গুৱাহাটী, ১১ আগষ্ট : অসমৰ জাতীয় জীৱনৰ বাবে অভিশাপ স্বৰূপ বান-খহনীয়াই প্ৰত্যেক বছৰে ৰাজ্যখনৰ বিস্তৰ ক্ষতিসাধন কৰি আহিছে । ৰাজ্যৰ বিভিন্ন দল-সংগঠন তথা জনতাই বান-খহনীয়া সমস্যাক ৰাষ্ট্ৰীয় সমস্যা হিচাপে স্বীকৃতি দি ইয়াৰ স্থায়ী সমাধানৰ বাবে দশক দশক ধৰি দাবী জনাই আহিছে যদিও কোনো এখন চৰকাৰেই গুৰুত্ব দিয়া নাই । বিজেপি দল শাসনলৈ অহাৰ পাছত অসমৰ ৰাইজে এই সমস্যাৰ স্থায়ী সমাধান হ'ব বুলি আশা কৰিছিল যদিও সকলো আশাত চেঁচাপানী পৰিল । বৰং বিজেপি চৰকাৰে বান সমস্যাৰ স্থায়ী সমাধানৰ কথা বহু দূৰৈৰে প্ৰয়োজনীয় ক্ষতিপূৰণ দিয়াৰ ক্ষেত্রতো কৃপণালি কৰি আহিছে ।
বানত ক্ষতিগ্রস্ত জনতাক আর্থিকভাৱে সকাহ দিয়াৰ ক্ষেত্ৰত কেন্দ্ৰীয় চৰকাৰে সদায়ে কার্পণ্য কৰি আহিছে । ইতিমধ্যে বহুবাৰ প্ৰমাণিত হোৱা এই কথা সংসদৰ মজিয়াতো উন্মোচিত হৈছে । ৰাজ্যসভাত অসমৰ বান সমস্যা সন্দৰ্ভত দাখিল কৰা তথ্য অনুসৰি, ২০১৭ চনৰ পৰা ২০২১ চনলৈ বিগত পাঁচ বছৰত হোৱা বানত ৰাজ্যখনৰ ক্ষতি হৈছে মুঠ ১৩,২৭৯.৯৮ কোটি টকাৰ । ইয়াৰ বিপৰীতে বিগত পাঁচ বছৰত কেন্দ্ৰীয় চৰকাৰে অসমক প্ৰদান কৰিছে মাত্র ৩১৬০.২৭ কোটি টকা । ইয়াৰে ভিতৰত ৰাজ্যিক দুর্যোগ সাহায্য পুঁজি (এছডিআৰএফ) শিতানত কেন্দ্ৰই প্ৰদান কৰিছে ২৮৬৫.৯ কোটি টকা আৰু ৰাষ্ট্ৰীয় দুর্যোগ সাহায্য পুঁজি (এনডিআৰএফ) শিতানত প্ৰদান কৰিছে ২৯৪.৩৭ কোটি টকা ।
তথ্য মতে, ২০১৭ চনত অসমত হোৱা বানত ৪১৬৪.৮১ কোটি, ২০১৮ চনত ২৪৮০.৯৮ কোটি, ২০১৯ চনত ৩,১২১.৯৮ কোটি, ২০২০ চনত ২,৪৩৯.৭৩ কোটি আৰু ২০২১ চনত ১,০৭২.৪৩ কোটি টকাৰ ক্ষতি হৈছিল । ইয়াৰ বিপৰীতে কেন্দ্ৰীয় চৰকাৰে এছডিআৰএফ শিতানত ২০১৮-১৯ চনত ধার্য কৰা ৫৩২ কোটিৰ ভিতৰত নিজৰ অংশ ৪৭৮.৮০ কোটি, ২০১৯-২০ চনত ধার্য কৰা ৫৫৯ কোটিৰ ভিতৰত নিজৰ অংশ ৫০৩.১০কোটি, ২০২০-২১ চনত ধাৰ্য কৰা ৬৮৬.৪০ কোটিৰ ভিতৰত নিজৰ অংশ ৬১৭.৬০ কোটি, ২০২১-২২ চনত ধাৰ্য কৰা ৬৮৪.৪০ কোটিৰ ভিতৰত নিজৰ অংশ ৬১৭.৬০ কোটি আৰু ২০২২-২৩ চনত ধার্য কৰা ৭২০.৮০ কোটিৰ ভিতৰত নিজৰ অংশ ৬৪৮.৮০ কোটি টকা মোকলাই দিছে ।
নিয়ম অনুসৰি এছডিআৰএফৰ ধনৰ দহ শতাংশ ৰাজ্য চৰকাৰে আৰু ৯০ শতাংশ কেন্দ্ৰীয় চৰকাৰে প্ৰদান কৰে । আনহাতে, এনডিআৰএফৰ ধনৰ এশ শতাংশই কেন্দ্ৰই দিব লাগে । যাৰ বাবে এনডিআৰএফৰ শিতানত কেন্দ্ৰীয় চৰকাৰে ধন দিবলৈ টান পায় । বিগত পাঁচ বছৰত অসমত বানে ১৩,২৭৭.৯৩ কোটি টকাৰ ক্ষতি কৰাৰ পাছতো কেন্দ্ৰীয় চৰকাৰে এনডিআৰএফ শিতানত মুকলি কৰি দিছে মাত্র ২৯৪.৩৭ কোটি টকাহে । এয়া হৈছে মোদী চৰকাৰৰ অসম প্ৰীতিৰ প্ৰকৃত নমুনা ।
উল্লেখ্য যে চলিত বৰ্ষত হোৱা বানতো ৰাজ্যখনত হোৱা ক্ষতিৰ পৰিমাণ কেইবা হাজাৰ কোটি টকা হোৱাৰ আশংকা আছে । কিন্তু কেন্দ্ৰীয় চৰকাৰে ২০২৩-২৪ চনত এছডিআৰএফ শিতানত ধার্য কৰিছে মাত্র ৭৫৬.৮০ কোটি টকাহে । ইয়াৰ ভিতৰত কেন্দ্ৰই প্ৰদান কৰিবলগীয়া ধনৰ অংশৰ ৬৮০.৮০ কোটিৰ ভিতৰত এতিয়ালৈকে মোকলাই দিছে ৩৮০.৮০ কোটি টকাহে । অসমৰ ভয়াৱহ বান সমস্যাক লৈ যে কেন্দ্ৰৰ কোনো ধৰণৰ গুৰুত্ব নাই সেই কথা ইয়াৰ দ্বাৰা সহজতে অনুমান কৰিব পাৰি ।
অসমসহ উত্তৰ-পূৰ্বাঞ্চলক মাথোঁ নামতহে নৰেন্দ্ৰ মোদী চৰকাৰে অষ্টলক্ষ্মী আখ্যা দিয়ে । কাৰ্যক্ষেত্রত অসমৰ প্ৰতি কোনো ধৰণৰ আন্তৰিকতা নাই মোদী চৰকাৰৰ । কেন্দ্ৰই অসমৰ বান সমস্যাক কেতিয়াও অলপো গুৰুত্ব সহকাৰে লোৱা নাই । অসমৰ বিভিন্ন দল-সংগঠনে বান সমস্যাক ৰাষ্ট্ৰীয় সমস্যা হিচাপে ঘোষণা কৰাৰ দাবীক নসাৎ কৰি আহিছে কেন্দ্ৰই ।
লগতে পঢ়ক :Chokighat Bridge : জীয়া ভৰলীত হ’ব দ্বিতীখন দলং; তেজপুৰৰ পৰা জামুগুৰিলৈ কমিব দূৰত্ব
