গুৱাহাটী,৩১ অক্টোবৰ : এখনৰ পাছত আনখনকৈ বিদ্যালয়ত ক’ভিডৰ সংক্ৰমণ আৰম্ভ হৈছে । ইতিমধ্যে ক’ভিডৰ সংক্ৰমণৰ বাবেই বন্ধ কৰি দিয়া হৈছে কুৰিখনকৈ শিক্ষানুষ্ঠান । পৰ্যায় ক্ৰমে ক'ভিড সম্পৰ্কীয় এছ অ' পি শিথিল কৰি অনাৰ সমান্তৰালকৈ উৎসৱ-পাৰ্বন আৰু নিৰ্বাচনী ধামখুমীয়াৰ পাছতে ৰাজ্যত পুনৰ ক’ভিড ভাইৰাছে এফালৰ পৰা ছানি ধৰিছে । বিশেষকৈ ক’ভিডৰ বাবে বিপদজনক হৈ পৰিছে শিক্ষানুষ্ঠানসমূহ । বিগত ১৯ অক্টোবৰৰ পৰা সকলো শ্ৰেণীৰ পাঠদান আৰম্ভ হৈছে যদিও শেহতীয়াকৈ এখনৰ পাছত আনখনকৈ শিক্ষানুষ্ঠানত শিক্ষক-শিক্ষাৰ্থী ক’ভিডত আক্ৰান্ত হৈছে ।
যাৰ ফলত বন্ধ কৰি দিবলগীয়া হৈছে ৰাজ্যৰ কুৰিখনকৈ শিক্ষানুষ্ঠানৰ সমগ্ৰ পাঠদান ব্যৱস্থা । লক্ষণীয়ভাৱে শিক্ষানুষ্ঠানৰ দুৱাৰ খোলাৰ পাছত এই পৰ্যন্ত ৰাজ্যৰ প্ৰায় কুৰিখন শিক্ষানুষ্ঠানৰ অৰ্ধশতাধিক শিক্ষক আৰু শিক্ষাৰ্থীৰ দেহত ক’ভিড পজিটিভ ধৰা পৰিছে । আক্ৰান্ত সকলৰ ভিতৰত ষষ্ঠ শ্ৰেণীৰ ছাত্ৰ-ছাত্ৰীও আছে । তথ্য অনুসৰি বৰ্তমানলৈ কুৰিগৰাকীৰো অধিক শিক্ষক-শিক্ষয়িত্ৰী আৰু প্ৰায় ৪৫জন শিক্ষাৰ্থী ক’ভিডত আক্ৰান্ত হৈছে ।
ক’ভিড সংক্ৰমণৰ পাছতেই গুৱাহাটীৰ দুখন শিক্ষানুষ্ঠান প্ৰশাসনে মাইক্ৰ’ কণ্টেইনমেণ্ট জ’ন ঘোষণা কৰাৰ লগতে ডিব্ৰুগড়, শোণিতপুৰ, দৰং আদি জিলাৰ কেইবাটাও স্থানত বহু শিক্ষানুষ্ঠান ক’ভিড সংক্ৰমণৰ বাবে সাময়িকভাৱে বন্ধ কৰি দিয়া হৈছে । ৫০ শতাংশ শিক্ষাৰ্থী আৰু শিক্ষকৰ উপস্থিতিৰে পাঠদান চলাৰ মাজতে ক’ভিড সংক্ৰমণে ভয়াৱহ ৰূপ লোৱাত স্বাস্থ্য বিভাগৰ লগতে অভিভাৱকসকলো চিন্তিত হৈ পৰিছে ।
গুৱাহাটীৰ মালিগাঁৱৰ কামাখ্যা উচ্চ মাধ্যমিক বিদ্যালয়ৰ প্ৰধান শিক্ষক ক’ভিড আক্ৰান্ত হোৱাৰ পাছতেই বৃহস্পতিবাৰৰে পৰা কাৰ্যকৰি হোৱাকৈ কামৰূপ মহানগৰ জিলা প্ৰশাসনে বিদ্যালয়খন বন্ধ কৰি মাইক্ৰ’ কণ্টেইনমেণ্ট জ’ন ঘোষণা কৰিছে ৷ ইপিনে গাড়ীগাঁৱৰ বালিকা মোক্তাব স্কুলৰ তিনি শিক্ষক ক'ভিড পজিটিভ হোৱাত শিক্ষানুষ্ঠানখন মহানগৰ প্ৰশাসনে কণ্টেইনমেণ্ট জ’ন ঘোষণা কৰিছে ৷ ইপিনে গুৱাহাটীৰ ভঙাগড়স্থিত মুখ্যমন্ত্ৰী বিশেষ তদাৰকী কোষৰ কেইবাজনো আৰক্ষী বিষয়া-জোৱান ক’ভিডত আক্ৰান্ত হোৱাত সমগ্ৰ কাৰ্যালয়টো কণ্টেইনমেণ্ট জ’ন ঘোষণা কৰা হৈছে ।
আনহাতে, শোণিতপুৰ জিলাৰ ঢেকিয়াজুলিৰ ৪ খন শিক্ষানুষ্ঠান ক’ভিডৰ বাবে প্ৰশাসনে বন্ধ ঘোষণা কৰিছে ৷ ঢেকিয়াজুলিৰ বৰছলাৰ ধিৰাই মাজুলী অঞ্চলত ছাত্ৰসহ মুঠ ৩ জন ব্যক্তি ক’ভিডত আক্ৰান্ত হোৱাত স্থানীয় ৪ খন বিদ্যালয় এসপ্তাহৰ বাবে বন্ধ কৰি দিছে ৷ শিক্ষা বিভাগৰ এছ অ’ পি অনুসৰি কোনো অঞ্চলত ক’ভিড পজিটিভ ধৰা পৰিলে এক কিলোমিটাৰ ব্যাসাৰ্ধৰ শিক্ষানুষ্ঠানসমূহ এসপ্তাহৰ বাবে বন্ধৰ নিৰ্দেশ প্ৰদান কৰা হৈছে । সেই সূত্ৰেই ধিৰাইমুখ প্ৰাথমিক বিদ্যালয়, ধিৰাই মাজুলী এম ই স্কুল, ধিৰাই মাজুলী হাইস্কুল আৰু ধিৰাই মাজুলী শংকৰদেৱ শিশু নিকেতন এসপ্তাহৰ বাবে শিক্ষা বিভাগে বন্ধ কৰি দিছে ।
