গুৱাহাটী, ৬ ছেপ্টেম্বৰ : গুৱাহাটী বিশ্ববিদ্যালয়ৰ অধ্যাপক ড৹ প্ৰফুল্ল কুমাৰ নাথে সম্পাদনা কৰা বঙ্গাল বঙ্গালনী নাটক লৈ বিতৰ্কৰ সৃষ্টি হোৱাৰ পিছতে সোমবাৰে গুৱাহাটী প্ৰেছ ক্লাৱত এক সংবাদমেল সম্বোধন কৰে অধ্যাপক গৰাকীয়ে ৷ বঙ্গাল বঙ্গালনী শীৰ্ষক ৰুদ্ৰৰাম বড় দলৈৰ নাটকখন ১৮৭১ চনত শিৱসাগৰ মিছন প্ৰেছৰ পৰা প্ৰকাশ হৈ ওলাইছিল । ২০১৪ চনত নগাঁও ছোৱালী মহাবিদ্যালয়ৰ অৱসৰপ্ৰাপ্ত অধ্যাপক ড৹ জ্যোতিৰ্ময় জানাৰ সম্পাদনাত ভৱানী বুকছৰ দ্বাৰা ৰুদ্ৰৰাম বড় দলৈৰ বঙ্গাল বঙ্গালনী নাটক, মূল নাটক আৰু আলোচনা শীৰ্ষক নামেৰে প্ৰকাশ হয় ।
লগতে পঢ়ক : গুৱাহাটী বিশ্ববিদ্যালয়ৰ অধ্যাপকৰ বিৰুদ্ধে বৌদ্ধিক সম্পদ চুৰিৰ অভিযোগ
পৰৱৰ্তী সময়ত ২০১৭ চনত বঙ্গাল বঙ্গালনী নাটক নামেৰে ড৹ প্ৰফুল্ল কুমাৰ নাথৰো এক সম্পাদনা প্ৰকাশ পায় । কিন্তু ড৹ জানাই অধ্যাপকজনৰ বিৰুদ্ধে অভিযোগ আনিছে যে, তেওঁ সম্পাদনাৰ ক্ষেত্ৰত সমলখিনি বহু ঠাইত ড৹ জানাৰ ভাষাৰে সন্নিৱিষ্ট কৰিছে আৰু গ্ৰন্থস্বত্ত্ব আইন ভংগ কৰিছে । ড৹ নাথে কয় য়ে, জ্ঞাতে বা অজ্ঞাতে কিবা ভুল হ’ব পাৰে । ড৹ জানাক আইনৰ ওচৰলৈ নগৈ গুৱাহাটী বিশ্ববিদ্যালয়ৰ অসমীয়া বিভাগলৈ সদিচ্ছাৰে আহি আলোচনা কৰিবলৈ আহ্বান জনাই অধ্যাপক গৰাকীয়ে ।
