গুৱাহাটী, ১৭ মাৰ্চ : আপুনি চৰকাৰী কৰ্মচাৰী নেকি ? যদি হয় তেন্তে আপোনাৰ আশে পাশে থকা কোনোবা চিনেমা হলত যদি "দ্য কাশ্মীৰ ফাইল" ছবিখন চলি আছে আৰু যদি আপুনি চাব বিচাৰে তেন্তে বিলম্বৰ নাই প্ৰয়োজন (The Kashmir File) । আপোনাৰ কাৰ্যালয়ৰ উৰ্ধতম কৰ্তৃপক্ষক আপোনাৰ সেই আশা ব্যক্ত কৰক আৰু লগে লগে কাৰ্যালয়ৰ পৰা অৰ্দ্ধছুটি লৈ চিনেমাখন উপভোগ কৰকগৈ । এইবাৰ চিনেমা চাবলৈ কৰ্মচাৰীক ছুটি দিবলৈ আপোনাৰ ওপৰৱালা বাধ্য । কাৰণ দিছপুৰৰ পৰা নিৰ্দেশ জাৰি কৰা হৈছে ছুটি দিবলৈ । কেৱল চিনেমাখন চাই আহি পিছদিনা আপুনি আপোনাৰ উৰ্দ্ধতম বিষয়াক প্ৰমাণ হিচাপে চিনেমা হলৰ টিকটটো জমা দিব লাগিব ।
ৰাজ্য চৰকাৰৰ সাধাৰণ প্ৰশাসন বিভাগৰ প্ৰধান সচিব অবিনাশ যোশীয়ে বৃহস্পতিবাৰে এই বিশেষ নিৰ্দেশনা জাৰি কৰিছে । কাইলৈৰ পৰাই কাৰ্যকৰী হ'ব এই নিৰ্দেশ (Assam government grant half day leave for state employees) । অৱশ্যে শুকুৰবাৰৰ পৰা ৰাজ্যিক কৰ্মচাৰীয়ে একেলগে লাভ কৰিব তিনিদিনৰ ছুটি । শুকুৰবাৰৰ দিনটো ফাকুৱাৰ বাবে চৰকাৰী বন্ধ, শনিবাৰৰ দিনটো প্ৰায়বোৰ জিলাতে ঘোষণা কৰা হৈছে স্থানীয় বন্ধ । তাৰ পিছদিনা দেওবাৰ । ইচ্ছা কৰিলে সোমবাৰেও অৰ্দ্ধবেলা ছুটি "কাশ্মীৰ ফাইল"ৰ বাবে ।
১৫ মাৰ্চত স্বয়ং মুখ্যমন্ত্ৰীয়ে তেওঁৰ সতীৰ্থ মন্ত্ৰী, বিধায়ক সকলোকে লগত লৈ গৈ গুৱাহাটীৰ এটা চিনেমা হলত "দ্য কাশ্মীৰ ফাইল" চাইছিল । চিনেমাখন চাই উঠি তেওঁ মন্তব্য কৰিছিল যে, "সকলোৱে এই ছবিখন চোৱা উচিত ।" এই ছবিখন চাবলৈ ৰাজ্যিক কৰ্মচাৰীৰ বাবে অৰ্দ্ধছুটিও দিয়া হব বুলি মুখ্যমন্ত্ৰীয়ে ঘোষণা কৰিছিল । কথামতেই কাম । আজি জাৰি কৰা হ'ল অৰ্দ্ধছুটিৰ বিশেষ নিৰ্দেশনা ।
লগতে পঢ়ক : Rajya Sabha election: কংগ্ৰেছে সংগ্ৰহ কৰিলে মনোনয়ন, জাৰি কৰিব থ্ৰি লাইন হুইপ
