গুৱাহাটী, ২০ ছেপ্টেম্বৰ: বৃহৎ লোকচানৰ সন্মুখীন হৈছে নামৰূপ সাৰ কাৰখানা (Namrup Fertilizer Factory facing huge losses)। সেয়েহে লোকচানৰ দোহাই দি কেন্দ্ৰীয় চৰকাৰে উত্তৰ-পূবৰ একমাত্ৰ সাৰ কাৰখানাটো বিক্ৰী কৰিবৰ বাবে উঠি পৰি লাগিছে । কেন্দ্ৰীয় সাৰ আৰু ৰসায়ন মন্ত্ৰালয়ৰ সূত্ৰই প্ৰকাশ কৰা মতে, বিগত তিনিটা বিত্তীয় বৰ্ষত সাৰ কাৰখানাটোৰ লোকচান হয় মুঠ ৩৩০.৬ কোটি টকা ৷
সেয়েহে কেন্দ্ৰীয় চৰকাৰখনে নিৰ্বিনিয়োজন নীতিৰ আধাৰত নামৰূপ সাৰ কাৰখানা অর্থাৎ ব্ৰহ্মপুত্ৰ ভেলি ফাৰ্টিলাইজাৰ কৰ্প'ৰেশ্যন লিমিটেডৰ অংশ (শ্বেয়াৰ) বিক্ৰী কৰাৰ পদক্ষেপ গ্ৰহণ কৰিছে । এসময়ত লাভজনক সাৰ কাৰখানা হিচাপে বিবেচিত নামৰূপ সাৰ কাৰখানাৰ লোকচানৰ পৰিমাণ প্ৰতি বছৰে বৃদ্ধি পাবলৈ ধৰিছে ।
তথ্য অনুসৰি, সাৰ কাৰখানাটো ২০১৮-১৯ বিত্তীয় বৰ্ষত ৬৩.১৫ কোটি টকা, ২০১৯-২০ বিত্তীয় বৰ্ষত ১২৯.৭০ কোটি আৰু ২০২০-২১ বিত্তীয় বৰ্ষত ১৩৭.৭৫ কোটি টকা লোকচানৰ সন্মুখীন হয় । এনে পৰিস্থিতিত কেন্দ্ৰীয় চৰকাৰে সাৰ কাৰখানাটোত নতুনকৈ ধন বিনিয়োগ কৰিবলৈ ইচ্ছা প্ৰকাশ কৰা নাই । বিপৰীতে নামৰূপ সাৰ কাৰখানাৰ লগতে দেশৰ মুঠ আঠটা সাৰ কাৰখানাৰ অংশ বিক্ৰী কৰিবৰ বাবে সিদ্ধান্ত লৈছে (Centre move to sell Namrup fertilizer plant) ।
প্ৰণিধানযোগ্য যে নামৰূপ সাৰ কাৰখানাই প্ৰথম আৰু দ্বিতীয় গোটটো বন্ধ হৈ যোৱাত আওপুৰণি তৃতীয় গোটটোৰেই সাৰ উৎপাদন কৰি কৃষকৰ চাহিদা পূৰ্ণ কৰি আহিছে । তেনেস্থলত সাৰ কাৰখানাটোৰ চতুৰ্থ গোটটো স্থাপন কৰাটো নিতান্তই প্ৰয়োজন আছিল । কাৰখানাটোৰ শ্ৰমিক কৰ্মচাৰীসকলে দীর্ঘদিন এই দাবী জনাই অহাৰ পাছত ২০০৬ চনত সেই সময়ৰ সাৰ মন্ত্ৰী ৰামবিলাস পাছোৱানে নামৰূপত উপস্থিত হৈ সাৰ কাৰখানাৰ চতুৰ্থ গোট নিৰ্মাণ কৰা হ'ব বুলি প্ৰতিশ্ৰুতি দিছিল ।
কিন্তু সেই প্ৰতিশ্ৰুতি আজিও প্ৰতিশ্ৰুতি হৈয়ে থাকিল । ইফালে প্ৰধানমন্ত্ৰী হিচাপে দায়িত্বভাৰ লৈয়েই নৰেন্দ্ৰ মোদীয়ে নামৰূপ সাৰ কাৰখানাটোৰ নতুন গোট স্থাপনৰ বাবে কেবিনেটত সিদ্ধান্ত লৈছিল । কিন্তু আশ্চর্যজনকভাৱে আজিও কেবিনেটৰ সেই সিদ্ধান্ত কার্যকৰী নহ'ল । সাৰ কাৰখানাটোৰ তৃতীয়টো গোটো বন্ধ হোৱাৰ উপক্ৰম হোৱাত শেহতীয়াকৈ কেন্দ্ৰীয় চৰকাৰে মেৰামতিৰ বাবে ১০০ কোটি টকাৰ অনুদান আগবঢ়াইছিল ।
কিন্তু মাত্ৰ ১০০ কোটি টকাৰে সাৰ উদ্যোগটো জীয়াই ৰখা সম্ভৱপৰ নহয় । এনে পৰিস্থিতিত কেন্দ্ৰীয় চৰকাৰে সাৰ কাৰখানাটোৰ চতুৰ্থটো গোট স্থাপন কৰাৰ ক্ষেত্ৰত কোনো ধৰণৰ পদক্ষেপ হাতত নলৈ কাৰখানাটো বিক্ৰী কৰিবলৈ ওলোৱা কাৰ্যই সকলোকে হতাশ কৰি তুলিছে । কিয়নো নামৰূপ সাৰ কাৰখানাটো উত্তৰ-পূবৰ একমাত্ৰ সাৰ কাৰখানা ।
এই কাৰখানাটোত উৎপাদিত সাৰে উত্তৰ-পূবৰ জনসাধাৰণক যথেষ্ট উপকৃত কৰি আহিছে । আজিও নতুন যন্ত্ৰপাতি ব্যৱহাৰ কৰি সঠিকভাৱে পৰিচালনা কৰিলে লাভৰ মুখ দেখিব কাৰখানাটোৱে । কিন্তু তাকে নকৰি কেন্দ্ৰীয় চৰকাৰে লোকচানৰ দোহাই দি কাৰখানাটোৰ অংশ বিক্ৰী কৰিবলৈ ওলাইছে । কেন্দ্ৰৰ এনে সিদ্ধান্তই পুঁজিপতিকহে যে লাভৱান কৰিব সেইটো নিশ্চিত ।
লগতে পঢ়ক: ONGCs Gas Sale Agreements: অ'এনজিচি ত্ৰিপুৰা-এজিচিএল গেছ বিক্ৰী চুক্তি
