গুৱাহাটী,১৯ ছেপ্টেম্বৰ: অসহনীয় গৰম আৰু সঘন লোডশ্বেডিং । বিগত সময়ত এই প্ৰসংগই ৰাজ্য উত্তাল কৰি ৰাখিছিল । আনকি ঠায়ে ঠায়ে প্ৰতিবাদো হৈছিল । ৰাজনৈতিক মহলতো বিশেষভাৱে প্ৰতিক্ৰিয়াৰ সৃষ্টি হৈছিল । বৰ্তমান সময়ত বিষয়টোৰ চৰ্চা কমিছে যদিও সমস্যাৰ সমাধান হোৱা নাই । অব্যাহত আছে লোডশ্বেডিং আৰু গৰমৰ প্ৰকোপো কম হোৱা নাই ।
লক্ষণীয় বিষয় যে ৰাজ্যৰ শক্তি খণ্ডৰ সংস্কাৰৰ বাবে কোটি কোটি টকা ব্যয় কৰাৰ পাছতো এতিয়াও শক্তিহীন হৈ আছে ৰাজ্যৰ শক্তি বিভাগ । ২৪ ঘণ্টাই ৰাজ্যবাসীক বিদ্যুৎ যোগানৰ প্ৰতিশ্ৰুতি দিয়া মুখ্যমন্ত্ৰী ড° হিমন্ত বিশ্ব শৰ্মা নেতৃত্বাধীন ৰাজ্য চৰকাৰখনৰ দিনত এতিয়া ৰাইজে বিদ্যুতৰ বাবে হাহাকাৰ কৰিব লগীয়া হৈছে ।
বিদ্যুতৰ ক্ষেত্রত ৰাজ্যখনক সক্ষমশীল কৰি তোলাৰ ক্ষেত্রত ব্যৰ্থ হোৱা ৰাজ্য চৰকাৰখনে বিদ্যুতৰ ক্ষেত্ৰত আনৰ ওপৰত নিৰ্ভৰশীল হোৱাৰ বাবেই আজিৰ এই সংকটজনক পৰিস্থিতিৰ সৃষ্টি হৈছে । নিজাকৈ বিদ্যুৎ উৎপাদনৰ ক্ষেত্ৰত কোনো ধৰণৰ গুৰুত্ব নিদিয়া চৰকাৰখনে এতিয়া মুকলি বজাৰৰ পৰা বিদ্যুৎ ক্ৰয় কৰাৰ ফলত প্ৰয়োজন হোৱা অতিৰিক্ত ধনৰ বাবে পুনৰ বিদ্যুতৰ মাচুল বৃদ্ধি কৰাৰ চিন্তা-চৰ্চা কৰিছে ।
বিদ্যুৎ যোগানৰ ক্ষেত্রত ক’বলৈ গ'লে একপ্ৰকাৰ হাত দাঙি দিছে ৰাজ্য চৰকাৰখনে । উল্লেখ্য যে আজিৰ তাৰিখত ৰাজ্যখনক দৈনিক ২৫০০ মেগাৱাট বিদ্যুতৰ প্ৰয়োজন হোৱাৰ বিপৰীতে ৰাজ্যখনত নিজাকৈ উৎপাদন হয় মাত্র ২৫০-৩০০ মেগাৱাট বিদ্যুৎ ।
বৰ্তমান সময়ত নামৰূপ তাপবিদ্যুৎ কেন্দ্ৰ, লাকুৱা তাপবিদ্যুৎ কেন্দ্র, কাৰ্বি লাংপি জলবিদ্যুৎ প্রকল্প আৰু ম্যানত্ৰিয়াং জলবিদ্যুৎ প্ৰকল্পৰ পৰা ৰাজ্যৰ প্ৰয়োজনীয় বিদ্যুতৰ জোৰা মৰা সম্ভৱ নহয় । এই প্রকল্পকেইটাই মুঠ ৪০৩ মেগাৱাট বিদ্যুৎ উৎপাদন কৰিব লাগে যদিও শেহতীয়াকৈ ক্ষমতা অনুসৰি শক্তি উৎপাদন কৰিব পৰা নাই ।
