গুৱাহাটী,11 অক্টোবৰ : ভাৰতবৰ্ষৰ দৰে দেশৰ ক্ষেত্ৰত জনসংখ্যাৰ বিস্ফোৰণ এক ভয়ংকৰ সমস্যা । এই সমস্যা সমাধানৰ বাবে আমাৰ মনবোৰ ৰাষ্ট্ৰ-চিন্তাৰে সমৃদ্ধ হ’ব লাগিব। এই মন্তব্য ৰাষ্ট্ৰীয় স্বয়ং সেৱক সংঘৰ কেন্দ্ৰীয় কাৰ্যনিৰ্বাহক ইন্দ্ৰেশ কুমাৰৰ । শনিবাৰে জনসংখ্যা সমাধান ফাউণ্ডেশ্যন নামৰ সংস্থাটোৰ দ্বাৰা আয়োজিত এক ৱেবনাৰত অংশগ্ৰহণ কৰি আৰএছএছৰ নেতা গৰাকীয়ে জনসংখ্যাৰ বৃদ্ধিৰ দৰে জটিল বিষয়সমূহৰ সমাধানৰ বাবে মানুহৰ মন-প্ৰাণ ৰাষ্ট্ৰ-চিন্তাৰ দ্বাৰা উৎভাসিত হোৱাতো প্ৰয়োজনীয় ।
আনহাতে,ৱেবনাৰৰ পাচত অনুষ্ঠিত এক আলোচনা সভাত ফাউণ্ডেশ্যনৰ অসম প্ৰান্তৰৰ অধ্যক্ষ শিৱ প্ৰসাদ শৰ্মাই জনসংখ্যাৰ বৃদ্ধি এটা বিশেষ জনগোষ্ঠীৰ মাজত কঠোৰ আইনৰ প্ৰয়োজন বুলি মন্তব্য আগবঢ়ায় । ফাউণ্ডেশ্যনৰ উত্তৰ-পূৰ্বাঞ্চলৰ অধ্যক্ষৰ দায়িত্বত থকা শৈলেন পাণ্ডেই আঁতধৰা অনুষ্ঠানটোত বিশিষ্ট সমাজ সেৱক ব্ৰহ্মজী ৰাও,ডাঃ শুভজিত চৌধুৰী,লেখক-সাংবাদিক ৰঞ্জীব কুমাৰ শৰ্মা,নয়নজোতি ভূঞা,অমল গোস্বামী,আৰ্যনীল কাশ্যপ,লাকী গগৈ প্ৰমুখ্যে কেইবাগৰাকীও বক্তাই জনসংখ্যাৰ নিয়ন্ত্ৰণৰ বাবে কঠোৰ আইনৰ পোষকতা কৰে । ইয়াৰ বাবে চৰকাৰৰ ওপৰত হেঁচা দিয়াৰ প্ৰসংগও উত্থাপিত হয় ।
উল্লেখ্য যে, জনসংখ্যা সমাধান ফাউণ্ডেশ্যন সংস্থাটোৱে দেশৰ প্ৰায় প্ৰতিটো প্ৰান্ততে জনসংখ্যা বিস্ফোৰণৰ বিপৰীতে জনতাক সজাগ কৰা আৰু যথোচিত আইন প্ৰণয়ন কৰাৰ বাবে অভিযান চলাই আহিছে ।
লগতে পঢ়ক: মৰিগাঁৱত খেল পথাৰ নিৰ্মাণৰ নামতো ব্যাপক দুৰ্নীতি !
