গুৱাহাটী,১৪ অক্টোবৰ : সম্প্ৰতি অসম প্ৰদেশ বিজেপিৰ সভাপতি তথা প্ৰাক্তন মন্ত্ৰী ভৱেশ কলিতাৰ এখন বিশেষ ফটোৱে সামাজিক মাধ্যমত ব্যাপক প্ৰতিক্ৰিয়াৰ সৃষ্টি কৰিছে । ফটোখনত এখন চাৰ্টাৰ্ড বিমানৰ ভিতৰত দেখা গৈছে ৰাজ্যিক সভাপতিগৰাকীক । বিশেষ সূত্ৰৰ পৰা জানিব পৰা মতে গুৱাহাটীৰ পৰা শিলচৰলৈ এনেদৰে চাৰ্টাৰ্ড বিমানেৰে ৰাজ্যিক সভাপতিগৰাকীয়ে ভ্ৰমণ কৰাৰ মুহূৰ্তত তোলা হৈছে ফটোখন ।
যি সময়ত পেট্ৰ'ল-ডিজেলৰ মূল্যবৃদ্ধিকলৈ সমগ্ৰ ৰাজ্যত উত্তাল পৰিৱেশে বিৰাজ কৰিছে, তেনে সময়তে সভাপতিগৰাকীৰ এই ফটোখন সামাজিক মাধ্যমত আৰু বেছি ভাইৰেল হৈ পৰিছে । কিয়নো কিছুদিন পূৰ্বে ভৱেশ কলিতাই পেট্ৰ'ল-ডিজেলৰ মূল্যবৃদ্ধিক লৈ কৰা এক মন্তব্যই ব্যাপক প্ৰতিক্ৰিয়াৰ সৃষ্টি কৰিছিল । তেওঁ ৰাইজক আহ্বান জনাইছিল যাতে সাধাৰণ কামতে লোকসকলে বাহনখন ব্যৱহাৰ নকৰে । লগতে বাইকত তিনিগৰাকীক একেলগে যোৱাৰো আহ্বান জনাইছিল সভাপতিগৰাকীয়ে । যি মন্তব্যক লৈ ৰাজ্যৰ ভিন্ন প্ৰান্তত সভাপতিগৰাকীৰ বিৰুদ্ধে প্ৰতিবাদৰো সৃষ্টি হৈছিল ৷
কিন্তু সেই গৰাকী ভৱেশ কলিতাই এনেদৰে গুৱাহাটীৰ পৰা শিলচৰলৈ চাৰ্টাৰ্ড বিমানেৰে যোৱাক লৈ এতিয়া সৰ্বত্ৰে প্ৰতিক্ৰিয়াৰ সৃষ্টি হৈছে । বহুতে ফটোখন শ্বেয়াৰ কৰি বিজেপিৰ ৰাজ্যিক সভাপতিগৰাকীক তীব্ৰ ভাষাৰে সমালোচনাও কৰিছে । অৱশ্যে এই সম্পৰ্কত এতিয়ালৈ কোনো প্ৰতিক্ৰিয়া ব্যক্ত কৰা নাই ভৱেশ কলিতাই । ইফালে ফটোখনত প্ৰাক্তন বিধায়িকা আঙুৰলতা ডেকাকো দেখা গৈছে ।
লগতে পঢ়ক :অষ্টমীত ম'হৰ গাড়ী, নৱমীত ই ৰিক্সা : ভূপেন বৰাৰ পূজাৰ ৰাজনীতি