উল্লেখ্য যে ৬ ছেপ্টেম্বৰৰ দিনা যোগান ধৰিবলগীয়া ৪০৩ মেগাৱাট শক্তিৰ বিপৰীতে অব পিক আৱাৰ্ছত (Off-peak hours) ২৫২ মেগাৱাট আৰু পিক আৱাৰ্ছত ৩১৪ মেগাৱাট শক্তিহে যোগান ধৰিছে । লক্ষণীয় বিষয় যে ৰাজ্যৰ শক্তি বিভাগে দৈনিক নীপকো, এন এইচ পি চিৰ পৰা প্ৰায় ১৬০০ মেগাৱাট বিদ্যুৎ ক্রয় কৰে ।
এনে ক্ষেত্ৰত প্ৰতিদিনে ৰাজ্যত প্রায় ৭০০ পৰা ৮০০ মেগাৱাট শক্তিৰ নাটনি ঘটে । এই নাটনি পূৰাবলৈ পাৱাৰ একচেঞ্জৰ পৰা বিদ্যুৎ অধিক মূল্যত ক্ৰয় কৰিবলগা হয় । প্রতিদিনে মুকলি বজাৰৰ পৰা অতিৰিক্ত এই বিদ্যুৎ ক্ৰয় কৰিবলৈ শক্তি বিভাগে ৬ কোটি টকা পৰিশোধ কৰিব লাগে ।
সকলোতকৈ ডাঙৰ কথা যে ৰাজ্যখনত কেইবাটাও বিদ্যুৎ প্ৰকল্পৰ কাম আধৰুৱা হৈ আছে । কোনো এখন চৰকাৰেই এই প্রকল্পসমূহৰ কাম সম্পূৰ্ণ কৰাত গুৰুত্ব দিয়া নাই । ৩০ মেগাৱাটৰ শিলচৰৰ পাৱাৰ প্রজেক্ট, ৬৬০ মেগাৱাটৰ মাৰ্ঘেৰিটা থার্মেল প্রকল্প, বৰাপানীৰ ওচৰৰ ১৪ মেগাৱাটৰ প্রকল্পকে ধৰি প্ৰস্তাৱিত প্রকল্পসমূহ ৰূপায়ণ কৰা হোৱা নাই ।
ইয়াৰ বিপৰীতে চৰকাৰখনে এই প্রকল্পসমূহ ৰূপায়ণতকৈ আন ৰাজ্যৰ পৰা বিদ্যুৎ ক্ৰয় কৰাতহে গুৰুত্ব দি আহিছে । যাৰ ফলত এতিয়া প্ৰতিদিনে প্রায় ৬ কোটি টকা দি মুকলি বজাৰৰ পৰা বিদ্যুৎ ক্রয় কৰিবলৈ বাধ্য হৈ পৰিছে ৰাজ্য চৰকাৰখন । আনকি সমস্যা সমাধানত ব্যর্থ হোৱা মুখ্যমন্ত্ৰীয়ে ৰাজহুৱাকৈয়ে বিদ্যুতৰ এই সমস্যাৰ সৈতে ৰাইজক সহাৱস্থান কৰিবলৈ একপ্ৰকাৰ আহ্বান জনাইছে ।
এনে পৰিস্থিতিত ৰাইজে প্ৰতিবাদ কৰিও কোনো লাভ নাই । আনহাতে বিভিন্ন দল-সংগঠনেও এইক্ষেত্রত বৰ্তমান সক্ৰিয় হোৱা পৰিলক্ষিত হোৱা নাই ।
লগতে পঢ়ক: Akhil Gogoi: 23 বছৰ চৰকাৰত থাকি কেৱল নিজৰ সম্পত্তি গঢ়িলে হিমন্ত বিশ্ব শৰ্মাই; অখিল গগৈ
