গুৱাহাটী, ৩ ছেপ্টেম্বৰ: এক লাখ নিযুক্তিৰ ক্ষেত্ৰত আৰু এখোজ হিমন্ত বিশ্ব শৰ্মাৰ চৰকাৰৰ ৷ ১ লাখ চাকৰি প্ৰদানৰ প্ৰতিশ্ৰুতি পূৰণৰ দিশত আন এক গুৰুত্বপূৰ্ণ পদক্ষেপ গ্ৰহণ কৰি সম পৰিমাণৰ কাট-অফ লাভ কৰা তৃতীয় আৰু চতুৰ্থ বৰ্গত ৫১৪ গৰাকী প্ৰাৰ্থীক দেওবাৰে মুখ্যমন্ত্ৰী ড° হিমন্ত বিশ্ব শৰ্মাই আনুষ্ঠানিকভাৱে নিযুক্তি পত্ৰ প্ৰদান কৰে ৷
ইয়াৰে পঞ্চায়ত আৰু গ্ৰামোন্নয়ন বিভাগত ৯০ গৰাকী, লোকনিৰ্মাণ বিভাগত ৭৭ গৰাকী, বিদ্যালয় শিক্ষা বিভাগত ১৪০ গৰাকী, জল সম্পদ বিভাগত ৪১ গৰাকী, উচ্চ শিক্ষাৰ ১২ গৰাকী আৰু জনজাতি পৰিক্ৰমাৰ ৬ গৰাকীয়ে ধৰি আন আন বিভাগ সমূহতো বিভিন্ন জনে নিযুক্তি পত্ৰ লাভ কৰে ৷
উল্লেখ্য যে ৰাজ্য চৰকাৰৰ প্ৰথমখন কেবিনেটত ১ লাখ নিযুক্তি প্ৰতিশ্ৰুতি প্ৰদান কৰা হৈছিল ৷ পিছে, চৰকাৰে গ্ৰহণ কৰা এই সিদ্ধান্ত এবছৰৰ ভিতৰত ক’ভিড মহামাৰীৰ বাবে বা অন্যান্য কাৰণত সম্পন্ন কৰিব পৰা নাছিল যদিও দুবছৰৰ ভিতৰত ৮৬ হাজাৰ ৮ শ ৮৮ গৰাকী প্ৰাৰ্থীক নিযুক্তি দিবলৈ সক্ষম হয় ৷
শেহতীয়াকৈ নিযুক্তি লাভ কৰা প্ৰাৰ্থীৰ ভিতৰত ৮৩৫ গৰাকী প্ৰাৰ্থীয়ে একে নম্বৰ পোৱাৰ পিছতো নিযুক্তি প্ৰদান কৰিব পৰা নাছিল ৷ কিয়নো জেষ্ঠতাৰ ভিত্তিত একে নম্বৰ লাভ কৰা প্ৰাৰ্থীক নিযুক্তি প্ৰদান কৰা হৈছিল ৷ কিন্তু শেহতীয়াকৈ একে নম্বৰ লাভ কৰা প্ৰাৰ্থীসমূহক নিযুক্তি প্ৰদান কৰিবলৈ এক কেবিনেট সিদ্ধান্ত গ্ৰহণ কৰা হৈছিল ৷ সেই অনুসৰি ৫১৪ গৰাকী প্ৰাৰ্থীৰ নিযুক্তি তালিকা প্ৰস্তুত কৰি ইয়াৰে তৃতীয় বৰ্গৰ ৫৯ গৰাকী চতুৰ্থ বৰ্গৰ ৪৫৫ গৰাকী প্ৰাৰ্থীক আজি নিযুক্তি পত্ৰ প্ৰদান কৰা হয় ৷
এই অনুষ্ঠানৰ ভাষণ প্ৰসংগত মুখ্যমন্ত্ৰী ড৹ হিমন্ত বিশ্ব শৰ্মাই দুখীয়া দৰিদ্ৰসকলৰ হকে কাম কৰিবলৈ আহ্বান জনায় নিযুক্তি পত্ৰ গ্ৰহণ কৰা প্ৰাৰ্থীসকলক ৷ লগতে কয় যে মেধা আৰু ভাগ্যৰ বলত হৈছে আজিৰ নিযুক্তি ৷ যিসকল ভগৱানৰ বিশেষ সন্তান তেওঁলোকে এনে সুবিধা লাভ কৰে ৷ ভগৱানৰ আশীষ নহ’লে মই মুখ্যমন্ত্ৰী হ’ব নোৱাৰিলো হয় ৷ লগতে চলিত বৰ্ষৰ ছেপ্টেম্বৰত আৰু ২২ হাজাৰ পদ ওলাব বুলিও মুখ্যমন্ত্ৰীগৰাকীয়ে ঘোষণা কৰে ৷
এই অনুস্থানত মুখ্যমন্ত্ৰী ড৹ হিমন্ত বিশ্ব শৰ্মাৰ লগতে সাংসদ পল্লৱ লোচন দাস, ৰাজ্য চৰকাৰৰ মুখ্য সচিৱ পৱন কুমাৰ বৰঠাকুৰ, আৰক্ষী সঞ্চালক প্ৰধান জি পি সিংকে ধৰি কেইবাগৰাকীও বিশিষ্ট ব্যক্তি উপস্থিত থাকে ৷
লগতে পঢ়ক : MLA Atul Bora on Price Hike: খাদ্য খোৱাৰ নতুন ৰেছিপি দিলে বিধায়ক অতুল বৰাই
