নিউজ ডেস্ক, ১২ মে': উচ্চতম ন্যায়ালয়ে দেশদ্ৰোহিতা আইনখন দেশত সাময়িকভাবে স্থগিত ৰাখিবলৈ বুধবাৰে দিয়া নিৰ্দেশক আদৰণি জনাইছে বিৰোধী দলপতি দেৱব্ৰত শইকীয়াই (Leader of the opposition Debabrat Saikia) । বিৰোধী দলপতিগৰাকীয়ে কয় যে যোৱা সময়চোৱাত যিসমূহ ৰাজ্যত বিজেপিৰ চৰকাৰ চলি আছে, তেনে ৰাজ্য সমূহত কোনোবাই চৰকাৰৰ বিৰুদ্ধে মাত মাতিলেই চৰকাৰে এই আইনখনৰ অপপ্ৰয়োগ কৰি আহিছিল ।
কিন্তু, বুধবাৰে ৰাষ্ট্ৰদোহৰ আইনৰ অধীনত কোনো নতুন গোচৰ পঞ্জীয়ন নকৰিবলৈ কেন্দ্ৰ আৰু ৰাজ্য চৰকাৰসমূহক নিৰ্দেশ দিছে উচ্চতম ন্যায়ালয়ে (SC on sedition law) । বিৰোধী দলপতিগৰাকীয়ে আৰু কয় যে ২০১৯ চনৰ নিৰ্বাচনী ইস্তাহাৰত কংগ্ৰেছ দলে ঘোষণা কৰিছিল যে শাসনলৈ আহিলে কংগ্ৰেছে এই আইনখন প্ৰত্যাহাৰ কৰিব ।
কিন্তু পৰবৰ্তী সময়ত প্ৰধানমন্ত্ৰী নৰেন্দ্ৰ মোদীয়ে এই আইনখনৰ পৃষ্ঠপোষতাহে কৰি অহা দেখা গল । ২০১৫ চনৰ পৰা ২০২০ চনলৈকে এই আইনখনৰ অধীনত ৩৫৬ টা গোচৰ ৰুজু কৰা হৈছিল সমগ্ৰ দেশত । এই সময়চোৱাত এই আইনৰ অধীনত প্ৰায় ছশজন লোকক আটক কৰা হৈছিল যদিও মাত্ৰ ১২ গৰাকী লোককহে শাস্তি প্ৰদান কৰিবলৈ সক্ষম হৈছে ।
অসমত বিজেপি চৰকাৰে শাসনভাৰ চম্ভালি লোৱাৰ পিছৰে পৰা বৰ্তমানলৈকে এই আইনখনৰ অধীনত প্ৰায় ৬০ টা গোচৰ ৰুজু কৰা হৈছে বুলিও বিৰোধী দলপতিগৰাকীয়ে মন্তব্য কৰে ।
লগতে পঢ়ক: ৮ জুনত কাৰ্বি আংলং স্বায়ত্ব শাসিত পৰিষদৰ লগতে বিটিচিৰ এটা সমষ্টিৰ উপ-নিৰ্বাচন
