গুৱাহাটী, 3 জুন: ৰাজ্য়ৰ উচ্চ শিক্ষাত এতিয়াৰে পৰা কাৰ্যকৰী হ’ব ৰাষ্ট্ৰীয় শিক্ষা নীতি 2020 (NEP 2020) ৷ গুৱাহাটী বিশ্ববিদ্যালয় (Gauhati University) আৰু ৰাজ্য চৰকাৰৰ উচ্চ শিক্ষা বিভাগৰ যুটীয়া উদ্যোগত গুৱাহাটী বিশ্ববিদ্যালয়ৰ চৌহদত শনিবাৰে এই নীতিৰ শুভাৰম্ভ কৰে মুখ্যমন্ত্ৰী হিমন্ত বিশ্ব শৰ্মাই ৷
অনুষ্ঠানত ভাষণ প্ৰসংগত মুখ্যমন্ত্ৰী ড৹ শৰ্মাই (CM Himanta Biswa Sarma) কয়, ‘‘আজিৰ দিনটো অসমৰ শিক্ষা জগতৰ বাবে ঐতিহাসিক মুহূৰ্ত । আজিৰ অসমৰ শিক্ষাৰ বাবে দিনটো মাইলৰ খুঁটি হিচাবে পৰিগণিত হ’ব । আজিৰ দিনটো স্মৰণীয় হৈ থাকিব । নৱপ্ৰজন্মক গৱেষণাৰ প্ৰতি আকৃষ্ট কৰিব লাগিব । এই শিক্ষা নীতি পূৰ্বৰ শিক্ষানীতিসমূহতকৈ পৃথক । এই নতুন শিক্ষা নীতিয়ে ছাত্ৰ-ছাত্ৰীৰ বাবে শিক্ষাৰ বহুমুখী দিশ সাঙুৰি লৈছে । শিক্ষাৰ্থী এজনে যিকোনো শাখাত পঢ়িব পাৰে ।’’
মুখ্যমন্ত্ৰীয়ে লগতে কয় যে চৰকাৰে কলেজবোৰত সকলো শাখা আৰম্ভ কৰাত গুৰুত্ব দিব । এই নীতিৰ লক্ষ্য হৈছে নতুন ভাৰত গঢ়ি তোলা । শিক্ষাৰ উদেশ্য উদাৰপন্থী দৃষ্টিভংগী মানৱ সৃষ্টি কৰা লক্ষ্য হ’ব লাগে । মুখ্যমন্ত্ৰীয়ে লগতে কয় যে মহাবিদ্যালয়ত স্নাতক ডিগ্ৰী চাৰিবছীয়া কৰাৰ বাবে বিধানসভাত আইন গ্ৰহণ কৰা হ’ব । অসমৰ সকলো মহাবিদ্যালয়ত স্নাতক ডিগ্ৰী চাৰিবছীয়া পাঠ্যক্ৰম অহা বছৰৰ পৰা আৰম্ভ কৰিব লাগিব । বিশ্ববিদ্যালয় আইন সংশোধনৰ ব্যৱস্থা কৰা হ’ব (NEP 2020 implemented in Assam) ।
কলেজসমূহে মানৱ সম্পদ গঢ়াৰ ক্ষেত্ৰত গুৰুত্ব দিব লাগিব বুলি উল্লেখ কৰি মুখ্যমন্ত্ৰীগৰাকীয়ে সদৰী কৰে যে এই শিক্ষা নীতি অনুসৰি শিক্ষাৰ্থী এজনে কলেজত ডিগ্ৰীৰ তৃতীয় বছৰত শিক্ষা আধাতে এৰি যাব পাৰিব । পুনৰ তিনিবছৰ পিচত উভতি আহি বাকী এবছৰৰ পাঠ্যক্ৰম সম্পূৰ্ণ কৰিব পাৰিব (4 years degree course) ।
