নিউজ ডেস্ক, 12 জানুৱাৰী: পুৰণি ঘৰখনে হাতবাউলি মাতিলে কংগ্ৰেছ নেতা অপূৰ্ব কুমাৰ ভট্টাচাৰ্যক ৷ ভাল দিন-বাৰ, মাহেন্দ্ৰ ক্ষণ এটা চাই শীঘ্ৰেই উভতি যাব আগৰ ঘৰখনলৈ ৷ ভোগালীৰ জলপান খাই, মেজিৰ জুইৰ শক্তিৰে উজ্জীৱিত হৈ মাঘত পুৰণি ঘৰখনলৈ ঢাপলি মেলিব অসম কংগ্ৰেছৰ সাধাৰণ সম্পাদকগৰাকীয়ে ৷
অসম জাতীয়তাবাদী যুৱ ছাত্ৰ পৰিষদৰ নেতৃত্ব বহন কৰাৰে পৰা এজন জাতীয়তাবাদী নেতা হিচাবে পৰিচিত ভট্টাচাৰ্যই যুৱ ছাত্ৰ পৰিষদ ত্যাগ কৰাৰ পিচতেই যোগ দিছিল অসম গণ পৰিষদত ৷ তেওঁৰ যোগদানে অগপক যেন দিছিল এক নতুন মাত্ৰা ৷ প্ৰথমে দলৰ মুখপাত্ৰ, তাৰ পিচত দলৰ সাধাৰণ সম্পাদক আৰু এটা সময়ত দলটোৰ উপ-সভাপতিৰ পদতো অধিস্থিত হৈছিল তেওঁ ৷ কিন্তু 2013 চনত তেওঁ ত্যাগ কৰে অসম গণ পৰিষদ ৷ 2013 চনৰ 19 জুনত অগপৰ তেতিয়াৰ সভাপতি প্ৰফুল্ল কুমাৰ মহন্তৰ হাতত পদত্যাগ পত্ৰ দাখিল কৰি দলটো এৰি থৈ আহিছিল অপূৰ্ব কুমাৰ ভট্টাচাৰ্যই৷ পদত্যাগ পত্ৰ দাখিলৰ পূৰ্বে তেওঁ সাক্ষাৎ কৰিছিল তদানীন্তন মুখ্যমন্ত্ৰী প্ৰয়াত তৰুণ গগৈক ৷
প্ৰফুল্ল কুমাৰ মহন্তৰ বিৰুদ্ধে স্বৈৰাচাৰিতাৰ লগতে কেতবোৰ অভিযোগ উত্থাপন কৰি অগপৰ সাধাৰণ সদস্যৰ পদো ত্যাগ কৰিছিল বৰ্তমানৰ অসম প্ৰদেশ কংগ্ৰেছৰ প্ৰদেশ কংগ্ৰেছৰ সাধাৰণ সম্পাদকগৰাকীয়ে ৷ পৰৱৰ্তী সময়ত তেওঁ কংগ্ৰেছ দলত যোগদান কৰি দলটোৰ গুৰুত্বপূৰ্ণ দায়িত্ব লাভ কৰে ৷
