গুৱাহাটী,১৮ ফেব্ৰুৱাৰী : ঋণ লোৱাৰ ক্ষেত্ৰত অলপো কৃপণালি কৰা নাই মুখ্যমন্ত্ৰী ড: হিমন্ত বিশ্ব শৰ্মা নেতৃত্বাধীন ৰাজ্য চৰকাৰখনে । ৰাজ্যখন প্ৰায় এক লাখ কোটি টকাৰ ঋণৰ বোজাত পোত যোৱাৰ পাছতো চৰকাৰখনে অব্যাহত ৰাখিছে ঋণ লোৱাৰ প্ৰক্ৰিয়া । নিৰ্বাচনৰ সময়ত ভোটাৰৰ মন জয় কৰিবলৈ কৰা ঘোষণাসমূহ ৰূপায়ণৰ বাবেই যেন এতিয়া প্ৰতি মাহেই ঋণ ল'বলৈ বাধ্য হৈ পৰিছে চৰকাৰখন । আনকি ঋণৰ বোজা যিমানে বৃদ্ধি পাইছে সিমানে সুদৰ পৰিমাণো বৃদ্ধি পাইছে (Debt burden on Assam government)।
বিগত ছয়টা বছৰত ৰাজ্য চৰকাৰে সুদৰ বাবদ ভৰিব লগীয়া হৈছে ২২,২৬৯ কোটি টকা । সুদৰ নামত ২০২০-২১ বৰ্ষত সৰ্বাধিক ৫,১৯৯.১৮ কোটি টকা বহন কৰিবলগীয়া হৈছে । কিন্তু এইবোৰকলৈ মুখ্যমন্ত্ৰী হিমন্ত বিশ্ব শৰ্মাৰ অলপো ভ্ৰুক্ষেপ নাই । এইক্ষেত্ৰত মুখ্যমন্ত্ৰীৰ স্পষ্ট কথা যে জি ডি পিৰ ধার্য সীমাৰ ভিতৰত ঋণ লোৱা হৈছে ।
এই যুক্তিৰ আধাৰত দৈনিক ৰাজ্যৰ ঋণৰ বোজা বৃদ্ধি কৰিছে । বিত্ত বিভাগৰ এটা সূত্ৰৰ মতে বিগত মাহত ৰিজাৰ্ভ বেংকৰ জৰিয়তে ৰাজ্য চৰকাৰখনে মুকলি বজাৰৰ পৰা ৬৫৩ কোটি টকা ঋণ লোৱাৰ পাছত চলিত মাহতো এতিয়ালৈকে মুঠ ১,৬০০ কোটি টকা ঋণ লৈছে । মন কৰিবলগীয়া কথা যে নিৰ্বাচনী প্ৰতিশ্ৰুতি পূৰণ কৰাৰ লগতে হিতাধিকাৰী সৃষ্টি কৰাৰ বাবে ৰাজ্য চৰকাৰখনে যি হাৰত ঋণ ল'বলৈ আৰম্ভ কৰিছে তাৰ ফলত ভৱিষ্যতে ৰাজ্যখনত বিৰূপ প্ৰভাৱ পৰাৰ আশংকা বৃদ্ধি পাইছে ।
বিশেষকৈ ৰাজ্যৰ ১১ লাখ মহিলাক মাইক্র'ফাইনেন্সৰ ঋণ ৰেহাই দিয়াৰ প্ৰথম পদক্ষেপ হিচাপে ২৫ হাজাৰ টকাকৈ দিয়াৰ যি আঁচনি ৰূপায়ণ কৰিছে তাৰ ফলত ৰাজকোষৰ পৰা হাজাৰ হাজাৰ কোটি টকা ওলাই গৈছে । উল্লেখ্য যে ৰাজ্য চৰকাৰখনে চলিত বিত্তীয় বৰ্ষত প্ৰায় ১৪ হাজাৰ কোটি টকা ঋণ লোৱাৰ লক্ষ্য হাতত লৈছিল । চৰকাৰখনে এই পৰিমাণৰ ঋণ গ্ৰহণ কৰিলে চলিত বিত্তীয় বর্ষ অন্তত ৰাজ্যৰ ঋণৰ পৰিমাণে এক লাখ কোটি টকা অতিক্ৰম কৰিব ।
উল্লেখ্য যে পূৰ্বৰ তৰুণ গগৈ চৰকাৰখনে দি থৈ যোৱা ঋণৰ বোজা আছিল প্ৰায় ৩৫,৬৯০ কোটি টকা । কিন্তু ইয়াৰ পাছত সোণোৱাল চৰকাৰ আৰু এতিয়াৰ হিমন্ত বিশ্ব শৰ্মা নেতৃত্বাধীন চৰকাৰখনে যি হাৰত ঋণ লৈছে সেয়া হৈছে অভাৱনীয় । ইফালে মুখ্যমন্ত্ৰী ড: হিমন্ত বিশ্ব শৰ্মাই কেৰালাৰ দৰে ৰাজ্যই ঋণ লৈ ৰাজ্যৰ উন্নয়নৰ গতি ক্ষিপ্ৰ কৰিছে বুলি যুক্তি দৰ্শাইছে যদিও কেৰালাই ঋণৰ ধন কি কামত ব্যয় কৰিছে সেয়াহে হৈছে সকলোতকৈ ডাঙৰ কথা ।
লগতে পঢ়ক :গ্ৰামাঞ্চললৈ সুখবৰঃ পঞ্চদশ বিত্ত আয়োগৰ পুঁজিৰ ৭০ শতাংশ পুঁজিয়েই পাব গাঁও পঞ্চায়তে
