গুৱাহাটী, 4 জুলাই: ৰাজ্যৰ 75 খন পৌৰসভালৈ ৰাজ্য চৰকাৰে প্ৰদান কৰিছে "অটো টিপাৰ" বাহন ৷ পৌৰসভাবোৰৰ মাজত মুঠ 218 খন আৱৰ্জনা সংগ্ৰহকাৰী "অটো টিপাৰ" বাহন আনুষ্ঠানিকভাৱে সোমবাৰে বিতৰণ কৰিছে ৰাজ্য চৰকাৰে । স্বচ্ছ ভাৰত অভিযানৰ নিৰ্দেশনা অনুসৰি শুকান আৰু তিতা আৱৰ্জনা পৃথক কৰিব পৰা তথা বিপজ্জনক সামগ্ৰীৰ বাবে পৃথক হুক সম্বলিত অৰ্থাৎ বিশেষভাৱে নিৰ্মাণ কৰি উলিওৱা হৈছে এই অটোবোৰ ।
শ্ৰীমন্ত শংকৰদেৱ কলাক্ষেত্ৰৰ শ্ৰীমন্ত শঙ্কৰদেৱ আন্তৰ্জাতিক প্ৰেক্ষাগৃহত আয়োজিত হয় ৰাজ্যৰ পৌৰ নিকায়সমূহৰ নিৰ্বাচিত প্ৰতিনিধি তথা কৰ্ম-কৰ্তাসকলৰ দক্ষতা উন্নয়ন বিষয়ক এক দিনজোৰা কৰ্মশালাৰ অনুষ্ঠান । এই কৰ্মশালাত মুখ্য অতিথি হিচাবে অংশগ্ৰহণ কৰে গৃহ নিৰ্মাণ আৰু নগৰ পৰিক্ৰমা বিভাগৰ মন্ত্ৰী অশোক সিংহলে ৷ একেটা অনুষ্ঠানতে অটো টিপাৰ বাহনবোৰ বিতৰণ কৰা হয় ৷
এখন স্বচ্ছ অসম নিৰ্মাণৰ লক্ষ্য আগত ৰাখি, স্বচ্ছ ভাৰত অভিযান আৰু অসম চৰকাৰৰ গৃহ নিৰ্মাণ আৰু নগৰ পৰিক্ৰমা বিভাগৰ সৌজন্যত কৰ্মশালাখনিৰ আয়োজন কৰা হৈছে বুলি জানিবলৈ পৰা গৈছে । অনুষ্ঠানটোত ভাগ লৈ মন্ত্ৰীগৰাকীয়ে কৰ্মশালাখনিত সমল ব্যক্তি তথা বিভাগীয় বিষয়াসকলে প্ৰদান কৰা প্ৰশিক্ষণৰ জৰিয়তে পৌৰ নিকায়ৰ নিৰ্বাচিত জনপ্ৰতিনিধিসকল আৰু বিষয়া-কৰ্মীসকল যথেষ্ট উপকৃত হবলৈ সক্ষম হ’ব বুলি আশা প্ৰকাশ কৰে ।
চলিত বাজেটত ৰাজ্যৰ নগৰাঞ্চলৰ বাট-পথ আৰু নলা-নৰ্দমা নিৰ্মাণৰ বাবে ৰাজ্য চৰকাৰে 1000 কোটি টকা আছুতীয়াকৈ ধাৰ্য কৰাৰ কথা জানিবলৈ দিয়ে মন্ত্ৰীগৰাকীয়ে ৷ কলাক্ষেত্ৰত অনুষ্ঠিত এই কৰ্মশালাত “আৰবান মেনেজমেণ্ট চেণ্টাৰ” ৰ উপ-সঞ্চালক মেঘনা মালহোত্ৰা আৰু টীম লীডাৰ অৰবিন্দ সিঙে সমল ব্যক্তি হিচাবে অংশগ্ৰহণ কৰাৰ লগতে গৃহ নিৰ্মাণ আৰু নগৰ পৰিক্ৰমা বিভাগৰ বিষয়াসকলে কেইবাটাও গুৰুত্বপূৰ্ণ বিষয় উপস্থাপন কৰি দেখুৱায় ।
উল্লেখযোগ্য যে কেনে ধৰণৰ কাৰ্যপন্থা হাতত ল'লে অসমে স্বচ্ছ ভাৰত অভিযানত "আৱৰ্জনামুক্ত চহৰ" শাখাত 3 তাৰকাযুক্ত ৰেটিং আৰু “অ’ডিএফ প্লাছ” লাভ কৰিবলৈ সক্ষম হ'ব; তাৰ বাবে সংশ্লিষ্ট বিষয়া-কৰ্মচাৰীসকলক প্ৰশিক্ষণ দিয়াৰ উদেশ্যে এই কৰ্মশালাখন অনুষ্ঠিত কৰা হৈছে । “আৰবান মেনেজমেণ্ট চেণ্টাৰ” নামৰ এটা অভিজ্ঞ সংগঠনৰ দ্বাৰা এই প্ৰশিক্ষণ প্ৰদানৰ ব্যৱস্থা কৰা হৈছে ।
স্বচ্ছতাৰ লগতে প্ৰধানমন্ত্ৰী আৱাস যোজনা (নগৰীয়া), অম্ৰুট, ৰাষ্ট্ৰীয় নগৰীয়া জীৱিকা অভিযান, সম্পত্তি কৰ, চহৰ বিত্ত পৰ্টেলৰ লগতে গৃহ-নিৰ্মাণ আৰু নগৰ পৰিক্ৰমা বিভাগৰ অন্যান্য কাৰ্য প্ৰণালীৰ ওপৰতো এই কৰ্মশালাত বিশদভাৱে পৰ্যালোচনা কৰা হয় ।
লগতে পঢ়ক : Case Diary missing: ৩৮ বছৰ পুৰণি গোচৰৰ কেছ ডায়েৰীক লৈ গৃহ বিভাগত হাহাকাৰ
