গুৱাহাটী, 14 মে': সমগ্ৰ অসমত লকডাউন দিয়াৰ সম্ভাৱনা নাই যদিও তিনিচুকীয়া, ডিব্ৰুগড় আৰু কামৰূপ মহানগৰ জিলাত যদি পৰিস্থিতি নিয়ন্ত্ৰন নহয়, তেনেহ’লে আৰু অধিক কঠোৰ কৰা হ’ব নীতি-নিয়ম । এই কথা সদৰি কৰে মুখ্যমন্ত্ৰী হিমন্ত বিশ্ব শৰ্মাই । শুকুৰবাৰে গুৱাহাটী চিকিৎসা মহাবিদ্যালয় হাস্পতালত উপস্থিত হৈ মুখ্যমন্ত্ৰী ড৹ হিমন্ত বিশ্ব শৰ্মাই চিকিৎসালয়খনৰ বিভিন্ন বিভাগৰ চিকিৎসক সকলৰ সৈতে আলোচনাত মিলিত হয় ।
চিকিৎসক সকলৰ সৈতে হোৱা আলোচনাৰ অন্তত এক সংবাদমেল সম্বোধন কৰি মুখ্যমন্ত্ৰী শৰ্মাই মন্তব্য কৰে যে, শনিবাৰে পুনৰ নতুন নিৰ্দেশনা জাৰি কৰা হ'ব । এই নতুন নিৰ্দেশনা কেৱল চাহ-বাগানৰ বাবেহে । 13 মে’ৰ পৰা কাৰ্যকৰী হোৱা নিৰ্দেশনাত চাহ বাগান সন্দৰ্ভত কোনো কথা উল্লেখ কৰা হোৱা নাছিল । যাৰ সুবিধা বুজি বহু বাগানৰ মালিকে এই ভয়ংকৰ পৰিস্থিতিৰ মাজতো সন্ধিয়ালৈ কাম কৰোৱাইছিল শ্ৰমিকক । সেয়ে শনিবাৰে কেৱল চাহ বাগান সন্দৰ্ভতে নতুন নিৰ্দেশনা প্ৰকাশ পাব ।
মুখ্যমন্ত্ৰী শৰ্মাই লগতে কয় যে, অসমত বৰ্তমানলৈ লকডাউন সন্দৰ্ভত কোনো চিন্তা চৰ্চা হোৱা নাই । অৱশ্যে পিছলৈ পৰিস্থিতি চাই ব্যৱস্থা লোৱা হ'ব বুলিও মন্তব্য কৰে । মুখ্যমন্ত্ৰী গৰাকীয়ে কয় যে, কণ্টেইনমেণ্ট জ'নৰ ভিতৰত থকা দৰিদ্ৰ সীমাৰেখাৰ তলত থকা লোকক 2 হাজাৰ টকাৰ খাদ্য সামগ্ৰী যোগান ধৰা হ’ব । আনহাতে, ক'ভিডত আক্ৰান্ত হোৱা 50 উৰ্দ্ধৰ ব্যক্তিক 17 মে'ৰ পৰা হাস্পতাল নাইবা ক'ভিড কেয়াৰ চেন্টাৰত থকাতো বাধ্যতামূলক কৰা হ'ব বুলি মুখ্যমন্ত্ৰী গৰাকীয়ে সদৰি কৰে । লগতে 17 মে’ৰ পৰাই গুৱাহাটীত প্ৰতিদিনে 20 হাজাৰ ক'ভিড টেষ্ট কৰোৱা হ'ব বুলিও সদৰি কৰে মুখ্যমন্ত্ৰী গৰাকীয়ে ।
ইফালে অক্সিজেন সন্দৰ্ভত মুখ্যমন্ত্ৰী গৰাকীয়ে কয় যে, বৰ্তমান অসমত পৰ্যাপ্ত পৰিমাণত অক্সিজেন মজুত আছে । ইয়াৰ বাহিৰেও 25 মেট্ৰিক টন কেন্দ্ৰীয় চৰকাৰে প্ৰদান কৰিব । আনহাতে, চুবুৰীয়া ৰাজ্য ত্ৰিপুৰাক এক মেট্ৰিক টন আৰু অৰুণাচলক 5 মেট্ৰিক টন অক্সিজেন প্ৰদান কৰি সংকটৰ এই সময়ত সহায় আগবঢ়াব বুলি মুখ্যমন্ত্ৰী শৰ্মাই সদৰি কৰে । সেইদৰে ক'ভিড ৰোগীৰ বাবে তিনি হাজাৰ অতিৰিক্ত বিচনা নিৰ্মান কৰাৰ কথাও মুখ্যমন্ত্ৰী গৰাকীয়ে উল্লেখ কৰে ।
ইফালে তিনিচুকীয়া আৰু ডিব্ৰুগড়লৈ ক'ভিড পৰিস্থিতিৰ বুজ লোৱাৰ বাবে যাব ড৹ হিমন্ত বিশ্ব শৰ্মা । উল্লেখ্য যে, ডিগবৈৰ গ্ৰেনেড বিস্ফোৰণ সন্দৰ্ভত তদন্তৰ নিৰ্দেশ দিয়াৰ কথা সদৰি কৰে মুখ্যমন্ত্ৰীয়ে ।
শুকুৰবাৰৰ এই বৈঠকত গুৱাহাটী মেডিকেল কলেজ হাস্পতালৰ অধ্যক্ষ অচ্যুত বৈশ্য, ৰাষ্ট্ৰীয় স্বাস্থ্য মিছনৰ পৰিচালন সঞ্চালক আৰু কাৰ্যবাহী সঞ্চালকসহ কেইবাজনো বিষয়া আৰু চিকিৎসক উপস্থিত আছিল ।
লগতে পঢ়ক: ২১ মে'ত শপত ল’ব নৱ-নিৰ্বাচিত বিধায়কে
