গুৱাহাটী, 25 ছেপ্টেম্বৰ: পি কে দত্ত ৷ সম্পূৰ্ণ নাম প্ৰশান্ত কুমাৰ দত্ত । অসম আৰক্ষীক বাৰুকৈয়ে অস্বস্তিত পেলোৱা এইজন কলংকিত আৰক্ষী বিষয়া এতিয়া পলাতক ৷ ইতিমধ্যে চাকৰিৰ পৰা অৱসৰ গ্ৰহণ কৰা পি কে দত্ত চাকৰি কালতো আছিল এগৰাকী অত্যন্ত বিতৰ্কিত আৰক্ষী বিষয়া ৷ মাটি বেদখলৰ পৰা আৰম্ভ কৰি আলফা কেডাৰক হত্যা কৰি আলফাৰ "গুপ্তধন" আত্মসাৎ কৰালৈকে অজস্ব বিতৰ্কত সাঙোৰ খাইছিল এইজন কুখ্যাত আৰক্ষী বিষয়াৰ নাম ৷ চাকৰি কালত দুৰ্নীতি-কেলেংকাৰীৰে কেইবা হাজাৰ কোটি টকাৰ মালিক হোৱা পি কে দত্তই অসম আৰক্ষীৰ এছ আই পৰীক্ষাৰ প্ৰশ্নকাকত ফাদিল হোৱাৰ পিছতেই বুজি পাইছিল বিপদে আহি তেওঁৰ দুৱাৰত টোকৰ দিবলৈ সাজু হৈছে ৷ সেয়েহে পুলিচে গৈ তেওঁৰ ঘৰ-হোটেলত তালাচী চলোৱাৰ আগতেই সপৰিয়ালে অসম এৰিলে পি কে দত্তই ৷ এজন আৰক্ষী বিষয়াই নিজৰ চাকৰি জীৱনত কিমান ধন-সম্পত্তি আহৰণ কৰিব পাৰে বাৰু ? এইজন কুখ্যাত আৰক্ষী বিষয়াৰ সম্পত্তিৰ তালিকা দেখি তদন্তকাৰী আৰক্ষী দলৰো মুৰ আচন্দ্ৰাই কৰি গৈছে ৷
উল্লেখ্য যে, কেইবা হাজাৰ কোটি টকাৰ গৰাকী পি কে দত্তৰ গুৱাহাটীত খানাপাৰাৰ পৰা জালুকবাৰীলৈকে বিভিন্ন স্থানত আছে সৰ্বমুঠ প্ৰায় 12 বিঘাৰো অধিক মাটি ৷ যাৰ মূল্য কিমান হ'ব সেইয়া সহজেই অনুমেয় ৷ তথ্য অনুসৰি পি কে দত্তৰ আছে ফাৰ্ম হাউচৰ লগতে গুৱাহাটী মহানগৰীত আছে চাৰিখনকৈ বিলাসী হোটেল ৷ তাৰে লখৰাস্থিত হোটেল ভাৰ্গৱ গ্ৰেণ্ডখন তিনি তাৰকাযুক্ত ৷ আন কেইখন হল আই এছ বি টিৰ ওচৰত থকা হোটেল ভাৰ্গৱ, পল্টন বজাৰস্থিত ভাৰ্গৱ ইন আৰু গনেশগুৰিস্থিত হোটেল ভাৰ্গৱ ৷ উল্লেখনীয় যে, ডিব্ৰুগড়ৰ উপায়ুক্তৰ বাসভৱনৰ কাষতে পি কে দত্তই নিৰ্মাণ কৰিছে "ভাৰ্গৱ এপাৰ্টমেন্ট" নামৰ এটা বিশাল অট্টালিকা ৷ ডিব্ৰুগড় চহৰৰ সাত ঠাইত আছে তেওঁৰ সম্পত্তি ৷ ইমানেই নহয়, গুৱাহাটীৰ হেঙেৰাবাৰীত আছে তেওঁৰ প্ৰাসাদোপম দুটাকৈ অট্টালিকা ৷ ডিব্ৰুগড়, দিল্লী আৰু গুৱাহাটীত আছে সৰ্বমুঠ 12 টা ফ্লেট । বৰাক উপত্যকাৰ উদাৰবন্দত আছে এখন বিশাল চাহ বাগিচা ৷ যিখন বাগিচাৰ মাটি কালি 1400 বিঘা ৷ সেই বাগিচাতে আছে প্ৰায় কোটি টকীয়া এটা বিলাসী বাংলো ৷ ডিব্ৰুগড়ত থকা তেওঁৰ মাটিৰ পৰিমাণ প্ৰায় 200 বিঘা ৷ এই সমস্ত সম্পত্তিৰ গৰাকী হৈছে পি কে দত্তৰ লগতে তেওঁৰ পত্নী, কন্যা, জোৱাই আনকি তেওঁৰ হোটেলৰ বিস্বস্ত মেনেজাৰ পৰ্যন্ত ৷ এইয়া এতিয়ালৈকে তদন্তত পোহৰলৈ অহা হিচাপহে ৷ এই তালিকা আৰু দীঘলীয়া হোৱাৰ সম্ভৱণা ব্যক্ত কৰিছে আৰক্ষীয়ে ৷
প্ৰশ্ন উঠে, ইমান পৰ্বতসম সম্পত্তি আহৰণ কৰিবলৈ পি কে দত্তই আলাউদ্দিনৰ চাকিটো পালে ক'ত ? চাকৰি জীৱনত তেওঁৰ আটাইকেইটা প'ষ্টিঙেই আছিল "লাভজনক" স্থানত ৷ অভিযোগ অনুসৰি মেনেজ কৰাত পাকৈত এইজন কুখ্যাত আৰক্ষী বিষয়াৰ ভাতৃ জয়ন্ত দত্তক আলফাই ডিব্রুগড়ত গুলিয়াই হত্যা কৰিছিল । তাৰ পৰৱৰ্তী সময়ত সেই সময়ত ৰাজ্যত চলি থকা মুখ্যমন্ত্ৰী প্ৰফুল্ল কুমাৰ মহন্তৰ চৰকাৰৰ কাৰ্যকালত আৰম্ভ হৈছিল এক কলংকিত অধ্যায় "গুপ্তহত্যা" ৷ সেই গুপ্তহত্যাৰ সৈতে যি দুজন শীৰ্ষ আৰক্ষী বিষয়াৰ নাম সাঙোৰ খাইছিল তাৰে এজন আছিল জি এম শ্ৰীবাস্তৱ আৰু আনজন পি কে দত্ত ৷ গুপ্তহত্যাৰ বিভীষিকা চলি থাকোতেই আলফাই লুকুৱাই থোৱা বহু গুপ্তধনৰ সম্ভেদ পি কে দত্তই লাভ কৰিছিল ৷ পি কে দত্তৰ হাতত সেই সময়ত আলফাৰ নামত প্ৰাণ হেৰুৱাইছিল বহু অসমীয়া যুৱকে ৷ সেইয়াও আছিল পি কে দত্তই লাভ কৰা আলাউদ্দিনৰ চাকিৰ অন্যতম অংশ ৷
লগতে পঢ়কঃ হোটেল ভাৰ্গৱৰ মেনেজাৰ ৰাহুল ডেকাক গ্ৰেপ্তাৰ CID ৰ
