মহানগৰীত জাপানীজ এনকেফেলাইটিছ ৰোধৰ ব্যৱস্থা গ্ৰহণ পৌৰ নিগমৰ

মহানগৰীৰ পৌৰ নিগমৰ আয়ুক্ত দেৱেশ্বৰ মালাকাৰে অপৰিষ্কাৰ অঞ্চল তথা ৱাৰ্ড সমূহত ধোঁৱা দিয়াৰ ব্যৱস্থা কৰাৰ লগতে তেনে অঞ্চলত প্ৰতি দিনে বিশেষ লোকক নিয়োগ কৰিছে ৷ কেৱল সেয়াই নহয়, বহু সজাগতা মূলক ব্যৱস্থা গ্ৰহণ কৰিছে পৌৰ নিগমৰ দ্বায়িত্বত থকা আয়ুক্ত গৰাকীয়ে ৷ 10 টাকৈ মেচিনেৰে যথাসম্ভৱ প্ৰতিটো অঞ্চলত ধোঁৱা দিয়াৰ বাবে চেষ্টা চলোৱা হৈছে বুলি জনালে আয়ুক্ত গৰাকীয়ে ।

গুৱাহাটী, 8 জুলাই : অসমত সৰ্বত্ৰে মহামাৰীৰ ৰূপ ধাৰণ কৰিছে জাপানীজ এনকেফেলাইটিছ ৰোগে ৷ ৰাজ্যত বৰ্তমানলৈ 30 জনৰো অধিক লোকে প্ৰাণ হেৰুৱাইছে এই ৰোগত ৷ বহুকেইখন জিলাত বৰ্তমানেও চিকিৎসাধীন হৈ আছে সহস্ৰাধিক এনকেফেলাইটিছ ৰোগী ৷ এই ৰোগৰ পৰা পৰিত্ৰাণ পোৱাৰ উপায়ৰ লগতে ৰাজ্যবাসীক জাপানীজ এনকেফেলাইটিছৰ পৰা ৰক্ষা কৰাৰ উদ্দেশ্যে স্বাস্থ্য বিভাগৰ লগতে গুৱাহাটী পৌৰ নিগমেও লৈছে বিশেষ পদক্ষেপ । গুৱাহাটীৰ প্ৰতিটো ৱাৰ্ডত বিশেষ দল নিয়োগ কৰি ধোঁৱা দিয়াৰ ব্যৱস্থা কৰিছে পৌৰ নিগমে । মহৰ উৎপত্তি স্থল সমূহত ধোঁৱা দি মহৰ বংশ বৃদ্ধি নাশ কৰাৰ উদ্দেশ্যে প্ৰতিদিনে মহানগৰীৰ লগতে ওচৰ পাজৰ সকলো অঞ্চলত ধোঁৱা দিয়াৰ ব্যৱস্থা কৰা হৈছে ।

উল্লেখ্য যে, মহানগৰীৰ পৌৰ নিগমৰ আয়ুক্ত দেৱেশ্বৰ মালাকাৰে অপৰিষ্কাৰ অঞ্চল তথা ৱাৰ্ড সমূহত ধোঁৱা দিয়াৰ ব্যৱস্থা কৰাৰ লগতে তেনে অঞ্চলত প্ৰতি দিনে বিশেষ লোকক নিয়োগ কৰিছে ৷ কেৱল সেয়াই নহয়, বহু সজাগতা মূলক ব্যৱস্থা গ্ৰহণ কৰিছে পৌৰ নিগমৰ দ্বায়িত্বত থকা আয়ুক্ত গৰাকীয়ে ৷ 10 টাকৈ মেচিনেৰে যথাসম্ভৱ প্ৰতিটো অঞ্চলত ধোঁৱা দিয়াৰ বাবে চেষ্টা চলোৱা হৈছে বুলি জনালে আয়ুক্ত গৰাকীয়ে । ইয়াৰ লগতে ফেচবুক, টুইটাৰ সকলোতে হেল্প লাইন খুলি দিছে পৌৰ নিগমে ।

যদিও জাপানীজ এনকেফেলাইটিছ ৰোগ প্ৰতিৰোধৰ দায়িত্ব স্বাস্থ্য বিভাগৰ, তথাপিও গুৱাহাটী পৌৰ নিগমে স্বাস্থ্য বিভাগৰ লগ হৈ জাপানীজ এনকেফেলাইটিছ ৰোগ প্ৰতিৰোধ কৰাৰ বাবে গ্ৰহণ কৰা পদক্ষেপ অতিকৈ প্ৰশংসনীয় ।