গুৱাহাটী,২১ ছেপ্টেম্বৰ : অসমৰ ৰাজধানী চহৰ গুৱাহাটীত শুল্ক বিভাগৰ বৃহৎ অভিযান (Customs raid in Guwahati)। শুল্ক বিভাগৰ এটা দলে অভিযান চলাই ১ কোটি ৩১ লাখ টকাৰ অবৈধ বিদেশী চিগাৰেট জব্দ কৰিবলৈ সক্ষম হয় (Huge amount of Foreign cigarettes seized)। গুৱাহাটীৰ কেৰাকুচিৰ এটা গুদামত চলিছিল এই অভিযান । গুদামটোত মজুত কৰি থোৱা অৱস্থাত প্ৰায় ৬ লাখ ১ হাজাৰ ৪০০ টা বিদেশী চিগাৰেট জব্দ কৰে অভিযানকাৰী দলটোৱে ।
শুল্ক বিভাগৰ এগৰাকী বিষয়াই জনোৱা মতে, গুৱাহাটী শুল্ক বিভাগৰ উপ-আয়ুক্তৰ নেতৃত্বত দলটোৱে অভিযান চলাই এই বৃহৎ পৰিমাণৰ বিদেশী চিগাৰেটৰ পেকেট উদ্ধাৰ কৰিবলৈ সক্ষম হয় । গোপন সূত্ৰৰ পৰা লাভ কৰা এক তথ্যৰ ভিত্তিত উক্ত গুদামটোত দলটোৱে অভিযান চলাইছিল ।
জানিব পৰা মতে সূত্ৰৰ খবৰৰ ভিত্তিত শুল্ক বিভাগে গুদামটো নিৰীক্ষণত ৰাখিছিল । পৰৱৰ্তী সময়তে মজুত কৰি ৰখা চক্ৰটোৱে চিগাৰেটখিনি আন ঠাইলৈ স্থানান্তৰৰ পৰিকল্পনা কৰিছিল । তাৰ পূৰ্বেই শুল্ক বিভাগৰ দলটোৱে গুদামটোত অভিযান চলাই আৰু বিদেশী চিগাৰেটখিনি জব্দ কৰিবলৈ সক্ষম হয় (Foreign cigarettes seized from Guwahati)।
অভিযানৰ সময়ত, ESSE আৰু Benson & Hedgesৰ দৰে বিদেশী চিগাৰেটৰ পেকেটৰ সৈতে টাটা এচ পিকআপ ভান এখনো অভিযানকাৰী দলটোৱে জব্দ কৰে । ইতিমধ্যে শুল্ক বিভাগে চিগাৰেটখিনি জব্দ কৰাৰ লগতে পৰৱৰ্তী অনুসন্ধান আৰম্ভ কৰিছে । অৱশ্যে এই অভিযানত কোনো লোক আটক হোৱাৰ তথ্য এতিয়ালৈ পোৱা হোৱা নাই ।
লগতে পঢ়ক : গোৱালপাৰাত চোৰাংভাৱে সৰবৰাহ কৰা কাঠসহ বাহন জব্দ
