গুৱাহাটী , ১৭অক্টোবৰ : প্ৰেম অন্ধ বুলি কোৱা হয় । পিছে পৰকীয়া প্ৰেমৰ বাবেই এতিয়া সংসাৰত আউল লাগিছে এজন আইনৰ ৰক্ষকৰ । এই ঘটনা সংঘটিত হৈছে মহানগৰীৰ সাতগাঁও আৰক্ষী থানাৰ অন্তৰ্গত পাঞ্জাবাৰীত । জানিব পৰা মতে, পাঞ্জাবাৰীৰ অমূল্য নগৰৰ নিবাসী পেছাত গুৱাহাটী উচ্চ ন্যায়ালয়ৰ এজন অধিবক্তা গৌতম ফুকনে ২০০৪ চনত জুৰি শৰ্মা ফুকন নামৰ এগৰাকী যুৱতীৰ সৈতে সামাজিকভাৱে বিবাহপাশত আবদ্ধ হৈছিল । বিয়াৰ পিছত দুয়োৰে সংসাৰ নিয়াৰিকৈ চলি আছিল ।
কিন্তু অভিযোগ অনুসৰি, ২০১৯ চনত অধিবক্তা গৌতম ফুকনে এগৰাকী সতীৰ্থ কণিষ্ঠ অধিবক্তাৰ সৈতে প্ৰেমৰ সম্পৰ্ক গঢ়ি তোলাৰ কথা জানিব পাৰি পত্নীয়ে স্বামীৰ এই কাৰ্যৰ তীব্ৰ বিৰোধিতা কৰে । ইয়াকে লৈ দুয়োৰে মাজত আৰম্ভ হয় সংঘাত । পত্নী জুৰি শৰ্মা ফুকনে সংবাদ মাধ্যমৰ আগত অভিযোগ কৰা অনুসৰি, তেওঁক স্বামী গৌতম ফুকনে বুজা বুজিৰ মাজেৰে বিবাহ বিচ্ছেদৰ বাবে সৈমান কৰিবলৈ চেষ্টা কৰিছিল । কিন্তু পত্নীয়ে এই কথাত অমান্তি হোৱাত স্বামীয়ে তেওঁৰ ওপৰত দীৰ্ঘদিন ধৰি শাৰীৰিক-মানসিক নিৰ্যাতন চলাই অহাৰ অভিযোগ তোলে ।
দেওবাৰে পুৱাৰ ভাগতো গৌতম ফুকনে পত্নীক মাৰপিত কৰাৰ লগতে পাঞ্জাবাৰীস্থিত ঘৰটোৰ ভিতৰত পত্নীক আবদ্ধ কৰি ৰাখি বাহিৰৰ পৰা তলা মাৰি ওলাই যায় । বহু সময় ধৰি ঘৰৰ ভিতৰতে আবদ্ধ হৈ থকা ভুক্তভোগী জুৰি শৰ্মা ফুকনে কিবা প্ৰকাৰে নিজৰ ফোনটো উলিয়াই স্থানীয় সাতগাওঁ আৰক্ষীৰ লগত যোগাযোগ কৰে । কিছুসময়ৰ পিছত আৰক্ষীৰ লোক ঘটনাস্থলীত উপস্থিত হৈ ভুক্তভোগী মহিলাগৰাকীক উদ্ধাৰ কৰিবলৈ সক্ষম হয় ।
তাৰ পিছত আৰক্ষীয়ে ফোন কৰি মহিলাগৰাকীৰ স্বামীক ঘৰত উপস্থিত হবলৈ নিৰ্দেশ দিয়ে । আৰক্ষীৰ নিৰ্দেশ লাভ কৰি স্বামী গৌতম ফুকন নিজৰ ঘৰত আহি উপস্থিত হয় । আৰক্ষীয়ে স্বামী-স্ত্ৰী দুয়োজনকে একেলগে বহুৱাই সমস্যাটো সমাধানৰ চেষ্টা চলাই যদিও স্বামী গৌতমে কোনো কাৰণতে পত্নী জুৰি শৰ্মা ফুকনক পুনৰ আঁকোৱালি লোৱা নহ’ব বুলি স্পষ্ট কৰি দিয়ে । ইয়াৰ পিছতে আৰক্ষীয়ে অধিবক্তা গৌতমক সাতগাঁও থানালৈ লৈ আনে ।
ঘটনা সন্দৰ্ভত সাতগাঁও আৰক্ষীয়ে গাহৰ্স্থ হিংসাৰ এটা গোচৰ ৰুজু কৰি তদন্ত অব্যাহত ৰাখিছে । ইফালে, পত্নীৰ অভিযোগক সম্পূৰ্ণ মিছা আখ্যা দিছে স্বামী গৌতম ফুকনে । ফুকনৰ মতে পত্নীয়ে কৰা অভিযোগ অনুসৰি তেওঁৰ সৈতে কোনো যুৱতীৰ লগত প্ৰেমজনিত সম্পৰ্ক নাই । আনকি পত্নীক কোনো ধৰণৰ অকথ্য শাৰীৰিক নিৰ্যাতন চলোৱা নাই,বৰং পত্নীয়ে বিভিন্ন সময়ত তেওঁক মানসিক নিৰ্যাতন চলাই আহিছে । তাৰোপৰি বিবাহ বিচ্ছেদৰ বাবদ তেওঁৰ পত্নীয়ে ৫০ লাখ টকা দাবী কৰাৰ উপৰিও পাঞ্জাবাৰী স্থিত ঘৰটো বিচৰা বুলিও স্বামী গৰাকীয়ে সংবাদ মাধ্যমৰ আগত সদৰী কৰিছে ।
লগতে পঢ়ক : কাতি বিহুৰ পালনৰ বাবে সাজু হৈছে মাজুলীৰ সত্ৰ সমূহ
