গুৱাহাটী, 30 আগষ্ট : হিন্দুস্তান পেপাৰ কৰ্প’ৰেশ্যনৰ অধীনষ্ঠ জাগীৰোড কাগজ কল আৰু কাছাৰৰ পাঁচগ্ৰাম কাগজ কল নিলামৰ ক্ষেত্ৰত দিল্লী উচ্চ ন্যায়ালয়ে জাৰি কৰিলে স্থগিতাদেশ ৷ এই সন্দৰ্ভত ২৮ ছেপ্তেম্বৰৰ ভিতৰত শপতনামা দাখিল কৰিবলৈ কেন্দ্ৰীয় চৰকাৰক নিৰ্দেশ দিছে দিল্লী উচ্চ ন্যায়ালয়ে ৷ ন্যায়ালয়ৰ এই নিৰ্দেশে স্বাভাৱিকতে কাগজ কল দুটাত কৰ্মৰত শ শ কৰ্মচাৰীৰ বাবে কিঞ্চিত হ'লেও আশাৰ বতৰা কঢ়িয়াই আনিছে ।
উল্লেখ্য যে, মুখ্যমন্ত্ৰী ড৹ হিমন্ত বিশ্ব শৰ্মাই অলপতে দিল্লীত এখন সংবাদমেলত প্ৰকাশ কৰিছিল যে কাগজ কল দুটা পুনৰুজ্জীৱিত কৰিবলৈ হ'লে প্ৰায় ১২০০ কোটি টকাৰ প্ৰয়োজন । এনে পৰিস্থিতিত কল দুটা নিলামত দিয়াৰ বাহিৰে গত্যন্তৰ নাই । সেই অনুসৰি কাগজ কল দুটা নিলামৰ বাবে বিজ্ঞাপন প্ৰকাশ কৰা হৈছিল যদিও কোনো বিনিয়োগকাৰী আগবাঢ়ি নাহিল ।
পৰৱৰ্তী পৰ্যায়ত পুনৰ নিলামৰ জাননী জাৰি কৰা হৈছিল । ইয়াৰ মাজতে কল দুটাৰ শ্ৰমিক ইউনিয়নে নিলামৰ প্ৰত্যাহ্বান জনাই ৰাষ্ট্ৰীয় কোম্পানী আইন ন্যায়াধিকৰণ (National Company Law Tribunal) কাষ চাপিছিল ।
লগতে পঢ়ক : আৰম্ভ হ'ল কাগজ কলৰ নিলাম প্ৰক্ৰিয়া
সেই অনুসৰি উক্ত গোচৰৰ ভিত্তিত ২৬ আগষ্টত দিল্লী উচ্চ ন্যায়ালয়ে শুনানী গ্ৰহণ কৰি অন্তৱৰ্তীকালীন ৰায় প্ৰদান কৰে । এই ৰায়যোগে দিল্লী উচ্চ ন্যায়ালয়ে উক্ত কল দুটা নিলামৰ সন্দৰ্ভত গ্ৰহণ কৰা স্থিতিৰ বিষয়ে ২৮ ছেপ্তেম্বৰৰ ভিতৰত শপতনামা দাখিল কৰিবলৈ কেন্দ্ৰীয় চৰকাৰক নিৰ্দেশ দিছে ।
বিধানসভাৰ নিৰ্বাচনত বিজেপিয়ে নগাঁও আৰু কাছাৰ কাগজ কল পুনৰুজ্জীৱিত কৰাৰ প্ৰতিশ্ৰুতি দিছিল যদিও চৰকাৰ গঠন কৰাৰ পাছত কাগজ কল দুটা বিক্ৰী কৰাতহে লিকুইডেটৰক সেউজ সংকেত প্ৰদান কৰে ৷ বহু বিতৰ্কৰ অন্তত বিগত 1 জুনত চৰকাৰী প্ৰতিশ্ৰুতি অসাৰ প্ৰতিপন্ন কৰি জাৰীৰোড আৰু কাছাৰ কাগছ কল বিক্ৰীৰ বাবে কেইবাখনো ৰাষ্ট্ৰীয় কাকতত বিজ্ঞাপন প্ৰকাশ কৰা হৈছিল ৷
হিন্দুস্তান পেপাৰ কৰ্প’ৰেশ্যনৰ দ্বাৰা প্ৰকাশিত এই বিজ্ঞাপনত ‘ৰিজাৰ্ভ প্ৰাইজ’ নিৰ্ধাৰণ কৰা হৈছিল 1139 কোটি টকা । নিলামৰ বাবে জাৰি কৰা নিৰ্দেশনা অনুসৰি কাগজ কল দুটা ক্ৰয় কৰাৰ বাবে ইচ্ছুক সকলৰ বাবে 55 কোটি টকা আৰ্নেষ্ট মানি ধাৰ্য কৰা হৈছিল ৷ কিন্তু 1 জুনত প্ৰকাশিত বিজ্ঞাপনৰ পিছত নিলাম প্ৰক্ৰিয়াত কোনেও অংশ নোলোৱাত বাতিল কৰা হয় কাগজ কল দুটাৰ নিলাম প্ৰক্ৰিয়া ৷
লগতে পঢ়ক : বাতিল হ'ল দুটাকৈ কাগজ কলৰ নিলাম প্ৰক্ৰিয়া
ইয়াৰ পিছতে 23 জুনত বিক্ৰী মূল্য হ্ৰাস কৰি পুনৰ বিজ্ঞাপন প্ৰকাশ কৰে ৰাষ্ট্ৰীয় কোম্পানী আইন আপীল ন্যায়াধিকৰণে নিয়োগ কৰা লিকুইডেটৰ কুলদ্বীপ বাৰ্মাই ৷ দ্বিতীয়বাৰৰ বাবে প্ৰকাশ কৰা নিলামৰ বিজ্ঞাপনত নতুন মূল্য হ্ৰাস কৰি ৯৬৯ কোটি টকা কৰা হৈছিল ৷
ইচ্ছুক প্ৰতিষ্ঠানে ৪৮ কোটি টকা আৰনেষ্ট মানী (earnest money) জমা দি কাগজ কল (Paper mill) দুটা ক্ৰয়ৰ বাবে ‘বুক’ কৰিব পাৰিব বুলি বিজ্ঞাপনত (Advertisement) কোৱা হৈছে । এইবোৰ বাদ-বিবাদৰ মাজতে কাগজ কল দুটা পুনৰুজ্জীৱিত কৰাৰ বাবে ইয়াৰ কৰ্মচাৰী তথা বিভিন্ন দল-সংগঠনৰ প্ৰতিবাদ অব্যাহত আছিল ৷
দিল্লী উচ্চ ন্যায়ালয়ৰ স্থগিতাদেশৰ এই ৰায়দানে সাময়িকভাৱে হ’লেও কিছু সকাহ প্ৰদান কৰিছে ৰাজ্যবাসীক ৷
লগতে পঢ়ক : কাগজ কল নিলামৰ বাবে পুনৰ বিজ্ঞাপন
