গুৱাহাটী, 14 আগষ্ট : স্বাধীনতা দিৱসলৈ মাজত মাথো কেইটামান ক্ষণ বাকী ৷ 77 সংখ্যাক স্বাধীনতা দিৱস উদযাপনৰ বাবে সাজু হৈছে দেশবাসী ৷ সমগ্ৰ দেশৰ লগতে অসমতো 77 সংখ্যক স্বাধীনতা দিৱস উদযাপনৰ ব্যাপক প্ৰস্তুতি চলিছে ৷ ৰাজ্যৰ প্ৰত্যেকখন জিলাৰ সদৰত জিলা প্ৰশাসনৰ উদ্যোগত উদযাপন কৰা হ’ব 77 সংখ্যক স্বাধীনতা দিৱস ৷ লগতে ৰাজ্যৰ প্ৰান্তে প্ৰান্তে বিভিন্ন দল-সংগঠন, স্থানীয় প্ৰশাসনৰ উদ্যোগতো উদযাপন কৰা হ’ব 77 সংখ্যক স্বাধীনতা দিৱস ৷
ৰাজ্যত খানাপাৰা পশু চিকিৎসা বিজ্ঞান মহাবিদ্যালয় খেলপথাৰত কেন্দ্ৰীয়ভাৱে পালন কৰা হ’ব স্বাধীনতা দিৱসৰ কাৰ্যসূচী ৷ পুৱা 9 বজাত আনুষ্ঠানিক ভাৱে পতাকা উত্তোলন কৰিব মুখ্যমন্ত্ৰী ড৹ হিমন্ত বিশ্ব শৰ্মাই ৷ পতাকা উত্তোলনৰ পাছত অসম আৰক্ষী, অৰ্দ্ধ সামৰিক বাহিনীকে ধৰি বহুকেইটা দলৰ কুচকাৱাজ প্ৰদৰ্শন কৰা হ'ব ৷
স্বাধীনতা দিৱসৰ পূৰ্বে খানাপাৰা পশু চিকিৎসা বিজ্ঞান মহাবিদ্যালয় খেলপথাৰক ড্ৰোন উৰণ নিষিদ্ধ এলেকা ঘোষণা ৷ ৰাজ্যিক পৰ্যায়ৰ স্বাধীনতা দিৱস উদযাপনৰ পৰিপেক্ষিতত খানাপাৰা পশুচিকিৎসা বিজ্ঞান মহাবিদ্যালয়ৰ খেলপথাৰ আৰু ইয়াৰ চৌদিশৰ এলেকাত দুদিনৰ বাবে ড্ৰোন উৰণ নিষিদ্ধ ঘোষণা কৰা হৈছে ৷ 14 আগষ্ট আৰু 15 আগষ্টত ড্ৰোন উৰণ নিষিদ্ধ এলেকা (No Drone Fly Zone) হিচাবে ঘোষণা কৰা হৈছে ৷
এই সন্দৰ্ভত কামৰূপ মহানগৰ জিলাৰ অতিৰিক্ত জিলা দণ্ডাধীশে জাৰি কৰিছে এক নিৰ্দেশ ৷ বিগত বৰ্ষৰ দৰে এই বৰ্ষও স্বাধীনতাৰ অমৃত মহোৎসৱৰ লগত সংগতি ৰাখি এইবাৰ অসম চৰকাৰে গ্ৰহণ কৰিছে স্বাধীনতা দিৱসৰ কিছু বিশেষ কাৰ্যসূচী ৷ দেওবাৰে কেন্দ্ৰীয় ভাৱে দীঘলীপুখুৰীত পালন কৰা হয় প্ৰাক স্বাধীনতা দিৱসৰ কাৰ্যসূচী ৷ আনহাতে স্বাধীনতা দিৱসৰ পূৰ্বে ৰাজ্যৰ বিভিন্ন প্ৰান্তৰ লগতে মহানগৰীতো গঢ়ি তোলা হৈছে কটকটীয়া নিৰাপত্তা বেষ্টনী ৷
ৰে’ল পথ, নদী পথৰ লগতে মহানগৰীৰ অলিয়ে-গলিয়ে কটকটীয়া তালাচী চলাইছে মহানগৰ আৰক্ষীয়ে ৷ সুৰক্ষাৰ প্ৰতি লক্ষ্য ৰাখি খানাপাৰা পশুচিকিৎসা বিজ্ঞান মহাবিদ্যালয় খেলপথাৰতো এতিয়া কটকটীয়া নিৰাপত্তা বেষ্টনী গঢ়ি তোলা হৈছে ৷
লগতে পঢ়ক : Independence Day 2023 : তিনিচুকীয়াত কটকটীয়া নিৰাপত্তাৰ মাজেৰে 77 সংখ্যক স্বাধীনতা দিৱস উদযাপনৰ প্ৰস্তুতি
