গুৱাহাটী, ১ অক্টোবৰ : অসম আৰক্ষীৰ বীৰ-শ্বহীদসকলক স্মৰণ কৰি দেওবাৰে ৰাজ্যজুৰি ‘‘অসম আৰক্ষী দিৱস’’ উদযাপন কৰা হয় । গুৱাহাটীৰ কাহিলিপাৰাস্থ চতুৰ্থ অসম আৰক্ষীৰ বাহিনীৰ মুখ্য কাৰ্যালয়ত আয়োজন কৰা অসম আৰক্ষী দিৱসৰ মূল কাৰ্যসূচীত মুখ্য অতিথি হিচাপে অংশ গ্ৰহণ কৰে আই বিৰ সঞ্চালক তপন কুমাৰ ডেকাই । অনুষ্ঠানত অসম আৰক্ষীৰ আকৰ্ষণীয় কুচ-কাবাজ প্ৰদৰ্শন কৰা হয় ।
আনহাতে, মুখ্য অতিথি আই বিৰ সঞ্চালক তপন কুমাৰ ডেকাই অসম আৰক্ষীৰ মাৰ্চপাচৰ অভিবাদন গ্ৰহণ কৰে । ভাষণ প্ৰসংগত আই বিৰ সঞ্চালক তপন কুমাৰ ডেকাই কয় যে অসম আৰক্ষীত কাম কৰাৰ অভিজ্ঞতাই তেওঁক আগুৱাই যোৱাত বিশেষভাৱে সহায় কৰিছিল ।
অসম আৰক্ষীৰ অৱদানৰ কথা উল্লেখ কৰি তেওঁ কয় যে তেওঁ য’তেই নাযাওঁক কিয় অসম আৰক্ষীৰ জয়গান গাবলৈ কুণ্ঠাবোধ নকৰে । তেওঁ লগতে কয় যে উত্তৰ-পূবৰ ভূখণ্ডত অসম আৰক্ষীৰ অৱদানৰ বিষয়ে ভাৰতৰ ৰাইজ সম্পূৰ্ণৰূপে অৱগত নহয় । এইক্ষেত্রত আৰু অধিক প্ৰচাৰ কৰা উচিত বুলি তেওঁ কয় ।
অসমৰ আজিৰ এই সুৰক্ষিত পৰিৱেশৰ অন্তৰালত অসম আৰক্ষীৰ বিশেষ ভূমিকা আছে । অনুষ্ঠানত অসম আৰক্ষীৰ সঞ্চালক প্ৰধান জি পি সিঙে অসম আৰক্ষীৰ বীৰ-শ্বহীদসকলক স্মৰণ কৰি অসম আৰক্ষীৰ গৌৰৱোজ্বল ইতিহাসৰ বিষয়ে সদৰী কৰে ।
অসম আৰক্ষীয়ে বহু জটিল পৰিস্থিতিত ৰাজ্যখনৰ বাবে সেৱা আগবঢ়াই আহিছে বুলি উল্লেখ কৰি তেওঁ কয় যে বৰ্তমান সময়ত ৰাজ্যখনত শান্তি বাতাবৰণ গঢ় লৈ উঠিছে । তেওঁ লগতে কয় যে আজিৰ পৰা অসমৰ মাত্র চাৰিখন জিলাত সেনা বাহিনীৰ বিশেষ ক্ষমতা আইন (AFSPA) থাকিব । বাকী জিলাসমূহৰ পৰা সম্পূৰ্ণৰূপে এই আইন আঁতৰ কৰোৱা হৈছে ।
ডিব্ৰুগড়, শিৱসাগৰ, তিনিচুকীয়া আৰু চৰাইদেউৰ বাহিৰে অসমৰ আন জিলা আজিৰে পৰা অশান্ত অঞ্চলৰ পৰা সম্পূৰ্ণৰূপে মুক্ত কৰা হৈছে । অসম আৰক্ষী আজি যিটো পৰ্যায়ত উপনীত হৈছে তাৰ আঁৰত আৰক্ষী জোৱানসকলৰ বিশেষ অৱদান আছে বুলি তেওঁ কয় ।
লগতে তেওঁ গৃহৰক্ষী বাহিনীৰ জোৱানসকলৰ অৱদানৰ কথাও ভাষণত সদৰী কৰে । অনুষ্ঠানত অসম আৰক্ষীৰ ভালেসংখ্যক উচ্চপদস্থ বিষয়া আৰু বিশিষ্ট ব্যক্তি উপস্থিত আছিল । উল্লেখ্য যে, ১৯৫১ চনৰ ১ অক্টোবৰত ভাৰতীয় আৰক্ষী সেৱাৰ বিষয়া কে আৰ চৌধুৰীয়ে প্ৰথম ভাৰতীয় বিষয়া হিচাপে ব্ৰিটিছ আৰক্ষী বিষয়া জে এইচ ৰীডৰ পৰা আনুষ্ঠানিকভাৱে অসম আৰক্ষীৰ মুখ্য বিষয়াৰ কাৰ্যভাৰ গ্ৰহণ কৰিছিল ।
তেতিয়াৰে পৰা এই দিনটোত অসম আৰক্ষীক কৃতজ্ঞতা প্ৰকাশৰ বাবে অসম আৰক্ষী দিৱস উদযাপন কৰি অহা হৈছে । ১৯৫১ চনৰ ১ অক্টোবৰত অসম আৰক্ষী প্ৰধানৰ দায়িত্ব গ্ৰহণ কৰা আই পি এছ কে আৰ চৌধুৰীৰ স্মৰণত প্ৰতি বছৰে ১ অক্টোবৰত অসম আৰক্ষী দিৱস পালন কৰা হয় ।
গুৱাহাটীত কেন্দ্ৰীয়ভাৱে উদযাপন কৰাৰ লগতে ৰাজ্যজুৰি অসম আৰক্ষীৰ গৌৰৱোজ্বল ইতিহাসক স্মৰণ কৰি উলহ-মালহেৰে অসম আৰক্ষী দিৱস উদযাপন কৰা হয় ।
লগতে পঢ়ক : Kuki demands Puducherry like UT : পুডুচেৰীৰ দৰে কেন্দ্ৰীয় শাসিত অঞ্চলৰ দাবী কুকি সংগঠনৰ
