গুৱাহাটী, ১ ছেপ্টেম্বৰ: ৰাজ্যৰ ৰাষ্ট্ৰীয় ঘাইপথসমূহৰ অৱস্থা অধিক শোচনীয় হৈ পৰাত বৰ্ত্তমান সময়ত যাতায়াত ব্যৱস্থা অসহনীয় হৈ পৰিছে । বৃদ্ধি পাইছে দুৰ্ঘটনাৰ সংখ্যা । এক কথাত ক'বলৈ গ'লে ৰাষ্ট্ৰীয় ঘাইপথসমূহ মৰণফান্দত পৰিণত হৈছে । এনে এক পৰিস্থিতিৰ মাজতো কিন্তু কেন্দ্ৰই ৰাষ্ট্ৰীয় ঘাইপথসমূহ মেৰামতি কৰাৰ বিপৰীতে টোলকৰ সংগ্ৰহতহে অধিক মনোনিৱেশ কৰিছে ।
লক্ষণীয় বিষয় যে কৰ সংগ্ৰহৰ লক্ষ্যৰে অসমত এখনৰ পাছত আন এখনকৈ টোলগেট স্থাপন কৰিছে চৰকাৰে । ৰাজ্যত বৰ্তমান কাৰ্যকৰী হৈ থকা টোলগেটসমূহত ৰাইজে বৰ্ধিত হাৰত টোল দি আহিছে । এইবাৰ ৰাজ্যত পুনৰ ১৮খন কৈ টোলগেট স্থাপনৰ বাবে পদক্ষেপ গ্ৰহণ কৰিছে চৰকাৰে ।
উল্লেখ্য যে ৰাজ্যত বৰ্তমান কাৰ্যকৰী হৈ থকা টোলগেটসমূহৰ যোগেদি চৰকাৰে বুজন পৰিমাণৰ ৰাজহ সংগ্ৰহ কৰিছে । ৰাজহ সংগ্ৰহৰ ক্ষেত্ৰত সৰ্বাধিক গুৰুত্ব দিয়া নৰেন্দ্ৰ মোদী নেতৃত্বাধীন কেন্দ্রীয় চৰকাৰখনে এটা বছৰতে টোলগেটৰ জৰিয়তে অসমৰ পৰা সংগ্ৰহ কৰিছে প্ৰায় ৪৬৬ কোটি টকা ।
মেৰামতিৰ অভাৱত ৰাজ্যৰ ৰাষ্ট্ৰীয় ঘাইপথসমূহে ভয়ংকৰ ৰূপ ধাৰণ কৰাৰ সময়তে এই তথ্য প্ৰকাশ কৰিছে খোদ কেন্দ্ৰীয় চৰকাৰে । কেন্দ্ৰীয় পথ পৰিবহণ আৰু ৰাষ্ট্ৰীয় ঘাইপথ মন্ত্ৰালয়ে প্ৰকাশ কৰা তথ্য মতে ২০২২-২৩ বিত্তীয় বৰ্ষত অসমত ৪৬৫.৯০ কোটি টকাৰ টোল মাচুল সংগ্রহ হৈছে ।
উল্লেখ্য যে কেন্দ্রীয় চৰকাৰৰ নিয়ম অনুসৰি এখন টোলগেট পৰা আন এখন টোলগেটৰ দূৰত্ব কমেও ৬০ কিলোমিটাৰ হ’ব লাগে । কিন্তু অসমত একমাত্র ৰাজহ সংগ্ৰহৰ বাবেই এই নিয়ম ভংগ কৰি চাৰিখনকৈ টোলগেট ৬০ কিলোমিটাৰৰ কম ব্যৱধানত স্থাপন কৰা হৈছে ।
তথ্য অনুসৰি মদনপুৰ আৰু নাজিৰাখাটত স্থাপন কৰা দুখন টোলগেটৰ মাজৰ দূৰত্ব হৈছে ৫৯ কিলোমিটাৰ । একেদৰে দাহালপাৰা আৰু পাটগাঁৱৰ মাজৰ দুখন টোলগেটৰ দূৰত্ব ৫৪ কিলোমিটাৰ, মিকিৰআটি আৰু ৰহাত স্থাপন হোৱা টোলগেট দুখনৰ মাজৰ ব্যৱধান ৫৩ কিলোমিটাৰ আৰু গলিয়া-দাহালপাৰা টোলগেট দুখনৰ দূৰত্ব হৈছে ৪৬ কিলোমিটাৰ ।
