গুৱাহাটী, 2 মে': পুৱা ৮ বজাৰ লগে লগে ৰাজ্যজুৰি আৰম্ভ হৈছে ভোটগননা । প্ৰায় এমাহ ই ভি এমত ৰাজনৈতিক ভাগ্য বন্দী হৈ থকাৰ পাচত আগন্তুক পাঁচ বছৰৰ বাবে দিছপুৰ কাৰ দখললৈ যাব সেইয়া দেওবাৰেহে নিৰ্ণয় হ'ব । ভোটগননা, ৰাজ্যত পৰৱৰ্তী চৰকাৰ গঠন এই সকলো বিলাকৰ সমান্তৰালকৈ ৰাজ্যৰ ৰাজনীতিত সৰ্বাধিক চৰ্চিত হৈ অহা বিষয়টো হ'ল অসমত পুনৰ বিজেপি নেতৃত্বাধীন চৰকাৰ গঠন হ'লে মুখ্যমন্ত্ৰী হ'ব কোন ? সৰ্বানন্দ সোণোৱাল নে ড৹ হিমন্তবিশ্ব শৰ্মা ? বিজেপিৰ ৰাষ্ট্ৰীয় নেতৃত্বয়ো এই পৰ্যন্ত ইয়াৰ ভেদ ভাঙিব খোজা নাই । কেৱল আকাৰে ইংগিতেহে চলিছে ।
এনেবিলাক গৰম চৰ্চাৰ মাজতে শনিবাৰে সন্ধিয়া ৰাজভৱনলৈ গৈ ৰাজ্যপাল জগদীশ মুখীক সাক্ষাৎ কৰে মন্ত্ৰী ড৹ হিমন্তবিশ্ব শৰ্মাই । কেৱল সাক্ষাৎ কৰাই নহয়, প্ৰায় আধা ঘন্টাতকৈও অধিক সময়জুৰি ৰাজ্যপালৰ সৈতে আলোচনাত মিলিত হয় প্ৰভাৱশালী মন্ত্ৰীগৰাকী । স্বাভাৱিকতে ৰাজনৈতিক মহলত উদ্বিগ্নতাৰ সৃষ্টি হৈছে - ভোটগণনাৰ প্ৰাকসন্ধ্যা এইদৰে কিয় ৰাজ্যপালৰ সৈতে বৈঠকত মিলিত হ'ল ড৹ শৰ্মা ? ইফালে মুখ্যমন্ত্ৰী সৰ্বানন্দ সোণোৱালে কালিৰে পৰা বাহৰ পাতি আছে তেওঁৰ গৃহ সমষ্টি মাজুলীত । দেওবাৰে ভোটগণনা সম্পূৰ্ণ হোৱাৰ পাচতহে তেওঁ গুৱাহাটীলৈ উভতিব বুলি জানিব পৰা গৈছে ।
