নিউজ ডেস্ক, 5 মাৰ্চ : শেহতীয়াকৈ ৰাজ্যৰ শাসকীয় দল বিজেপিৰ বিৰুদ্ধে বিভিন্ন মহলত উত্থাপিত হৈছে চান্দা সংগ্ৰহৰ অভিযোগ ৷ বিশেষকৈ অৰুনোদয় আচনি লাভ কৰা হিতাধীকাৰী সকলৰ পৰা চান্দা সংগ্ৰহৰ অভিযোগ উত্থাপিত হৈছে বিজেপিৰ একাংশ দলীয় কৰ্মীৰ বিৰুদ্ধে (Illegal fund collection using BJP'S name) ৷ এনে সময়তে, শনিবাৰে দেখা গ’ল এক ব্যতিক্ৰমী দৃশ্য ৷ সচৰাচৰ চান্দা সংস্কৃতিৰ বিৰোধ কৰি অহা ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাই গ্ৰহণ কৰিলে বিশেষ পদক্ষেপ ৷
বিজেপি দলৰ নামত চান্দা সংগ্ৰহ কৰা ৰচিদৰ ফটো এগৰাকী টুইটাৰ ব্যৱহাৰকাৰীয়ে আপলোড কৰাৰ লগে লগে অসম আৰক্ষীক শীঘ্ৰে ব্যৱস্থা লোৱাৰ নিৰ্দেশ টুইটাৰ যোগেই দিলে মুখ্যমন্ত্ৰীয়ে ৷ উল্লেখযোগ্য যে, সৰ্বাধিক 19,000 টকাৰ চান্দা সংগ্ৰহ কৰাৰ অনুমতি থকা ৰচিদখনত আছে, এক লাখ টকা সংগ্ৰহ কৰাৰ কথা ৷
ইফালে, মুখ্যমন্ত্ৰীৰ নিৰ্দেশৰ লগে লগে মুখ্যমন্ত্ৰীৰ টুইটত ৰিপ্লাই কৰিলে অসম আৰক্ষীৰ বিশেষ সঞ্চালক প্ৰধান জিপি সিঙে ৷ মুখ্যমন্ত্ৰীৰ নিৰ্দেশক সন্মান জনাই শীৰ্ষ আৰক্ষী বিষয়া গৰাকীয়ে অৱগত কৰিলে যে শীঘ্ৰেই এই সন্দৰ্ভত উপযুক্ত ব্যৱস্থা লোৱা হ’ব ৷
লগতে পঢ়ক : ইউক্ৰেইনৰ পৰা অসমলৈ ঘূৰি অহা ছাত্ৰীৰ বৰ্ণনা :বাংকাৰৰ ভিতৰতে দুদিন লুকাই আছিলো আমি
