গুৱাহাটী, ২৮ জুন : চলিত বৰ্ষৰ ভিতৰতে এক লাখ নতুন পদত নিযুক্তি দিয়া হ’ব বুলি দিছপুৰত অধিষ্ঠিত নতুন চৰকাৰখনে ঘোষণা কৰিছিল । চৰকাৰ গঠন কৰিয়েই এই এক লাখ নিযুক্তি প্ৰক্ৰিয়া সম্পূৰ্ণ কৰাৰ লক্ষ্যৰে মুখ্যমন্ত্ৰী ড৹ হিমন্তবিশ্ব শৰ্মাই বিত্তমন্ত্ৰী অজন্তা নেওগৰ অধ্যক্ষতাত গঠন কৰি দিছিল এখন উচ্চস্তৰীয় সমিতি । সোমবাৰে জনতা ভৱনৰ বিত্ত বিভাগৰ সভাকক্ষত বিত্তমন্ত্ৰী গৰাকীৰ অধ্যক্ষতাত প্ৰশাসনৰ সকলো শীৰ্ষ বিষয়াৰ উপস্থিতিত এক লাখ নিযুক্তি সম্পৰ্কীয় উচ্চস্তৰীয় সমিতিৰ দ্বিতীয়খন বৈঠক অনুষ্ঠিত হয় ।
বৈঠকত বিভিন্ন বিভাগসমূহে নিজৰ নিজৰ খালী পদৰ সংখ্যা অৱগত কৰাৰ লগতে নতুন পদ সৃষ্টিৰ বাবেও বিত্তমন্ত্ৰীক অনুৰোধ জনায় । এই উচ্চস্তৰীয় বৈঠকখনত গৃহ বিভাগ, শিক্ষা বিভাগ আৰু স্বাস্থ্য বিভাগত নিযুক্তিৰ ক্ষেত্ৰত অগ্ৰাধিকাৰ প্ৰদান কৰা হ’ব বুলি বিত্তমন্ত্ৰীয়ে জানিবলৈ দিয়ে । নৱ-গঠিত জিলা কেইখনৰ ক্ষেত্ৰটো নতুন পদ সৃষ্টি আৰু ৰাইজৰ সেৱাৰ বাবে প্ৰয়োজনীয় তৃতীয় আৰু চতুৰ্থ বৰ্গৰ পদৰ নিযুক্তিত অগ্ৰাধিকাৰ দিয়াৰ পোষকতা কৰে বিত্তমন্ত্ৰী নেওগে ।
বিভাগসমূহৰ শীৰ্ষ বিষয়াসকলৰ লগত হোৱা আলোচনা মৰ্মে প্ৰায় ৮০ হাজাৰ খালী পদত নিযুক্তি প্ৰদান কৰিব পৰা যাব বুলি নিশ্চিত হয় উচ্চস্তৰীয় সমিতি । ইয়াৰ লগতে আৰু বহুতো নতুন পদ বিভিন্ন বিভাগত প্ৰয়োজন সাপেক্ষে সৃষ্টি কৰিব পৰা যাব বুলিও ধাৰণা কৰা হৈছে ।
এই পূৰণ কৰিবলগীয়া খালী পদৰ হিচাপ আৰু নতুনকৈ সৃষ্টি কৰিবলগীয়া পদসমূহৰ হিচাপ বিভাগসমূহক অহা ৪ দিনৰ ভিতৰত বিত্ত বিভাগত জমা দিবলৈ বিত্তমন্ত্ৰী অজন্তা নেওগে নিৰ্দেশ দিয়ে । এক লাখ পদ পূৰণৰ বাবে বিভাগসমূহে প্ৰতিবেদন বিত্ত বিভাগত দাখিল কৰাৰ পাছত উক্ত বিষয়টো মুখ্যমন্ত্ৰীক অৱগত কৰা হ’ব আৰু নিযুক্তি প্ৰক্ৰিয়াৰ বাবে উপযুক্ত সিদ্ধান্ত লোৱা হ’ব বুলি মন্ত্ৰীগৰাকীয়ে অৱগত কৰে । গোটেই বিষয়টো পৰ্যালোচনা কৰি বিত্তমন্ত্ৰীয়ে নিযুক্তি প্ৰক্ৰিয়াৰ প্ৰাৰম্ভিক কাম-কাজৰ ক্ষীপ্ৰ ৰূপায়নৰ বাবে মুখ্য সচিবৰ তত্বাৱধানত এখন ক’ৰ কমিটি গঠন কৰি দিয়ে ।
বৈঠকত মন্ত্ৰী অজন্তা নেওগে গোটেই নিযুক্তি প্ৰক্ৰিয়াটোত জড়িত সকলোৱে নিষ্ঠা সহকাৰে তথা নিকা আৰু স্বচ্ছভাৱে সম্পন্ন কৰি চৰকাৰৰ সততাৰ পৰিচয় দিব লাগিব বুলিও বিষয়াসকলৰ উদ্দেশ্যে মন্তব্য প্ৰকাশ কৰে । এই বৈঠকখনত ৰাজ্যৰ মুখ্য সচিব জিষ্ণু বৰুৱাকে প্ৰমুখ্য কৰি ৰাজ্য চৰকাৰৰ প্ৰতিটো বিভাগৰ শীৰ্ষ বিষয়াসকল উপস্থিত থাকে । চৰকাৰৰ এই সিদ্ধান্তই স্বাভাৱিকতেই নতুন আশা জগাইছে ৰাজ্যৰ শিক্ষিত নিবনুৱা সকলৰ মনত ৷
লগতে পঢ়ক : যোৰহাট বিজ্ঞান আৰু প্ৰযুক্তিবিদ্যা প্ৰতিষ্ঠানৰ তিনি কৰ্মচাৰীক বৰ্খাস্ত
