গুৱাহাটী, ১২ ফেব্ৰুৱাৰী: সুদীৰ্ঘ সময় বিপিএফৰ বিধায়ক আৰু সাংসদ হৈ ৰাজভোগ গ্ৰহণ কৰাৰ পিছত এইবাৰ আকৌ ৰাজ্যসভালৈ মন মেলিছে বিশ্বজিৎ দৈমাৰী । পিছে এইবাৰ বি পি এফ নহয়, বিজেপিৰ প্ৰাৰ্থী হিচাপেহে ৰাজ্যসভালৈ যাবলৈ তেওঁ সাজু হৈছে । ইতিমধ্যে বিধানসভাৰ সচিবালয়ৰ পৰা মনোনয়ন প্ৰ-পত্ৰও বিশ্বজিৎ দৈমাৰীয়ে সংগ্ৰহ কৰিছে । মনকৰিবলগীয়া যে মাত্ৰ দুমাহ পূৰ্বে তেওঁ বি পি এফ ত্যাগ কৰি বিজেপিত যোগ দিছিল । সাংবিধানিক নীতি নিয়ম অনুসৰি দল সলনি কৰাৰ বাবে ৰাজ্যসভাৰ সাংসদ পদো তেওঁ ত্যাগ কৰিবলৈ বাধ্য হৈছিল । সাংসদ পদৰ পৰা ইস্তাফা দিয়া হেতুকে ৰাজ্যসভাত খালি হোৱা সেইখন আসনৰ বাবে ১ মাৰ্চত অনুষ্ঠিত হ'ব উপ-নিৰ্বাচন ।
ইতিমধ্যে উপ-নিৰ্বাচনৰ অধিসূচনাও জাৰি কৰা হৈছে । নিজৰেই খালি হোৱা উক্ত আসনখনৰ বাবে পুনৰ বিজেপিৰ প্ৰাৰ্থী হিচাপে ৰাজ্যসভালৈ যাবলৈ প্ৰস্তুত হৈছে বিশ্বজিৎ দৈমাৰী । আনহাতে মনোনয়ন দাখিলৰ অন্তিম দিন হৈছে ১৮ ফেব্ৰুৱাৰী । ১৯ ফেব্ৰুৱাৰীত মনোনয়নসমূহ পৰীক্ষা কৰা হ'ব আৰু ২২ ফেব্ৰুৱাৰী হৈছে মনোনয়ন প্ৰত্যাহাৰৰ অন্তিম দিন ।
