গুৱাহাটী, ৭ নৱেম্বৰ : অসম বিধানসভা সচিবালয়ৰ কৰ্মচাৰীৰ উপস্থিতি আৰু পোচাক-পৰিচ্ছদক লৈ তৎপৰ হৈ পৰিছে অসম বিধান সভা সচিবালয় কৰ্তৃপক্ষ (Assam Assembly dress code) ৷ শেহতীয়াভাৱে অসম বিধানসভাৰ সচিবালয়ৰ কৰ্মচাৰীলৈ এক বিশেষ নিৰ্দেশনা জাৰি কৰিছে প্ৰধান সচিবে ৷ অধ্যক্ষৰ পৰামৰ্শতে এই নিৰ্দেশনা জাৰি কৰিছে প্ৰধান সচিবগৰাকীয়ে ৷
এই অনুসৰি বিধানসভা সচিবালয়ৰ কৰ্মচাৰীসকলে এতিয়াৰে পৰা কিছু নিয়ম নিয়মিতৰূপে কঠোৰভাৱে পালন কৰিব লাগিব ৷ কৰ্মচাৰীসকলে বায়'মেট্ৰিক মেচিনত দিব লাগিব উপস্থিতি । পুৱা ৯:৩০ বজাত উপস্থিত হ'ব লাগিব কাৰ্যালয়ত । নিয়মীয়া বিষয়া-কৰ্মচাৰীৰ লগতে দৈনিক মজুৰি, ঠিকা ভিত্তিক সকলো কৰ্মচাৰীৰ ক্ষেত্ৰত প্ৰযোজ্য হ'ব এই নিয়ম ।
ইয়াৰ লগতে সাজ-পোছাকক লৈও বিশেষ নিৰ্দেশনা প্ৰধান সচিবগৰাকীৰ ।
এই নিৰ্দেশনাত কৰ্মচাৰীৰ পোচাক পৰিধান প্ৰসংগতো দিয়া হৈছে কেতবোৰ নিৰ্দেশনা ৷ আনুষ্ঠানিক সাজ-পোছাক পিন্ধিব লাগিব বিধান সভা সচিবালয়ৰ সকলো বিষয়া-কৰ্মচাৰীয়ে । আনুষ্ঠানিক সাজ-পোছাক হিচাবে মহিলাসকলে কি পিন্ধিব পাৰিব তাৰো নিৰ্দেশনা দিছে অসম বিধানসভা কৰ্তপক্ষই (Govt issues dress code for Assam Assembly employees) ৷
বিধানসভা সচিবালয়ত কৰ্মৰত মহিলাসকলে পিন্ধিব পাৰিব ছুৰিদাৰ, শাৰী, মেখেলা-চাদৰ অথবা আনুষ্ঠানিক পেন্ট-চাৰ্ট । আনহাতে, কেজুৱেল পোছাক টি-চাৰ্ট, জীনচ আৰু লেগিংছ আদি পৰিধানত নিষেধাজ্ঞা বিধানসভা কৰ্তৃপক্ষৰ । সপ্তাহৰ প্ৰতি বুধবাৰে বিষয়া-কৰ্মচাৰীসকলে পৰিধান কৰিব পাৰিব পৰম্পৰাগত সাজপাৰ ৷
বিধানসভাৰ অধিৱেশন, বিধানসভাৰ বিশেষ অনুষ্ঠানত বিধানসভাৰ সচিবালয়ে বিধি অনুসৰি প্ৰদান কৰা সাজ-পোছাক পৰিধান কৰিব লাগিব । অন্যথা বিধানসভা কৰ্তৃপক্ষই কঠোৰ ব্যৱস্থা গ্ৰহণ কৰিব বুলি কোৱা হৈছে বিধানসভা সচিবালয়ৰ সচিব প্ৰধান হেমেন দাস স্বাক্ষৰিত নিৰ্দশনাটোত ৷
ইফালে, এই নিৰ্দেশনাই সাংবাদিকসকলৰ বাবেও বাধ্যতামূলক কৰি তুলিলে ‘‘ড্ৰেছ ক’ড’’ ৷ এই শেহতীয়া নিৰ্দেশনা অনুসৰি সাংবাদিকসকলেও বিধানসভাৰ অধিৱেশন কালত ফৰ্মেল পোচাক পৰিধান কৰিহে সোমাব লাগিব বিধানসভা চৌহদত ৷ কিয়নো পূৰ্বেও বিধানসভা চৌহদত আৰু বিধানসভাৰ অধিৱেশন কালত কৰ্মচাৰী আৰু সাংবাদিককে আন লোকৰ বাবে কেতবোৰ নীতি-নিৰ্দেশনা আছিল যদিও সেয়া কঠোৰভাৱে পালন হোৱা নাছিল ৷
এই নিৰ্দেশনাত পূৰ্বৰ নিৰ্ধাৰিত নিয়মসমূহো কঠোৰভাৱে পালন কৰিবলৈ নিৰ্দেশ জাৰী কৰা হৈছে ৷
লগতে পঢ়ক : New Sahitya Parishad State Conference: নতুন সাহিত্য পৰিষদৰ দ্বি বাৰ্ষিক ৰাজ্যিক সন্মিলনৰ সফল সামৰণি
