহাল কৰিবলৈ নিৰ্দেশ উচ্চ ন্যায়ালয়ৰ
