গুৱাহাটী, ১৩ নৱেম্বৰ : ৰাজ্য চৰকাৰে ২৭ নৱেম্বৰৰ ভিতৰত এশ শতাংশ যোগ্য লোকক কমেও এপালিকৈ ক'ভিড প্ৰতিষেধক প্ৰদান কৰাৰ লক্ষ্য নিৰ্ধাৰণ কৰিছে ৷ ইফালে ক'ভিড-19 (Covid 19) ত মৃত্যু হোৱা লোকৰ ভিতৰত ভেকচিন নোলোৱা লোকৰ হাৰ বেছি ৷ কিন্তু এনে এক পৰিস্থিতিৰ মাজতো দ্বিতীয় পালি ভেকচিন নোলোৱা লোকৰ সংখ্যা ক্ৰমাৎ বৃদ্ধি পাব ধৰিছে ৷
কৰ’ণাৰ প্ৰথম পালি ভেকচিন লোৱাৰ পাছত নিৰ্দিষ্ট সময়ৰ ভিতৰত দ্বিতীয় পালি ভেকচিন নোলোৱা লোকৰ সংখ্যা ৰাজ্যখনত দ্ৰুতগতিত বৃদ্ধি পাবলৈ ধৰিছে ৷ বৰ্তমান সময়ত ৰাজ্যখনত ৮ লক্ষাধিক এনে লোক চিনাক্ত হৈছে, যি সময় উকলি যোৱাৰ পাছতো আজিলৈকে দ্বিতীয় পালি ভেকচিন গ্ৰহণ কৰা নাই ৷ যাক লৈ এতিয়া উদ্বিগ্ন হৈ পৰিছে ৰাজ্যৰ স্বাস্থ্য বিভাগ ৷
স্বাস্থ্য বিভাগৰ এক শীর্ষ সূত্ৰই জনোৱা মতে, প্ৰথম পালি ভেকচিন লোৱাৰ সময়ত সকলো লোকৰে ম’বাইল নম্বৰ লোৱা হৈছিল ৷ সেই অনুসৰি এতিয়া স্বাস্থ্য বিভাগে(Health Department assam) সময় উকলি যোৱা লোকসকলক শীঘ্ৰে দ্বিতীয় পালি ভেকচিন লোৱাৰ বাবে বার্তা প্ৰেৰণ কৰিছে ৷ যদিও ইয়াৰ পৰা কোনো লাভ হোৱা নাই ৷
আনকি বহুসংখ্যক লোকে প্ৰথম পালি ভেকচিন লোৱাৰ সময়ত আনৰ ম'বাইল নম্বৰ বা ভুল ম’বাইল নম্বৰো প্ৰদান কৰিছিল ৷ যাৰ বাবে এতিয়া উক্ত লোকসকলক চিনাক্ত কৰাৰ ক্ষেত্ৰতো সমস্যাৰ সৃষ্টি হৈছে ৷ জানিব পৰা মতে, ৰাজ্যখনত এনে প্ৰায় ১.৫০ লাখ লোক আছে, যি প্ৰথম পালি ক'ভেক্সিন(Covaxin) ভেকচিন লোৱাৰ পাছত দ্বিতীয় পালি ভেকচিন নিৰ্দিষ্ট সময়সীমা পাৰ হৈ যোৱাৰ পাছতো আজিলৈকে লোৱা নাই ৷
নিয়ম অনুসৰি প্ৰথম পালি ক'ভেক্সিন(Covaxin) ভেকচিন লোৱাৰ ২৪-৪২ দিনৰ ভিতৰত দ্বিতীয় পালি ভেকচিন ল'ব লাগে ৷ আনহাতে, প্ৰথম পালি ক’ভিশ্বিল্ড(covishield) ভেকচিন লোৱাৰ পাছত নিৰ্দিষ্ট সময় উকলি যোৱাৰ পাছতো ৰাজ্যৰ ৬.৫০ লাখ লোকে দ্বিতীয় পালি ভেকচিন গ্ৰহণ কৰা নাই ৷ প্ৰথম পালি ক’ভিশ্বিল্ড(covishield) ভেকচিন লোৱাৰ পাছত দ্বিতীয় পালি ল’ব লাগে ৮৪-১১২ দিনৰ ভিতৰত ৷
মন কৰিবলগীয়া কথা যে, বিশেষজ্ঞসকলে কৰ'ণাৰ তৃতীয়টো ঢৌ আহিব পাৰে বুলি শংকা ব্যক্ত কৰাৰ পাছতে ৰাজ্য আৰু কেন্দ্ৰীয় চৰকাৰে ভেকচিন প্ৰদানৰ কাম ক্ষীপ্ৰ কৰি তুলিছে ৷ সেই অনুসৰি এতিয়ালৈকে ৰাজ্যখনত ২,০৪,১৮,৬৬০ গৰাকী লোকে প্ৰথম পালি ভেকচিন গ্ৰহণ কৰাৰ বিপৰীতে ৯৪,৬৬,৩৭৭ গৰাকী লোকে দ্বিতীয় পালি ভেকচিন গ্ৰহণ কৰিছে ৷
ৰাজ্যত বৰ্তমান অব্যাহত আছে মেগা টীকাকৰণ অভিযান(Covid 19 Mega vaccination drive) ৷ কিন্তু এনে পৰিস্থিতিৰ মাজতে প্ৰথম পালি ভেকচিন লোৱা বৃহৎ সংখ্যক লোকে নিৰ্দিষ্ট সময় উকলি যোৱাৰ পাছতো দ্বিতীয় পালি ভেকচিন নোলোৱা কথাইহে এতিয়া সকলোকে উদ্বিগ্ন কৰি তুলিছে ৷ ইফালে অন্ধবিশ্বাস, উৰা বাতৰি আৰু ভ্ৰান্ত ধাৰণাৰ বাবে বহুলোকে এতিয়াও ভেকচিন লোৱাৰ পৰা বিৰত আছে ৷ সেই লোকসকলকো ভেকচিন লোৱাৰ বাবে ৰাজ্য চৰকাৰে আহ্বান জনাইছে ৷
লগতে চাওক: Robbery attempt foiled: হস্তনিৰ্মিত পিষ্টল সহ পাঁচজনীয়া ডকাইতৰ দল আটক
