নিউজ ডেস্ক, 8 মে' : অসমত কৰ'ণা ভাইৰাছৰ সংক্ৰমণ কিছু পৰিমাণে হ্ৰাস পোৱাৰ পৰিপ্ৰেক্ষিতত দ্বিতীয় পৰ্যায়ৰ লক্ ডাউনৰ অন্তত গ্ৰীণ জ'নত কিছু শিথিল কৰা হৈছিল নীতি-নিয়ম ৷ বহিঃৰাজ্যত আৱদ্ধ হৈ থকা লোকসকলকো অসমলৈ আহিবলৈ অনুমতি দিয়াৰ লগতে চৰকাৰে বাছৰ ব্যৱস্থাও কৰি দিছিল ৷ কিন্তু, ক্ৰমাগতভাৱে অসমত 5 মে'ৰ পৰা পুনৰ চিনাক্ত হ'বলৈ ধৰিছে COVID-19 আক্ৰান্ত ব্যক্তি ৷
5 মে'ত কোকৰাঝাৰত এজন আৰু 6 মে'ত শিলচৰত আন এজন লোকৰ দেহত ভাইৰাছ বিধৰ অৱস্থিতি ধৰা পৰে ৷ 7 মে' তাৰিখে শিলচৰ চাৰিজন আৰু গুৱাহাটীত চাৰিজনকৈ একেদিনাই মুঠ 8 জন COVID-19 আক্ৰান্ত লোক চিনাক্ত হয় ৷ এই পৰিসংখ্যা অসমত এদিনত চিনাক্ত হোৱা COVID-19 আক্ৰান্তৰ ক্ষেত্ৰতত সৰ্বাধিক ৷ উদ্বেগজনক খবৰটো হ'ল যে, গুৱাহাটীত আক্ৰান্ত সকলৰ ভিতৰত এগৰাকী গুৱাহাটী চিকিৎসা মহাবিদ্যালয়ৰ চিকিৎসক আৰু আন এগৰাকী বি. বৰুৱা কৰ্কট প্ৰতিষ্ঠানত কৰ্মৰত চাফাই কৰ্মীৰ আত্মীয় ৷
অসমত ৰে'ড জ'ন নাছিল, কেৱল তিনিখন জিলা অৰেঞ্জ জ'ন আৰু বাকী 30 খন গ্ৰীণ জ'ন হিচাপে ঘোষিত হৈছিল ৷ 4 মে'ৰ পৰা 30খন জিলাত দেখা গৈছিল স্বাভাৱিক অৱস্থা আৰু মানুহৰ সমাগম ৷ কিন্তু বৰ্তমান লক্ ডাউন শিথিল কৰাৰ পাচতেই যিহেতু অসমত অপ্ৰত্যাশিতভাৱে COVID-19 আক্ৰান্তৰ সংখ্যা বৃদ্ধি পাবলৈ ধৰিছে, তাৰ ফলত এক প্ৰকাৰ ৰাজ্যখনত হাহাকাৰ পৰিস্থিতিৰ সৃষ্টি হৈছে ৷
শুকুৰবাৰে পুৱাৰ পৰাই গুৱাহাটী চিকিৎসা মহাবিদ্যালয় আৰু আন স্পৰ্শকাতৰ এলেকা সমূহ ভ্ৰমণ কৰিছে স্বাস্থ্যমন্ত্ৰী ডঃ হিমন্ত বিশ্ব শৰ্মাই ৷ ইতিমধ্যে বি. বৰুৱা কৰ্কট প্ৰতিষ্ঠান সাময়িকভাৱে বন্ধ কৰি দিয়াৰ লগতে, গুৱাহাটী চিকিৎসা মহাবিদ্যালয়ো নতুন ৰোগীৰ বাবে বন্ধ কৰা হৈছে ৷ কন্টেইনমেন্ট জ'ন হিচাপে ঘোষণা কৰা হৈছে গুৱাহাটী চিকিৎসা মহাবিদ্যালয়ৰ 1 আৰু 5 নং হোষ্টেল ৷ আনহাতে বিয়লিলৈ আহ্বান জনোৱা হৈছে কেবিনেটৰ জৰুৰীকালীন বৈঠক ৷ এই বৈঠকত সিদ্ধান্ত গ্ৰহণ কৰা হ'ব পৰৱৰ্তী কাৰ্যপন্থাৰ ৷ অসম ৰে'ড জ'নলৈ গতি কৰাৰো সম্ভাৱনা প্ৰকট হৈছে বৰ্তমান পৰিস্থিতিত ৷