কিছু দিন পূর্বে কেন্দ্ৰীয় চৰকাৰে এনে টোলগেটসমূহ বন্ধ কৰা হ’ব বুলি ঘোষণা কৰিছিল যদিও অসমত আজিলৈকে নিয়ম ভংগ কৰি স্থাপন কৰা এখনো টোলগেট বন্ধ কৰা হোৱা নাই । ইফালে ৰাজ্যত বৰ্তমান কার্যক্ষম হৈ থকা টোলগেটৰ সংখ্যা হৈছে ৯খন । এই ৯খন টোলগেটৰ উপৰি ৰাজ্যখনত অনাগত দিনত ১৮খন নতুন টোলগেট স্থাপন কৰাৰ লক্ষ্য হাতত লৈছে কেন্দ্ৰীয় চৰকাৰে । ইয়াকে ধৰি আগন্তুক দিনত ৰাজ্যখনত টোলগেটৰ সংখ্যা ২৭খনলৈ বৃদ্ধি পাব ।
লক্ষণীয় বিষয় যে আজিৰ তাৰিখত এখন টোলগেট অতিক্ৰম কৰিলে এখন ব্যক্তিগত বাহনে অতিকমেও প্রায় ১৩৫ টকা মাচুল ভৰিব লাগে । এনে পৰিস্থিতিত ৰাজ্যখনত টোলগেটৰ সংখ্যা ২৭ খনলৈ বৃদ্ধি পালে কি পৰিস্থিতিৰ কি হ'ব সেয়া সহজে অনুমেয় । ইফালে প্ৰতি বছৰে কেন্দ্ৰীয় চৰকাৰে আকৌ ৫-১৫ শতাংশ পর্যন্ত টোল মাচুল বৃদ্ধি কৰি আহিছে ।
যাৰ ফলত সাধাৰণ জনতাৰ মূৰত মাধমাৰ পৰিছে । কাৰণ টোল মাচুল বৃদ্ধি পোৱাৰ লগে লগে পৰিবহন ব্যয় বৃদ্ধি পায় আৰু যাৰ ফলত সামগ্ৰীৰ মূল্য বৃদ্ধি হয় । সেইদৰে বাছৰ ভাৰাও বৃদ্ধি হয়। কেন্দ্ৰীয় চৰকাৰে ৰাষ্ট্ৰীয় ঘাইপথ সমূহৰ মেৰামতিৰ বাবেই টোল মাচুল সংগ্ৰহ কৰা হয় বুলি প্ৰকাশ কৰি আহিছে যদিও অসমত ৰাষ্ট্ৰীয় ঘাইপথসমূহ মেৰামতি কৰা হোৱা নাই ।
বৰ্তমান সময়তো ৰাজ্যখনৰ বিভিন্ন স্থানত মেৰামতিৰ অভাৱত ৰাষ্ট্ৰীয় ঘাইপথসমূহে ভয়ংকৰ ৰূপ ধাৰণ কৰিছে । প্রতিদিনেই পথ দুৰ্ঘটনাৰ সংখ্যাও বৃদ্ধি পাবলৈ ধৰিছে । কিন্তু ইয়াৰ পাছতো পথসমূহ মেৰামতিৰ ক্ষেত্ৰত গুৰুত্ব দিয়া নাই চৰকাৰখনে । সুবিধা দিয়াৰ বিপৰীতে জনতাৰ ওপৰত কৰৰ বোজা জাপি দি ৰাজহ সংগ্ৰহতেই ব্যস্ত আছে বিজেপি চৰকাৰ ।
লগতে পঢ়ক: Tollgate in Assam: অসমত পুনৰ টোলগেট আৰম্ভ কৰিলে তীব্ৰ প্ৰতিবাদ হ’ব; শংকৰজ্যোতি বৰুৱা
