গুৱাহাটী, ৬ জুন : ক'ভিডৰ পৰা সুস্থ হোৱাৰ পাছতো ক'ভিডজনিত কাৰণত অন্য ৰোগত মৃত্যু হোৱা লোকৰ হাৰ উদ্বেগজনকভাৱে বৃদ্ধি পাব ধৰিছে । বহু সময়ত দেখা গৈছে যে, ক'ভিডৰ পৰা সুস্থ হৈ ঘৰলৈ যোৱাৰ পিছতো বহু লোক আন ৰোগৰ বাবে পুনৰ অসুস্থ হৈ মৃত্যু মুখত পৰিছে । বিশেষকৈ বিভিন্ন ক্ৰ’নিক ৰোগ(chronic disease) ত আক্ৰান্ত হৈ থকা বয়োজ্যেষ্ঠ লোকসকলৰ ক্ষেত্রত মৃত্যুৰ হাৰ বেছিকৈ দেখা গৈছে ।
ইতিমধ্যে, কৰ'ণাৰ পৰা আৰোগ্য লাভ কৰাৰ পাছত ক'ভিডকেন্দ্ৰিক জটিলতাৰ বাবে আন ৰোগত অসমৰ বহু কেইগৰাকী বিশিষ্ট ব্যক্তিৰ মৃত্যু হৈছে । পৰোক্ষভাৱে ক'ভিডৰ বাবেই বহু লোকে মৃত্যুক আকোঁৱালি ল'ব লগীয়া হৈছে । প্ৰাক্তন মুখ্যমন্ত্রী তৰুণ গগৈ(Ex CM Tarun Gogoi), স্বনামধন্য সাহিত্যিক-সাংবাদিক হোমেন বৰগোহাঞি, বিশিষ্ট সাহিত্যিক লক্ষ্মীনন্দন বৰাকে ধৰি বহু কেইগৰাকী বিশিষ্ট ব্যক্তিৰ ক'ভিডৰ পৰা আৰোগ্য লাভ কৰাৰ পাছতো ক'ভিডজনিত জটিলতাৰ বাবে আন ৰোগত মৃত্যু হৈছিল ।
চৰকাৰী তথ্য মতে ক'ভিডত আক্ৰান্ত হৈ আন ৰোগৰ বাবে মৃত্যু হোৱা লোকৰ সংখ্যা হৈছে ১,৩৪৭ গৰাকী । ক'ভিডজনিত কাৰণত মৃত্যুৰ হাৰ বৃদ্ধি পোৱা ঘটনাই সকলোকে উদ্বিগ্ন কৰি তুলিছে ।
এই সন্দৰ্ভত গুৱাহাটীৰ হেল্থ চিটী হাস্পতালৰ চিকিৎসা সঞ্চালক তথা মেডিচিন বিভাগৰ বিশেষজ্ঞ চিকিৎসক ডাঃ ভৱানী প্ৰসাদ চক্ৰবৰ্তীৰ এক আছুতীয়া সাক্ষাৎকাৰ গ্ৰহণ কৰা হৈছিল । সাক্ষাৎকাৰত ডাঃ চক্ৰবৰ্তীয়ে এইক্ষেত্রত বহুকেইটা দিশ উল্লেখ কৰে । ক'ভিডে হাওঁফাওঁকে আদি কৰি মানৱ দেহৰ বহু অংগত ক্ষতি সাধন কৰিব পাৰে ।
বিশেষকৈ, বয়োজ্যেষ্ঠ লোকসকল যথেষ্ট সাৱধান হ'ব লাগিব বুলি মন্তব্য কৰে চিকিৎসক গৰাকীয়ে ৷ ক'ভিডৰ পৰা সুস্থ হোৱাৰ পাছত আন ৰোগৰ নিয়মীয়া পৰীক্ষা-নিৰীক্ষাৰ লগতে কিবা অসুবিধা পালেই পলম নকৰি চিকিৎসকৰ পৰামৰ্শ লোৱা উচিত । বহু সময়ত ক'ভিডে শৰীৰৰ ভিতৰৰ অংশৰ বিভিন্ন অংগৰ যথেষ্ট ক্ষতিসাধন কৰে বুলি উল্লেখ কৰে ডাঃ চক্ৰবৰ্তীয়ে ।
ইয়াৰ ফলত মৃত্যু মুখত পৰিব পাৰে বহুলোক । যাৰবাবে ক'ভিড হোৱাৰ পাছতো সকলো লোকেই যথেষ্ট সচেতন হৈ থকাটো প্ৰয়োজনীয় বুলি মন্তব্য কৰে ডাঃ চক্ৰবৰ্তীয়ে । তদুপৰি, ভেকচিনৰ দুয়োটা পালি লোৱাৰ পাছতো পুনৰ ক'ভিড হ'ব পাৰে । সেয়ে সকলোৱে সকলো সময়তে ক'ভিড প্ৰট'কল(covid protocol)সমূহ মানি চলা উচিত বুলিও পৰামৰ্শ দিয়ে বিশিষ্ট মেডিচিন বিশেষজ্ঞ(medicine specialist) গৰাকীয়ে ।
লগতে পঢ়ক : নতুন SOP অনুসৰি কি কি নীতি-নিয়ম প্ৰযোজ্য হ’ব আপোনাৰ জিলাত