আনহাতে, ডিব্ৰুগড় জিলাৰ চাবুৱাৰ অসম বিদ্যাপীঠ উচ্ছতৰ মাধ্যমিক বিদ্যালয়ৰ শিক্ষকসহ ৬ গৰাকী ছাত্ৰীৰ দেহত ক’ভিড পজিটিভ ধৰা পৰাত বৃহস্পতিবাৰে বিদ্যালয়খন এসপ্তাহৰ বাবে কণ্টেইনমেণ্ট জ’ন ঘোষণা কৰে শিক্ষা বিভাগে । ইপিনে, শুকুৰবাৰে ডিব্ৰুগড় চৰকাৰী উচ্ছতৰ মাধ্যমিক আৰু বহুমুখী বালিকা বিদ্যালয় আৰু বৰবৰুৱা ৰামেশ্বৰ উচ্ছতৰ মাধ্যমিক বিদ্যালয়ৰ দুগৰাকী ছাত্ৰীৰ ক’ভিড পজিটিভ ধৰা পৰিছে ।
শিক্ষানুষ্ঠানৰ উপৰি আৰক্ষী বিভাগতো ক'ভিডৰ ব্যাপক সংক্ৰমণ হৈছে । কেইবাজনো শীৰ্ষ বিষয়া-জোৱান ক’ভিডত আক্ৰান্ত হৈ চিকিৎসাধীন হ’ব লগা হৈছে । নিৰ্বাচনৰ মাজতে যোৰহাটৰ আৰক্ষী অধীক্ষক অংকুৰ জৈন আৰু বজালীৰ আৰক্ষী অধীক্ষক ধৰ্মেন্দ্ৰ কুমাৰ দাস ক’ভিডত আক্ৰান্ত হোৱাত নিৰ্বাচন আয়োগে সাময়িকভাৱে জিলা দুখনত নতুন আৰক্ষী অধীক্ষক নিযুক্তি দিয়ে ।
ইফালে, দৰং জিলাত পুনৰ কৰ'ণাৰ ভয়াবহ ৰূপ দেখা গৈছে । মঙলদৈ চহৰৰ জ্ঞান বিকাশ একাডেমী নামৰ এখন ব্যক্তিগত খণ্ডৰ ছেকেণ্ডাৰী স্কুলত শনিবাৰে ২২ জন ছাত্ৰ-ছাত্ৰীৰ দেহত ক’ভিডৰ উপস্থিতি ধৰা পৰে । শুকুৰবাৰে দৰঙৰ তিনিখন বিদ্যালয়ৰ তিনিজন ছাত্ৰৰ দেহত ক’ভিদৰ উপস্থিতি ধৰা পৰিছিল । সেই তিনিখন বিদ্যালয় হল মঙলদৈৰ জ্ঞান বিকাশ একাডেমী, ছিপাঝাৰৰ ট্ৰিনিটি কলেজ আৰু খাৰুপেটীয়া প্ৰাথমিক বিদ্যালয় ।
সেয়ে শনিবাৰে বিদ্যালয়কেইখনত ক’ভিড পৰীক্ষা কৰাত জ্ঞান বিকাশৰ ২২ জন, ছিপাঝাৰৰ ট্ৰিনিটি কলেজৰ এজনৰ দেহত ক’ভিদৰ উপস্থিতি ধৰা পৰে ৷ তিনিখন বিদ্যালয়ৰ প্ৰায় চাৰিশ ছাত্ৰ-ছাত্ৰীক ক’ভিদ পৰীক্ষা কৰা হৈছিল৷ জিলা প্ৰশাসনে মঙলদৈৰ জ্ঞান বিকাশ একাডেমী সাত দিনৰ বাবে বন্ধ কৰাৰ নিৰ্দেশ দিছে । লগতে বিদ্যালয়খন চেনিটাইজ কৰাৰ ব্যৱস্থা লোৱা হৈছে ৷
বিদ্যালয় সমূহ দীঘলীয়া সময় বন্ধ থকাৰ পিছত এতিয়া পৰ্যায় ক্ৰমে বিদ্যালয় সমূহ খোলাৰ পিছতে এনে পৰিস্থিতিৰ সৃষ্টি হোৱাত স্বাভাৱিকতেই সকলো আতংকিত হৈ পৰিছে । উল্লেখ্য যে, বিগত ২৪ ঘণ্টাত ৰাজ্যখনত ২৮৩ গৰাকী লোক নতুনকৈ ক'ভিডত আক্ৰান্ত হৈছে আৰু মৃত্যু হৈছে চাৰিগৰাকী লোকৰ । ইয়াৰে আক্ৰান্তৰ ১০৮ গৰাকী গুৱাহাটী মহানগৰীৰ । মহানগৰীত দৈনিক আক্ৰান্তৰ সংখ্যা শতকৰ ওপৰত আছে ।
লগতে পঢ়ক : নাট মঞ্চস্থ কৰাক লৈ নিজৰ মাজতে মত-বিৰোধ ভ্ৰাম্যমাণ থিয়েটাৰৰ প্ৰযোজকৰ
