বকো, 30 আগষ্ট: পথৰ দুৰাৱস্থাৰ বাবে ছয়গাঁৱৰ একাংশ ৰাইজে ভুগিছে নৰক যন্ত্ৰণা । বছৰ বছৰ ধৰি স্থানীয় লোকে পথটো মেৰামতিৰ বাবে আবেদন জনায় আহিছে যদিও সংশ্লিষ্ট কৰ্তৃপক্ষই কোনো গুৰুত্ব প্ৰদান নকৰাৰ আক্ষেপজনক ছবি পোহৰলৈ আহিছে ৷ গুৱাহাটী মহানগৰীৰ পৰা কেৱল মাত্ৰ 40 কিলোমিটাৰ মান দূৰত্বত অৱস্থিত ছয়গাঁৱৰ প্ৰীতি গাঁৱৰ ৰাইজে নানান কষ্ট স্বীকাৰ কৰি পথটোৰো আহ-যাহ কৰিবলগীয়াত পৰিছে ৷
আনকি কণ-কণ শিক্ষাৰ্থীসকলেও পথটোৰ বাবে ভুগিছে হাৰাশাস্তি ৷ হাতত চেণ্ডেল লৈ বোকাময় পথৰে বিদ্যালয়লৈ যাবলগীয়া হোৱাত পাঠদানৰ ক্ষেত্ৰতো যথেষ্ট প্ৰভাৱ পৰা বুলি সংবাদ মাধ্যমৰ আগত উল্লেখ কৰে ।
দুৰ্ভাগ্যজনক বিষয় যে, সবকা সাথ সবকা বিকাশৰ শ্লোগানেৰে শাসনৰ গাদী দখল কৰা চৰকাৰখনৰ দিনত আন বিভিন্ন ৰোগীৰ লগতে গৰ্ভৱতীসকলেও প্ৰয়োজনীয় চিকিৎসা লাভৰ পৰা বঞ্চিত হৈছে বুলি কয় ভুক্তভোগী লোকে । তথাপিও খবৰ ল’বলৈ স্থানীয় বিধায়কৰ আহৰি নাই বুলি আক্ষেপেৰে জানিবলৈ দিয়ে স্থানীয় ৰাইজে । পথৰ জৰাজীৰ্ণ অৱস্থাৰ বাবে জৰুৰীকালীন সেৱা লাভৰ পৰাও বঞ্চিত হৈ অহা বুলি কয় স্থানীয় লোকে ৷
কংগ্ৰেছ বিধায়ক ৰেকিবুদ্দিন আহমেদ সমষ্টিৰ ৰাইজে বছৰ বছৰ ধৰি এই দুৰ্দশাৰ মাজেৰে দিন কটাইছে যদিও কোনো কাণষাৰ নাই কংগ্ৰেছ বিধায়কজনৰ । ৰাইজে কয়, "নিৰ্বাচনৰ সময়ত বিধায়কগৰাকীয়ে ভোট বিচাৰি আহে ৷ কিন্তু পৰৱৰ্তী সময়ত সমষ্টিবাসীৰ খবৰ লবলৈ সময় নাথাকে বিধায়ক ৰেকিবুদ্দিন আহমেদৰ ।"
স্বাধীনোত্তৰ 77 বছৰ অতিক্ৰম কৰাৰ পিচতো ৰাজ্যখনৰ নাগৰিকৰ এই জৰাজীৰ্ণ অৱস্থাই চৰকাৰখনৰ উন্নয়নৰ ফোপোলা স্বৰূপ উদঙাই দেখুৱাইছে ৷
লগতে পঢ়ক: Indo china conflict: চীনৰ দখলত ভাৰতৰ ভূখণ্ড; মোদীৰ বিৰুদ্ধে সৰৱ কংগ্ৰেছ নেতা ৰাহুল গান্ধী