আনহাতে, লক্ ডাউনৰ ক্ষেত্ৰতো হয়তো চৰকাৰে নতুনকৈ সিদ্ধান্ত গ্ৰহণ কৰিব ৷ কিয়নো, লক্ ডাউন শিথিলৰ পাচতে ৰাজ্যৰ বিভিন্ন স্থানত অনাৱশ্যকীয় ভিৰ পৰিলক্ষিত হৈছে ৷ সামাজিক দূৰত্বৰ নিৰ্দেশ পাহৰি মানুহে ব্যাপক ৰূপত নিজৰ বিপদ চপায় লোৱা যেন ভাৱ হৈছে ৷ যাৰ ফলত পুনৰ অসমে এক ভয়ংকৰ দিশলৈ গতি কৰিবলৈ ধৰিছে ৷
জ'ন সমূহৰ বিষয়ে কিছু কথা জানো আহক :
COVID-19 আক্ৰান্তৰ সংখ্যা আৰু পৰিস্থিতিৰ ভিত্তিত অঞ্চল সমূহক তিনিটা জ'নত বিভক্ত কৰা হৈছে ৷ ৰে'ড জ'ন, অৰেঞ্জ জ'ন আৰু গ্ৰীণ জ'ন ৷
যি সমূহ এলেকাত প্ৰায় 80 শতাংশ লোক COVID-19ৰ দ্বাৰা আক্ৰান্ত হয় সেই সমূহ অঞ্চলক ৰে'ড জ'ন হিচাপে ঘোষণা কৰা হৈছে ৷ ৰে'ড জ'নত দোকান-বজাৰ, যাতায়াত আদি সকলো সম্পূৰ্ণৰূপে বন্ধ কৰি দিয়া হয় ৷ ভাৰতৰ স্বাস্থ্য মন্ত্ৰণালয়ে প্ৰকাশ কৰা অনুসৰি সমগ্ৰ দেশত 170 টা স্পৰ্শকাতৰ অঞ্চলক ৰে'ড জ'ন হিচাপে চিহ্নিত কৰা হৈছে ৷
যি সমূহ এলেকাত COVID-19 আক্ৰান্তৰ সংখ্যা তুলনামূলকভাৱে ৰে'ড জ'নতকৈ কম সেই সমূহ অঞ্চলক চিহ্নিত কৰা হৈছে অৰেঞ্জ জ'ন হিচাপে ৷ য'ত মাত্ৰ কেইটামান আক্ৰান্তৰ ঘটনা চিনাক্ত হয় আৰু এই পৰিসংখ্যা বৃদ্ধি নাপায়, সেই অঞ্চল সমূহ অৰেঞ্জ জ'নত অন্তৰ্ভুক্ত কৰা হৈছে ৷ অৰেঞ্জ জ'নত কিছুমান অত্যাৱশ্যকীয় সামগ্ৰীৰ দোকান খুলিবলৈ আৰু জৰুৰীকালীন বাহন চলাচলৰ বাবে অনুমতি দিয়া হয় ৷
গ্ৰীণ জ'নৰ অন্তৰ্ভুক্ত কৰা হৈছে সেই সমূহ অঞ্চলক, য'ত 21 দিন ধৰি এটাও COVID-19 আক্ৰান্ত চিনাক্ত হোৱা নাই ৷ গ্ৰীণ জ'নৰ অন্তৰ্ভুক্ত অঞ্চলত অৱশ্যে কিছু নীতি নিৰ্দেশনাৰ মাজেৰে ব্যৱসায়িক প্ৰতিষ্ঠান খোলাৰ অনুমতি প্ৰদান কৰে চৰকাৰে ৷ তাৰোপৰি কম সংখ্যক যাত্ৰীৰে বাহন চলাচলৰো অনুমতি প্ৰদান কৰা হৈছে গ্ৰীণ জ'নত ৷ তাৰোপৰি গ্ৰীণ জ'নত চৰকাৰী-বেচৰকাৰী কাৰ্যালয়, বেংক আদিতো অৰ্ধ সংখ্যক কৰ্মচাৰীৰে কাম-কাজ চলোৱাৰ বাবে নিৰ্দেশ দিছে প্ৰশাসনে ৷
অসমত যিহেতু বৰ্তমান পৰিস্থিতি পুনৰ সংকটাপন্ন হোৱা পৰিলক্ষিত হৈছে, গতিকে পুনৰ লক্ ডাউন ঘোষণাৰ উপৰিও বহু কেইটা অঞ্চলক ৰে'ড আৰু অৰেঞ্জ জ'নত অন্তৰ্ভুক্ত কৰা হ'ব বুলি ধাৰণা কৰিব পাৰি ৷
লগতে পঢ়ক : একেদিনাই অসমত 8 গৰাকী COVID-19ত আক্ৰান্ত চিনাক্ত
