গুৱাহাটী, 3 এপ্ৰিলঃ লোকসভা নিৰ্বাচনত কংগ্ৰেছ আৰু এ আই ইউ ডি এফৰ মাজত গোপন বুজাবুজি হোৱাৰ খবৰে ৰাজ্যৰ ৰাজনৈতিক মহলত চৰ্চা লাভ কৰি থকাৰ সময়তে ৰাজ্যৰ ৰাজনীতিত আহিল এক নতুন খবৰ। বদৰুদ্দিন আজমলৰ এ আই ইউ ডি এফ দলে লোকসভা নিৰ্বাচনত বুজাবুজি কৰিলে কোকৰাঝাৰৰ ইউ পি পি এলৰ দলৰ লগত। নাগৰিকত্ব সংশোধনী বিধেয়কৰ বিৰোধিতা কৰি বিজেপিক পৰাভূত কৰিবলৈ উক্ত দল দুটাই এটাই আনটোক সহায়ৰ হাত আগবঢ়োৱা বুলি বুধবাৰে মহানগৰীত এক সংবাদমেল অনুষ্ঠিত কৰি এ আই ইউ ডি এফৰ মুখপাত্ৰ আমিনুল ইছলামে জানিবলৈ দিয়ে ৷
এ আই ইউ ডি এফ আৰু ইউ পি পি এলৰ মাজত হোৱা বুজাবুজিৰ কথা প্ৰকাশ কৰি আমিনুল ইছলামে কয় "হাগ্ৰাম মহিলাৰীয়ে বড়োসকলক লৈ ৰাজনীতি কৰাৰ বিপৰীতে হীৰা শৰণীয়াই বি টি এ ডিত থকা অবড়ো সকলক লৈ ৰাজনীতি কৰিছে।"বি টি এ ডিত বসবাস কৰা সকলো সম্প্ৰদায় আৰু জনগোষ্ঠীৰ লোকৰ সুৰক্ষা আৰু উন্নয়নৰ বাবে এ আই ইউ ডি এফ আৰু ইউ পি পি এল দলে বুজাবুজি কৰাৰ লগতে কোকৰাঝাৰত এ আই ইউ ডি এফে, ইউ পি পি এলৰ প্ৰাৰ্থীক সহায় কৰাৰ বিপৰীতে ইউ পি পি এলে ধুবৰী আৰু বৰপেটাতএ আই ইউ ডি এফৰ প্ৰাৰ্থীক সহায় কৰিব।
