গুৱাহাটী, 21 ফেব্ৰুৱাৰী: আমাৰ মুখ্যমন্ত্ৰীয়ে সন্ধিৰ বাঁহ কেনেকৈ কাটিব লাগে সেয়া ভালকৈ জানে । লোকসভা নিৰ্বাচনত আমি 12 খন আসন পাম । আগন্তুক দিনত আমি সৰু সৰু দলসমূহৰ লগত মিত্ৰতা কৰি নিৰ্বাচনত অৱতীৰ্ণ হ’ম । এই মন্তব্য মঙলদৈ লোকসভা সমষ্টিৰ সাংসদ দিলীপ শইকীয়াৰ (MP Dilip Saikia) ।
মঙলবাৰে বশিষ্ঠস্থিত ভাৰতীয় জনতা পাৰ্টীৰ মুখ্য কাৰ্যালয়ত বুথসমূহ শক্তিশালীকৰণ সন্দৰ্ভত আয়োজন কৰা হয় এখন বিশেষ সভা ৷ এই সভাতে আগন্তুক লোকসভা নিৰ্বাচনক লৈ মন্তব্য সাংসদ দিলীপ শইকীয়াৰ ৷ তেওঁ কয়, ‘‘এইবাৰ 12 খন আসনত জয়লাভ কৰিব বেজেপিয়ে ৷ নগাঁৱত পূৰ্বে আমি অলপ ভোটত হাৰিছো ৷ নগাঁৱৰ লগতে এইবাৰ আৰু 2-3 খন আসনত জয়লাভ কৰিম (Lok Sabha election 2024) ৷’’
ইফালে, লোকসভা নিৰ্বাচনত বিজেপিৰ সৈতে মিত্ৰতা প্ৰসংগত বিপিএফ প্ৰধান হাগ্ৰামা মহিলাৰীয়ে (Hagrama Mohilary) প্ৰদান কৰা মন্তব্যৰো প্ৰতিক্ৰিয়া প্ৰকাশ কৰে সাংসদ দিলীপ শইকীয়াই ৷ সাংসদগৰাকীয়ে কয়, ‘‘আমি BPF ৰ লগত পূৰ্বে মিত্ৰতাত আছিলো আৰু এতিয়া UPPL ৰ লগত মিত্ৰতাত আছোঁ । বৰ্তমান BPF দল আমাৰ লগত মিত্ৰতাত নাই । আগন্তুক দিনত আমি সৰু সৰু দলসমূহৰ লগত মিত্ৰতা কৰি নিৰ্বাচনত অৱতীৰ্ণ হ’ম । নিৰ্বাচনলৈ মাজত এটা বছৰ সময় আছে । এবছৰৰ ভিতৰত ৰাজনৈতিক প্ৰেক্ষাপটত কোন ফালে গতি কৰে কোনোৱে নাজানে ।’’
