গুৱাহাটী, ২জুলাই : ২০১৩ বৰ্ষৰ লোকসেৱা আয়োগৰ পৰীক্ষাত সেই সময়ৰ অধ্যক্ষ কুখ্যাত ৰাকেশ পাল এণ্ড কোম্পানীক লাখে লাখে টকা দি চাকৰি কিনা সকলৰ বিপদ চমু চাপি আহিছে । 2016 চনত ৰাজ্যৰ মুখ্যমন্ত্ৰী হিচাপে দায়িত্ব লৈয়েই সৰ্বানন্দ সোণোৱালে লোকসেৱা আয়োগৰ নিযুক্তি কেলেংকাৰীৰ তদন্তৰ নিৰ্দেশ দিছিল আৰু সেই তদন্তৰ ভিত্তিতেই কুখ্যাত ৰাকেশ পালৰ পৰা চাকৰি কিনা ৩৯ জনকৈ এ চি এছ, এ পি এছ আৰু সংযুক্ত সেৱাৰ বিষয়া জালত পৰিছিল ।
পৰৱৰ্তী সময়ত সেই ৩৯ বিষয়াক চাকৰিৰ পৰা বৰ্খাস্ত কৰিছিল চৰকাৰে । সেয়া আছিল উক্ত কেলেংকাৰীৰ তদন্তৰ প্ৰথম অধ্যায় । এতিয়া আৰম্ভ হৈছে দ্বিতীয় অধ্যায় । কিয়নো ৰাকেশ পালক লাখে লাখে টকা দি যে কেৱল সেই ৩৯ বিষয়াইহে চাকৰি কিনিছিল তেনে নহয় । সেই সময়ত জালত নপৰাকৈ সাৰি গৈছিল আৰু কেইবাজনো বিষয়া ।
এতিয়া ন্যায়াধীশ বিপ্লৱ শৰ্মাৰ তদন্ত আয়োগে বিপদ ঘন্টা বজাইছে এতিয়াও কৰ্মৰত হৈ থকা এইসকল বিষয়াৰ । ২০১৩ বৰ্ষত পিছ দুৱাৰেদি চাকৰি লোৱা ১৯ গৰাকী এ চি এছ(ACS), এ পি এছ(APS) আৰু সংযুক্ত সেৱাৰ বিষয়াক ইতিমধ্যে চমন জাৰি কৰিছে ন্যায়াধীশ শৰ্মা আয়োগে ।
আনহাতে, শুকুৰবাৰে আয়োগৰ এক সূত্ৰই ইটিভি ভাৰতৰ আগত প্ৰকাশ কৰে যে ২০১৩ বৰ্ষত চাকৰি লাভ কৰা সন্দেহজনক এইসকল বিষয়াৰ মৌখিক পৰীক্ষাৰ সবিশেষ তথ্য লোকসেৱা আয়োগৰ পৰা বিচাৰিছে ন্যায়াধীশ শৰ্মা আয়োগে । মনকৰিবলগীয়া যে, ইতিমধ্যে এই ১৯ গৰাকী কৰ্মৰত বিষয়াৰ পৰীক্ষাৰ উত্তৰ বহী আৰু টেবুলেশ্বন শ্বীটৰ মাজত থকা বিসংগতি স্পষ্ট হৈ পৰিছে । এতিয়া বাকী ৰৈছে কেৱল সেইসকল বিষয়াৰ মৌখিক পৰীক্ষাৰ তথ্য । সেই তথ্য শীঘ্ৰেই লোকসেৱা আয়োগক দাখিল কৰিবলৈ কৈছে ন্যায়াধীশ শৰ্মা আয়োগে ।
ইপিনে একেটা সূত্ৰই এই বুলিও প্ৰকাশ কৰে যে ২০১৩ বৰ্ষত চাকৰি লাভ কৰা আৰু ১৭ গৰাকী প্ৰাৰ্থীৰ পৰীক্ষাৰ উত্তৰ বহী সম্প্ৰতি ফৰেনচিক পৰীক্ষাগাৰত আছে । দুই এদিনৰ ভিতৰতে শৰ্মা আয়োগৰ হাতত পৰিব ফৰেনচিকৰ প্ৰতিবেদন । সেই প্ৰতিবেদনৰ পিছত আৰু একাংশ এ চি এছ, এ পি এছ আৰু সংযুক্ত সেৱাৰ বিষয়া জালত পৰাৰ পূৰ্ণ সম্ভাৱনা আছে ।
লগতে পঢ়ক : ৰাষ্ট্ৰপতিক সাক্ষাৎ মুখ্যমন্ত্ৰী ড৹ হিমন্ত বিশ্ব শৰ্মাৰ
