গুৱাহাটী , ১ ছেপ্তেম্বৰ : দেশজুৰি আজিৰে পৰা আৰম্ভ হোৱা 'ৰাষ্ট্ৰীয় পোষণ মাহ ২০২১'ৰ সৈতে সংগতি ৰাখি ৰাজ্য চৰকাৰৰ সমাজ কল্যাণ বিভাগৰ উদ্যোগত বুধবাৰে 'পোষণ মাহ'ৰ শুভ উদ্বোধনী অনুষ্ঠানৰ আয়োজন কৰা হয় ৷ গুৱাহাটীৰ শ্ৰীশ্ৰী মাধৱদেৱ আন্তৰ্জাতিক প্ৰেক্ষাগৃহত আয়োজিত অনুষ্ঠানত মুখ্যমন্ত্ৰী ড৹ হিমন্ত বিশ্ব শৰ্মাই 'ৰাষ্ট্ৰীয় পোষণ মাহ'ৰ বিভিন্ন কাৰ্যসূচীৰ আনুষ্ঠানিকভাৱে শুভাৰম্ভণি কৰে ৷ ৰাষ্ট্ৰীয় পোষণ মাহৰ অংশ হিচাপে ছেপ্টেম্বৰ মাহৰ প্ৰথম সপ্তাহটো 'মাতৃ বন্দনা সপ্তাহ' হিচাপে পালন কৰা হ'ব বুলি জানিব পৰা গৈছে ৷
এই 'মাতৃ বন্দনা সপ্তাহ' কাৰ্যসূচীৰ মুখ্য উদ্দেশ্য হৈছে 'প্ৰধানমন্ত্ৰী মাতৃ বন্দনা যোজনা'ৰ অধীনত প্ৰথমবাৰলৈ গৰ্ভধাৰণ কৰা মহিলাসকলৰ পঞ্জীয়ন কৰি তিনিটা কিস্তিত ৫০০০ টকাকৈ প্ৰদান কৰা ৷ তেওঁলোকে যাতে নিজৰ স্বাস্থ্যৰ যত্ন ল'ব পাৰে তাৰ প্ৰতি লক্ষ্য ৰাখি এই পদক্ষেপ হাতত লোৱা হৈছে ৷
একেটা অনুষ্ঠানতে মুখ্যমন্ত্ৰীগৰাকীয়ে পোষণ মাহ উদযাপনৰ অংশ হিচাপে "অন্নপ্ৰাসন্ন" অনুষ্ঠানতো অংশগ্ৰহণ কৰে ৷
ইয়াৰ উপৰিও জনসাধাৰণৰ মাজত পোষণ মাহৰ সজাগতা বৃদ্ধিৰ বাবে ৩খনকৈ বাছ পোষণ সম্পৰ্কীয় তথ্যৰে সমৃদ্ধ কৰি ৰাজ্যখনৰ বিভিন্ন প্ৰান্তলৈ প্ৰেৰণ কৰাৰ ব্যৱস্থা কৰা হৈছে ৷ 'Poshan On Wheel' নামেৰে নামাকৰণ কৰা এই বিশেষ তিনিখন বাছৰ আজি ফ্লেগ অফ্ কৰে মুখ্যমন্ত্ৰী ড৹ হিমন্ত বিশ্ব শৰ্মাই ৷ অনুষ্ঠানত মন্ত্ৰী অজন্তা নেওগ, মন্ত্ৰী অতুল বৰা, সাংসদ কুইন ওজাৰ লগতে সমাজ কল্যাণ বিভাগৰ শীৰ্ষ বিষয়াসকল উপস্থিত আছিল ৷
লগতে পঢ়ক : প্ৰধানমন্ত্ৰীয়ে মুকলি কৰিলে 125 টকাৰ মুদ্ৰা
