গুৱাহাটী, ২৩ জুন : ৰাজ্যত সম্প্ৰতি অব্যাহত আছে কৰ'ণাৰ (Corona) সংক্ৰমণ । যাৰ বাবে সমগ্ৰ ৰাজ্যতে সান্ধ্য আইন বলৱৎ হৈ আছে । কিন্তু ইয়াৰ মাজতে গুৱাহাটী মহানগৰীৰ মাজমজিয়াত এক নিৰুদ্দেশৰ ঘটনা সংঘটিত হৈছে ।
গুৱাহাটীৰ অভিজাত ব্যৱসায়িক প্ৰতিষ্ঠান শ্ব'হাম শ্বপিৰ (Sohum Shoppe) স্বত্বাধিকাৰী সন্দীপ জালান সন্ধানহীন (missing) হৈ আছে । মঙলবাৰে সন্ধিয়াৰে পৰা নিখোজ হৈ আছে শ্ব'হাম শ্বপিৰ স্বত্বাধিকাৰী সন্দীপ জালান । জানিব পৰা মতে মঙলবাৰে সন্ধিয়া প্ৰায় ৭ বজাত খোজকাঢ়িবৰ বাবে ওলাই গৈছিল সন্দীপ জালান আৰু তেতিয়াৰে পৰাই এইপৰ্যন্ত তেওঁৰ কোনো সন্ধান নাই ।
চাইকেল চলাই এখন হোটেললৈ অহা সন্দীপ জালানে হোটেলৰ পৰা ওলাই পুনৰ শ্ব'হাম শ্বপিলৈ গৈছিল বুলি জানিব পৰা গৈছে । তাৰ পৰা এটা বেগত কাপোৰ ভৰাই তেওঁ ওলাই আহিছিল । আনহাতে ম'বাইল ট্ৰেক (mobile track) অনুসৰি তেওঁৰ শেহতীয়া অৱস্থিতি ছয়গাঁৱত পোৱা গৈছিল । কিন্তু এতিয়াও তেওঁৰ সন্দৰ্ভত পৰিয়ালৰ লোকে বিশেষ কোনো তথ্য প্ৰকাশ কৰা নাই ।
ইতিমধ্যে ব্যৱসায়ীজনৰ সন্ধানত অসম আৰক্ষীয়ে (Assam Police) অভিযান অব্যাহত ৰাখিছে । সান্ধ্য আইনৰ মাজতে এনেদৰে গুৱাহাটীৰ মাজমজিয়াৰ এগৰাকী ব্যৱসায়ী নিৰুদ্দেশ হোৱাত চাঞ্চল্যৰ সৃষ্টি কৰিছে । বহুতে এয়া অপহৰণৰ ঘটনা বুলি সন্দেহ কৰিছে যদিও এতিয়ালৈ আৰক্ষীৰ তৰফৰ পৰা কোনো ধৰণৰ স্পষ্ট তথ্য অহা নাই ।
ইফালে হঠাৎ এগৰাকী সুস্থ সবল লোক এনেদৰে নিৰুদ্দেশ হোৱাৰ লগে লগে পৰিয়ালৰ লোকৰ মাজতো হাহাকাৰ পৰিৱেশৰ সৃষ্টি হৈছে । অৱশ্যে এগৰাকী প্ৰতিষ্ঠিত ব্যৱসায়ী এনেদৰে নিৰুদ্দেশ হোৱা ঘটনাত বিভিন্নজনে ৰহস্যৰ গোন্ধ পাইছে । অৱশ্যে আৰক্ষীৰ সঠিক তদন্তৰ পিছতহে সকলো তথ্য পোহৰলৈ আহিব । জানিব পৰা অসম আৰক্ষীৰ শীৰ্ষ বিষয়াৰ নেতৃত্বত ইতিমধ্যে বিভিন্ন স্থানত চলিছে অভিযান ।
লগতে পঢ়ক: খালী আসন তিনিখন কিন্তু উপ-নিৰ্বাচন পাঁচটা সমষ্টিত, কিয় ?
