গুৱাহাটী : ৰাজ্যৰ স্বাস্থ্যখণ্ডৰ বাবে এটা ভাল খবৰ । অসমত শীঘ্ৰে গঢ়ি উঠিব ৫০০খন বিচনাযুক্ত মেদাণ্ট দ্য মেডিচিটিৰ ছুপাৰস্পেচিয়েলিটি হাস্পতাল । ইয়াৰ বাবে এহাজাৰ কোটি টকা বিনিয়োগ কৰিব মেদাণ্ট দ্য মেডিচিটি গ্ৰুপে । এডভাণ্টেজ আছাম ২.০ত মেদাণ্ট দ্য মেডিচিটি গ্ৰুপে ইয়াৰ বাবে বুজাবুজিৰ চুক্তি কৰে ।
মেদাণ্ট দ্য মেডিচিটি গ্ৰুপৰ মুখ্য পৰিচালন সঞ্চালক তথা মেদাণ্ট দ্য মেডিচিটিৰ অধ্যক্ষ বিশিষ্ট চিকিৎসক ডাঃ নৰেশ ট্ৰিহানে (Dr Naresh Trehan) কয়, "আজি আমি অসম চৰকাৰৰ সৈতে বুজাবুজিৰ চুক্তি কৰিছো । মেদান্তৰ ফ্লেগশ্বীপ হাস্পতাল এখন গুৰগাঁৱত আছে, যিখন ১৪০০ বিচনাযুক্ত হাস্পতাল । য'ত ছুপাৰস্পেচিয়েলিটিৰ সকলো ব্যৱস্থা এটা স্থানতে আছে ।"
বিশিষ্ট চিকিৎসকগৰাকীয়ে লগতে কয়, "অসমৰ মুখ্যমন্ত্রী হিমন্ত বিশ্ব শৰ্মাই অসমতো এনেকুৱা এখন হাস্পতাল নিৰ্মাণ কৰাৰ বাবে কৈছিল । যাৰ ফলত অসম আৰু চুবুৰীয়া ৰাজ্যসমূহ উপকৃত হ'ব পাৰে । যাতে ছুপাৰস্পেচিয়েলিটি চিকিৎসাৰ বাবে কোনেও বাহিৰলৈ যাবলগীয়া নহয় । মুখ্যমন্ত্রীৰ আহ্বানৰ প্ৰতি লক্ষ্য ৰাখি আমি অসমত ৫০০ বিচনাযুক্ত ছুপাৰস্পেচিয়েলিটি হাস্পতাল নিৰ্মাণৰ বাবে বুজাবুজিৰ চুক্তি কৰিছো । যিখন হাস্পতালত সকলো স্পেচিয়েলিটি থাকিব । আন্তঃৰাষ্ট্ৰীয় মানৰ আন্তঃগাঁঠনি থাকিব । অত্যাধুনিক সকলো টেকন'লজী ইয়াত প্ৰযোজ্য কৰা হ'ব ।"
তেওঁ আৰু কয়, "আমাৰ প্ৰশিক্ষিত চিকিৎসকক ইয়াত নিযুক্ত কৰা হ'ব । যাতে উন্নত মানৰ চিকিৎসা সকলোৱে লাভ কৰিব পাৰে । আমি চিকিৎসা সেৱা যাতে ব্যয়বহুল নহয় তাৰ প্ৰতি লক্ষ্য ৰাখি সকলোৰে বাবে বহনযোগ্য চিকিৎসা সেৱা প্ৰদান কৰাৰ লক্ষ্য নিৰ্ধাৰণ কৰিছো । অসমৰ মুখ্যমন্ত্রীৰ উদ্যোগ দেখি আমি উৎসাহিত হৈছো । অসমৰ উপৰি চুবুৰীয়া ৰাজ্যৰ পৰা বহু ৰোগী আমাৰ হাস্পতাললৈ আহে । গতিকে ইয়াত আমাৰ হাস্পতাল হ'লে সকলোৰে সুবিধা হ'ব ।" উল্লেখ্য যে এডভাণ্টেজ আছামৰ আজি দ্বিতীয় দিনাও বহু উদ্যোগ প্ৰতিষ্ঠানে বিনিয়োগৰ বাবে বুজাবুজিৰ চুক্তি স্বাক্ষৰ কৰে ।
লগতে পঢ়ক: এডভাণ্টেজ আছাম ২.০ : বুজাবুজি চুক্তিৰ বাবে দেশী-বিদেশী বিনিয়োগকাৰীৰ দীঘলীয়া শাৰী !
