নিউজ ডেস্ক, 26 জুন : ৰাজ্যত ক্ৰমে ভয়াবহৰূপ ধাৰণ কৰিছে বছৰৰ বানে ৷ বানত জলমগ্ন হৈছে ধেমাজি, লখিমপুৰ, বিশ্বনাথ, নলবাৰী, বৰপেটা, কোকৰাঝাৰ, নগাঁও, গোলাঘাট, যোৰহাট, মাজুলি, শিৱসাগৰ, ডিব্ৰুগড়ৰ, তিনিচুকীয়াৰ বিস্তীৰ্ণ অঞ্চল ৷ ৰাজ্যিক দুৰ্যোগ প্ৰশমন বিভাগে প্ৰকাশ কৰা অনুসৰি চলিত বৰ্ষৰ বানত ৰাজ্যৰ প্ৰায় 37 টা ৰাজহ চক্ৰৰ 554 খন গাঁও ক্ষতিগ্ৰস্ত হৈছে ৷ বানৰ কৱলত পৰি ঘৰ দুৱাৰ হেৰুৱাই আশ্ৰয়হীন হৈছে 2,20,409 জন লোক ৷ বানত আশ্ৰয়হীন হোৱা লোকক সাহাৰ্য প্ৰদানৰ কাৰণে প্ৰশাসনে 53 স্থাপন কৰিছে আৰু শুকুৰবাৰে পুৱা পৰ্যন্ত প্ৰায় 12,199 জনে শিবিৰত আশ্ৰয় লৈছে ৷ বানত ইতিমধ্যে প্ৰাণ হেৰুৱাইছে প্ৰায় 15 জন লোকে ৷ একেদৰে ৰাজ্যৰ প্ৰায় 46 টা ৰাজহ চক্ৰৰ 2,20,409 জন লোকৰ 18.090 হেক্টৰ কৃষিভূমি এইবছৰ বানৰ কৱলত পৰিছে ৷ প্ৰশাসনে ক্ষতিগ্ৰস্ত লোকৰৰ্থে 162 সাহাৰ্য শিবিৰ স্থাপন কৰি প্ৰায় 40,373 জন লোকক সাহাৰ্য প্ৰদান কৰিছে ৷
ৰাজ্যিক দুৰ্যোগ প্ৰশমন বিভাগে লগতে প্ৰকাশ কৰা অনুসৰি যোৰহাটৰ নিমাতীঘাট, ধুবুৰী, তেজপুৰত ব্ৰহ্মপুত্ৰ নদী, ডিব্ৰুগড়ৰ চেনীমাৰীত বুঢ়ীদিহিং, গোলাঘাটৰ নুমলীগড়ত ধনশিৰি, শোণিতপুৰত জীয়া ভৰলী, বৰপেটাত বেঁকী নৈ জলস্তৰ বিপদসীমাৰ ওপৰেদি বৈছে ৷ জিলা প্ৰশাসনে অঞ্চলকেইটাত প্ৰতি মূহুতৰ্ত দৃষ্টি ৰাখিছে নদীকেইখনৰ জলস্তৰত ৷ বিশেষকৈ লখিমপুৰ জিলাৰ নাহৰণি, কলিয়ানী, ৰৌমাৰী আৰু বালিভেটাত ভয়াবহ ৰূপ ধাৰণ কৰিছে সোৱণশিৰি নৈৰ গৰাখহনীয়াই ৷ যিকোনো পৰিস্থিতিৰ লগত মোকাবিলা কৰিব পৰাকৈ প্ৰশাসনে সাজু কৰি ৰাখিছে এছডিআৰএফ আৰু এনডিআৰএফ বাহিনীক ৷ মুঠ আঠখন নাৱৰ লগতে 101 জন লোক প্ৰতি নিয়ত সাজু কৰি ৰাখিছে এছডিআৰএফ আৰু এনডিআৰএফ বাহিনীয়ে ৷ আনহাতে চিৰাং জিলাৰ চম্পাৱতী প্ৰাথমিক বিদ্যালয়ৰ খেলপথাৰত অব্যাহত আছে ভূমিস্খলন ৷
ডিব্ৰুগড় জিলাৰো 11 টা ৱাৰ্ড বৰ্তমান বানৰ কৱলত পৰিছে ৷ নলবাৰীত এটা মথাউৰি বানে ছিঙি নিয়াৰ লগতে তিনিচুকীয়াত এখন দলং, নলবাৰী, যোৰহাটত ক্ৰমে এটাকৈ, মাজুলিত দুটা আৰু বঙাইগাঁৱত তিনিটা ঘাইপথ বানে উটুৱাই নিয়ে ৷ আনহাতে ধেমাজি, লখিমপুৰ, বিশ্বনাথ, শোণিতপুৰ, দৰং, নলবাৰী, বৰপেটা, গোৱালপাৰা, নগাঁও, হোজাই, পশ্চিম কাৰ্বি আংলং, গোলাঘাট, যোৰহাট, মাজুলি, শিৱসাগৰ, ডিব্ৰুগড়ৰ, তিনিচুকীয়া, কাছাৰ জিলাৰ প্ৰায় শ শ বিঘা কৃষিভূমি বৰ্তমান বানৰ কৱলত পৰিছে ৷ মৰিগাঁও জিলাত সৰ্বাধিক 12 খন গাঁৱৰ লগতে 131 হেক্টৰ কৃষি ভূমি বানত ক্ষতিগ্ৰস্ত হৈছে ৷
লগতে পঢ়ক: গুৱাহাটীত 14 দিনৰ বাবে লক ডাউন ঘোষণা
