বহিঃৰাজ্যৰ মাছৰ ওপৰত নিৰ্ভৰশীল নহয় অসম

লক ডাউনৰ সময়ছোৱাত মীন বিভাগ আৰু ফিছফেডে অসমৰ উৎপাদিত মাছৰে ৰাজ্যবাসীৰ অভাৱ পূৰণ কৰি প্ৰমাণ কৰিছে এই কথা ৷

গুৱাহাটী, 23 মে': কৰ'ণা ভাইৰাছৰ আতংক আৰু লকডাউনৰ মাজতে অসমৰ মীনপালক সকললৈ সুখবৰ ৷ অসমতে আছে মাছৰ উৎপাদেনেৰে স্বাৱলম্বী হ'ব পৰা পূৰ্ণ সম্ভাৱণা ৷ লক ডাউনৰ সময়ছোৱাত মীন বিভাগ আৰু ফিছফেডে অসমৰ উৎপাদিত মাছৰে ৰাজ্যবাসীৰ অভাৱ পূৰণ কৰি প্ৰমাণ কৰিছে এই কথা ৷ লকডাউনৰ বাবে বহিঃৰাজ্যৰ পৰা অসমলৈ মাছৰ আমদানি বন্ধ হৈ পৰাত অসমত উৎপাদিত মাছেৰেই ৰাজ্যবাসীৰ চাহিদা পুৰণ কৰিছে ৰাজ্যৰ মীন বিভাগ আৰু ফিছফেডে ৷ 10 এপ্ৰিলৰ পৰা সমগ্ৰ অসমতে থলুৱা উৎপাদিত 18 লাখ কেজি মাছ বিক্ৰী কৰি প্ৰায় 80 কোটিতকৈও অধিক টকা উপাৰ্জন কৰিছে ৰাজ্যৰ মীন বিভাগে ৷ কেৱল গুৱাহাটীত ফিছফেডৰ তৰফৰ পৰা প্ৰায় 35 হাজাৰ কেজি মাছ বিক্ৰী কৰা বুলি জনায় ফিছফেডৰ পৰিচালন সঞ্চালক ডঃ ধ্ৰুৱজ্যোতি শৰ্মাই ৷