গুৱাহাটী, 3 ডিচেম্বৰ : মৰিশালীসদৃশ নিস্তব্ধতাই বিৰাজ কৰিছে গুৱাহাটীৰ ৰাজীৱ ভৱনত ৷ আতচবাজী ফুটাই আনন্দ কৰিবলৈও নাই কোনো ৷ কংগ্ৰেছৰ কাৰ্যালয়ত উপস্থিত নাই কোনো শীৰ্ষ নেতা ৷ মুঠতে কাঁহ পৰি জীণ যোৱা অৱস্থা ৰাজীৱ ভৱনত ৷
5 ৰাজ্যৰ নিৰ্বাচন সমাপ্ত হোৱাৰ পাচত আত্মবিশ্বাসী হৈ পৰিছিল কংগ্ৰেছ দল ৷ ৰাইজে কংগ্ৰেছৰ সপক্ষে ভোটদান কৰাটো দলটোৰ নেতৃত্বই নিশ্চিত বুলিয়েই ভাবিছিল ৷ অসমৰ কংগ্ৰেছ নেতা-কৰ্মীক দলটোৰ নিশ্চিত জয়ৰ সম্ভাৱনাই চুই গৈছিল ৷ সেয়েহে 5 ৰাজ্যৰ 4 খনৰ ভোটগণনাৰ আগদিনাই অসমৰ প্ৰতিখন জিলা সদৰৰ ৰাজীৱ ভৱনত বিজয়োৎসৱৰ প্ৰস্তুত প্ৰায় তুংগত উঠিছিল ৷
ভূপেন বৰাই শনিবাৰে কোৱা মতে প্ৰদেশ কংগ্ৰেছৰ প্ৰতিখন জিলা সমিতিয়েই ভূপেন বৰাই ফোনকল কৰি তেওঁৰ পৰা অনুমতি বিচাৰিছিল বিজয়োৎসৱ উদযাপনৰ বাবে ৷ কিন্তু ভূপেন বৰাই অনুমতি ল’ব নালাগে বুলি কৈছিল ৷ সংবাদ মাধ্যমৰ সন্মুখত সভাপতি বৰাই কয় যে চাৰি ৰাজ্যৰ ভোটগণনাৰ দিনটোত অৰ্থাৎ আজি প্ৰথম ৰাউণ্ডৰ গণনাৰ পাচতে অসমৰ জিলাই জিলাই বিজয় উৎসৱ আৰম্ভ হ’ব ৷ ভূপেন বৰা নিজেই গুৱাহাটীৰ ৰাজীৱ ভৱনত থাকি বিজয়ৰ আনন্দ উপভোগৰ কথা আছিল ৷ কিন্তু নহ’ল ৷ সেই আনন্দই লগ নিদিলে বৰাৰ লগতে দলৰ আন কৰ্মীসকলক ৷
কেৱল তেলেংগানাত জয়ী হোৱাৰ বিপৰীতে বাকী 3 ৰাজ্যত মুখ ঠেকেচা খোৱাৰ ফলত মৰিশালীসদৃশ নিস্তব্ধতা দেখা গ’ল ৰাজীৱ ভৱনত ৷ প্ৰদেশ কংগ্ৰেছৰ সভাপতি ভূপেন বৰাতো বাদেই, দলৰ আন কোনো চিনাকি চেহেৰা দেখা নগ’ল ৰাজীৱ ভৱনত ৷ ইফালে এই পৰাজয়ৰ পাচত মনৰ ভাৱ প্ৰকাশৰ পৰাও বিৰত আছে প্ৰদেশ কংগ্ৰেছৰ সভাপতি ভূপেন বৰা ৷ কেন্দ্ৰীয় নেতৃত্বই ক’বলৈ ক’লেহে কোৱাৰ সম্ভাৱনা আছে ৷
লগতে পঢ়ক : আজমলে সহায় কৰিলে নিৰ্বাচন নেখেলে ভূপেন বৰাই !
