ডনবস্ক' কৰ্তৃপক্ষৰ বিৰুদ্ধে ধৰ্মান্তৰকৰণৰ বাবে হেঁচা প্ৰদানৰ অভিযোগ

মালিগাঁওস্থিত ডনবস্ক' কৰ্তৃপক্ষৰ বিৰুদ্ধে উত্তাল হৈ পৰে মালিগাঁৱৰ একাংশ ৰাইজ ৷ এগৰাকী লোকক তেওঁৰ লগতে আন লোককো হিন্দু ধৰ্মৰ পৰা খ্ৰীষ্টিয়ান ধৰ্মলৈ ধৰ্মান্তকৰণ কৰিবলৈ হেঁচা প্ৰদান কৰাৰ অভিযোগ উত্থাপন হৈছে ডনবস্ক' কৰ্তৃপক্ষৰ বিৰুদ্ধে ৷

গুৱাহাটী, 3 চেপ্তেম্বৰ: বৃহস্পতিবাৰে ধৰ্মান্তৰকৰণৰ বিৰুদ্ধে উত্তাল হৈ পৰে মালিগাঁৱৰ একাংশ ৰাইজ ৷ মালিগাঁওস্থিত ডনবস্ক' টেকনিকেল স্কুলৰ কৰ্তৃপক্ষৰ বিৰুদ্ধে ধৰ্মান্তৰকৰণৰ গুৰুতৰ অভিযোগ উত্থাপন কৰে অঞ্চলটোৰ একাংশ ৰাইজে ৷ ঘটনা অনুসৰি মালিগাঁৱৰ ডনবস্ক' বিদ্যালয়ৰ সমীপত তুলু কুমাৰ নামৰ গৰাকী লোকৰ দোকান আছিল ৷ বিগত 1978 চনৰ পৰাই সেই স্থানত লোকগৰাকীৰ পিতৃ, ককাকৰ দিনৰ পৰাই সেই দোকানখন আছিল ৷ কিন্তু শেহতীয়াকৈ ডনবস্ক' কৰ্তৃপক্ষই চক্ৰান্ত কৰি লোকগৰাকীক সেই স্থানৰ পৰা তেওঁৰ দোকান খন উঠাবলৈ কোৱাৰ লগতে, তেওঁক ধৰ্ম সলনি কৰি হিন্দু ধৰ্মৰ পৰা খ্ৰীষ্টিয়ান ধৰ্মলৈ ধৰ্মান্তকৰণ কৰিবলৈ হেঁচা প্ৰদান কৰে ৷ এই অভিযোগ উত্থাপন কৰিছে স্বয়ং ভুক্তভোগী লোকগৰাকীয়ে ৷

লোকগৰাকীক ভিন্ন প্ৰলোভন দেখুৱাই ধৰ্মান্তকৰণ কৰিবলৈ কোৱাৰ লগতে, তেওঁৰ লগতে আন লোককো খ্ৰীষ্টিয়ান ধৰ্ম গ্ৰহণৰ ব্যৱস্থা কৰিব লাগে বুলি তেওঁক কোৱাৰ অভিযোগ উত্থাপন হৈছে ৷ কিন্তু খ্ৰীষ্টিয়ান ধৰ্মত দীক্ষিত নোহোৱাৰ বাবেই তেওঁৰ দোকানখন ডনবস্ক' কৰ্তৃপক্ষই ভাঙি দিয়াৰ গুৰুতৰ অভিযোগ উত্থাপন কৰে ভুক্তভোগীয়ে ৷ সম্প্ৰতি লোকগৰাকীয়ে ডনবস্ক' কৰ্তৃপক্ষৰ বিৰুদ্ধে গোশালা আৰক্ষী চকীত এখন এজাহাৰ দাখিল কৰিছে ৷ লগতে ডনবস্ক' কৰ্তৃপক্ষৰ এনে কাৰ্যৰ বিৰুদ্ধে ক্ষোভ প্ৰকাশ কৰি বৃহস্পতিবাৰে মালিগাঁওস্থিত বিদ্যালয় খনৰ সন্মুখত একাংশ স্থানীয় লোকে প্ৰতিবাদ সাব্যস্ত কৰে ৷

লগতে পঢ়ক: নৱগঠিত ৰাজনৈতিক দলে বিজেপিৰ ক্ষতি কৰিব নোৱাৰে: মনোজ বৰুৱা